JAMITA MINGGU I DUNG EPIPHANIAS: PANDIDION NABADIA (MARKUS 1:4-11)

JAMITA/KHOTBAH

MINGGU I Dung EPIPHANIAS

(Hapapatar/Penyataan)

EVANGELIUM: MARKUS 1:4-11

Tema: "PANDIDION NABADIA"

Baptisan (Pandidion)

Dijamitahon si Johanes Pandidi do taringot tu hamubaon ni roha. Mansai torop halak Jahudi na ro mandapothon ibana dung dibege nasida jamitana i. Didok si Markus do di Evangelium on, pola ruar do “sude pangisi ni tano Judea ro di sude halak Jerusalem manopot ibana” (ayat 5a). Dia do huroha jamita ni si Johanes umbahen apala tung sude ro halak mandapothon ibana?

Na parjolo sahali dipatorang do di turpukta on, na dijamitahon si Johannes do pandidion hamubaon ni roha. Jala didok muse, ia pandidion i mangkorhon hasesaan ni dosa do (4). Na marlapatan ma i, molo dung tardidi sasahalak dapotan hasesaan ni dosa ma ibana sian Debata. Alai nang pe songoni, ganup halak na ro mandapothon si Johannes, ndanda manigor dididihon ibana. Jolo ditangkasi do ganup halak na ro i marsadasada manang na tutu situtu do nasida na olo marhamubaon ni roha. Sian dia ma dapot hita pangantusion sisongoni? Di turpuk on, di ayat 5b, didok do songon on: “dipandidihon do nasida di batang aek Jordan dung ditopoti be dosana”. Pandohan “dung ditopoti be dosana”, na marlapatan ma i na jolo tangkas do diboto dohot dirajumi ganup halak na ro i, na jolma pardosa na dangol do nasida, dohot silaosi patik ni Debata. Ihut tu si muse, na ingkon disolsoli nasida do nasa dosa dohot pangalaosion nasida i, jala ditopoti di adopan ni Debata. Dung i pe asa rade si Johannes mandididihon nasida. Hinorhon ni i talup ma ganup na tardidi i manjalo hasesaan ni dosa do sian Debata.

Ra, olo do sungkunsungkun rohanta. Dia do dalanna umbahen mangkorhon hasesaan ni dosa pandidion i? Tung margogo ma aek manesa nasa dosa? Tontu dapot roha do sungkunsungkun si songon i. Alai songon na nidok ni turpukta on di ayat 4 i, mansai tangkas didok: ia pandidion i i ma pandidion hamubaon ni roha. Jala dipatupa i, laho pasesahon dosa. Ia si Johannes naposo na pinillit ni Debata do ibana. Sahalak panurirang na sorang di si Sakarias dohot si Elisabet (Lukas 1:7). Songon sada panurirang, holan hata na sian Debata do sipasahaton ni i. Jala Debata do na pasahathon ulaon pandidion i tu ibana. Haposan do hata ni Debata. Jala ndang hea tubu gabus di Debata. Jadi molo didok hata ni Debata pandidion i laho pasesahon dosa, tontu na tutu situtu do i. Jala hinorhon ni hata i do umbahen na margogo pandidion i manesa dosa ni jolma.

Dung sidung si Johannes mandidihon pandidion nabadia i, dijamitahon ibana do muse taringot tu haroroni sahalak na gumogo sian ibana. Didok ibana songon on, “Na ro ma sian pudingku na gumogo sian ahu; na hurang tama do ahu paunduk ahu mangkarhari tali ni sipatuna” (Markus 1:7). Jala didok ibana muse, “Aek do hudidihon tu hamu; alai Tondi Parbadia do didihononna tu hamu” (Markus 1:8). Ia na gumogo na naeng ro i, songon na nidok ni si Johannes Pandidi, i ma Tuhanta Jesus, Sipalua i. Ibana do na mandidihon Tondi Pardia tu ganup halak na porsea. Alai andorang so dididihon Jesus Tondi Parbadia i, ro do Ibana mandapothon si Johannes asa dididihon Ibana. Di mulana i ndang ditolopi si Johannes pangidoan-Na i. Ai tangkas do didok si Johannes, na gumogo do Jesus i sian ibana. Tung mangkarhari tali ni sipatuNa pe ibana ndang tama. Na marlapatan ma i, tung gabe hatoban ni Jesus pe si Johannes ndang tama. Dia alana? On do! Ia mangkarhari sipatu, ulaon ni hatoban do i. Jala ndang tung hea sasahalak, manang sada sisean pe, mangkarhari sipatuni sada guru. Holan hatoban do na mangulahon i. Na hinangkam ni pandohan on, tung na so tama do si Johanes tung sura pe ibana holan gabe hatoban ni Jesus. Alani i do umbahen didok si Johannes muse, di na ro i Jesus naeng padidihon Dirina, “Ahu do nian patut didionMu, hape Ho ro mandapothon ahu” (Mateus 3:14). Alai ro do hata ni Jesus mandok tu si Johannes, “Songon i ma jolo! Ai tama do tapajongjong nasa hatigoran!” (Mateus 3:15). Na marlapatan ma i, na ditolopi Jesus do pandohan ni si Johannes. Jala na tutu situtu do na nidok na i. Tung na so tama do si Johannes mandidihon Jesus. Ai Anak ni Debata do Jesus i. Nabadia. Ndang adong dapot dosa di Ibana. Alai dia ma pandok ni Jesus i? “Songon i ma jolo! Ai tama do tapajongjong nasa hatigoran!” Na marlapatan ma i, na unduk do Jesus tu Hata ni Debata. Unduk tu sangkap ni Debata. Sipangoloi di Hata ni Debata.

Alai dia ma sangkap ni Debata umbahen na ingkon didihonon ni si Johannes Jesus? Songon naung tinariashon di ginjang, na mangoloi Hata ni Debata do Jesus. Alai dia do hinorhon ni pangoloion na i? Manang, dia do sangkap ni Debata umbahen na ingkon tardidi Ibana? Songon pandok ni Jesus tu si Johannes, “Ai tama do tapajongjong nasa hatigoran!” “Hatigoran”, molo di hata Gorik (Yunani), didok do i “dikaiosunen”. Na marlapatan ma i, “kebenaran”, “hasintongan” manang “hatigoran” di hata Batak Toba.   Di buku ni si Musa, didok do “Jadi porsea ma si Abram di Jahowa, gabe hatigoranna do i dietong Jahowa.” (1 Musa 15:6). Dia do lapatanni hatigoran na nidok na dison? Songon na tangkas taboto, ndang marianakkon si Abraham dohot parsondukna si Sara. Nunga mansai matua nasida. Ndang holan i, alai si Sara sada parompuan na hol do ibana. Molo di hata Indonesia, didok “mandul”. Lapatanna ndang dung talup bortian ni si Sara gabegabean sada dakdanak mulai sian habajaraonna sahat tu na matua ibana. Alai songon pandok ni Debata tu si Abraham, “Ua tailihon ma dompak langit i jala bilangi angka bintang, molo habilangan ho angka i. Dung i didok muse tu ibana: Songon i ma pinomparmu sogot.” (1 Musa 15:5). Dungi didok hatani Debata ma muse: “Jadi porsea ma si Abram di Jahowa, gabe hatigoranna do i dietong Jahowa.” (1 Musa 15:6). Na nidok na dison, hinorhon ni haporseaon ni Abram, gabe halak na tigor ma ibana di adopan ni Debata. Dihaporseai ibana na tuk do gogo ni Debata patupahon dohot pasauthon na nidok na i. Pos do roha ni si Abraham di Hata ni Debata tung pe ndang tuk pikkiranna mangantusi hataNa i. Ai hombar tu hajolmaon, ndang tagamon marianakkon, manang manubuhon posoposo sada ina na hol (mandul), jala muse nunga na matua. Alai porsea do si Abraham di hata ni Debata. Alani i, gabe hatigoran ma i dietong Jahowa.

Marhite on, boi ma taantusi pandohan ni Tuhanta Jesus na mandok: “Songon i ma jolo! Ai tama do tapajongjong nasa hatigoran!” (Mateus 3:15). Na marlapatan ma i, tardidi pe Jesus, asa jongjong do hatigoran ni Debata. Jala pandidion najinalo na i, patujolo ni hataridaan ni na bernit dohot hamatean naeng siteanonna do muse di hau pinarsilang. Marhite i, diporsan jala ditean Ibana ma sude nasa dosa ni portibi on. Jongjong ma hatigoran ni Debata. Jala songon pandok ni Tuhanta Jesus di Johanes 3:16 “Ai songon on do holong ni roha ni Debata di portibi on, pola do Anakna na sasada i dilehon, asa unang mago ganup na porsea di Ibana, asa hangoluan na salelenglelengna di ibana”. Dungi, jumpa ma muse pandohan ni Tuhanta Jesus: “Laho ma hamu, podai hamu ma saluhut bangso, didi hamu ma nasida tubagasan Goar ni Ama. Anak dohot Tondi Parbadia!” (Mateus 28:19). “Na porsea jala tardidi, dapotan haluaon; alai na so porsea i, hona uhum do!” (Markus 16:16). Tamba ni i, songon na nidok apostel Petrus tu halak Jahudi na ro mandok tu ibana: “Aha nama sibahenonnami, ale angka dongan?” “Alai didok si Petrus ma tu nasida: Pauba hamu ma rohamuna, dung i padidihon hamu ma ganup hamu tu bagasan Goar ni Jesus Kristus, bahen hasesaan ni dosamuna, asa dijalo hamu silehonlehon i, i ma Tondi Parbadia i.” (Ulaon ni Apostel 2:37-38).

Marhite pandidion najinalo ni Tuhanta Jesus, gabe jongjong ma hatigoran i. Ganup halak na porsea di Ibana jala tardidi, gabe partigor ma ibana di adopan ni Debata. Di bagasan goarni Debata Ama dohot (+) Anak dohot Tondi Parbadia. Amen.

 

Sinurathon ni: Pdt. Eben Ezer Aruan, M. Th