JAMITA TAON BARU 01 JANUARI 2025: RO DO TUHANTA MANDAPOTHON HITA (LUKAS 2:22-40)

Patujolo:

Jumolo hami Pucuk Pimpinan dohot sude parhobas di Kantor Pusat ni hurianta pasahathon tabe huhut selamat taon baru 01 Januari 2025, tu hamu amanami, inanami; Pandita, Evangelis, Majelis Pusat, Guru jemaat, Sintua dohot sude ruas ni huria. Puji-pujian dohot mauliate ta pasahat tu Tuhanta disiala asi dohot holong ni roha-Na na manogunogu hita mamolus taon na buruk i, sahat hita tu taon na imbaru on. Ndada ala ni gogonta umbahen na sahat hita mamasuki taon na imbaru on tung ala ni basa ni Tuhanta do i tu hita.Manghirim do hita di taon na imbaru on naeng jaloonta godang angka pasupasu; dipasupasu hita di hahipason, las ni roha, cuaca na denggan, nang tiur ni pancarian, tarlumobi ma haporseaonta nang  hangoluan saleleng ni lelengna sipapataron ni Tuhanta di angka na porsea di Ibana. Didok Par-Pslm do “Sai pabotohononmu do tu ahu dalan hangoluan, sun ma las ni roha di adopan ni bohim, angka hasudungan ni roha masa di siamunmu saleleng ni lelengna” (Psalmen 16;11).

Ro do Tuhanta manopot hita, ro Ibana laho paluahon hita, asa manang ise na porsea tu Ibana unang mago alai dapotan hangoluan saleleng ni lelengna (Joh.3:16). Sialani i marhite jamita on didok do! 

TEMA: “RO DO TUHANTA MANDAPOTHON HITA”

Ilustari Gambar Simeon dan Hana

I.         Unang tapangasahon pingkiranta.

Si Lukas do manurathon buku on, sahalak tabib/dokter. Holan ibana do panurat Evangelium na manurathon taringot tu na binoan ni natorasNa Posoposo i tu Bagas joro laho pasunathononhon, huhut pajumpang dohot si Simeon nang si Hanna. Marhite turpuk on boi do antusanta ndang piga na mangalehon rohana maimaimahon haroro ni Tuhan i, nda holan si Josep, si Maria dohot si Simeon nang si Hanna sambing do? Boha do angka na asing? Ndanunga marribu taon Israel managam haroro ni Mesis i? Jala sude do angka panurirang manurirangkon tu nasida jala berharap do sude nasida di ditopot Mesias (Mesianic hope). Saonari nunga ro Ibana alai dang piga na mananda, songon i torop jolma di Jerusalem na binolus dohot na mamolus Tuhanta i alai ndang ditanda nasida Tuhan i. Boasa boi songon i? Ala sai dipangasahon nasida do pingkiranna dohot angka parbinotoan portibi on. Panandaon nasida di Mesias songon sahalak raja na di portibi on; marpahean hasangapon, didongani angka soldadu, marhoda jala maniop podang, ala Mesias i do dihirim nasida paluahon nasida sian angka musu ni Israel tarmasuk paluahon nasida sian gomgoman ni Rom.Alai ndang songon na dipingkiri nasida haroro ni Mesias i naung ro i. Ala ni i ndang adong nanggo sahalak na umboto jala mananda, tarlumobi ma di bagasan status Posoposo i do pe Ibana, mambahen gabe lam maol tandaon ni nasida.

Uju i halak Jerusalem mangulahon ulaonna songon na somal, sibuk be nasida di angka ulaonna be. Hape sasintongna ingkon dohot do nasida ro tu dalan manomunomu Mesias i, alai dang diulahon i ala na so ditanda jala dang porsea. Didok di Hata ni Debata: “ai dipapitung debata ni portibi on do pingkiran ni angka na so porsea, asa unang nasida dipatiur sondang ni Barita na Uli taringot tu hasangapon ni Kristus, na tardok suman ni Debata (2 Korint 4:4). Portibi on do dipangke sibolis mambahen so tahaporseai Tuhanta  Jesus. Dilalaplalapi portibi on do hita, ujungna gabe lupa hita tu sitompa jala Sipalua hita. Dilehon portibi on do tu hita angka silomo ni rohanta laho mangunjuni asa tartait hita tu lomo ni roha ni sibolis. Hinorhon ni i gabe torop jolma lilu jala so porsea, Hata ni Debata na tarsurat di Johanes 3:18 “Ndang siuhumon na porsea di Ibana, alai anggo na so porsea i, nunga hona uhum ala so porsea ibana di Goar ni Anak sasada ni Debata.” Dibagasan na dua taon on, hutopot hami do pigapiga hurianta GKLI. Sai huparateatehon do; haroro ni angka ama tu gareja ndang sebanding dohot haroro ni angka ina songon i naposo bulung.  Angka ama mansai otik do na ro tu parmingguon, hape ama i do gabe malim di bagasna, ibana do sipanogunogu dohot si partangiang, ingkon ibana do mangarahon inanta dohot angka dakdanak ro di sude pangisi ni bagasna ro tu parmingguan. Sahalak ama dang holan bertanggung jawab tu ngolu siapari keluarga alai dohot do bertanggungjawab di ngolu ni partondion ni keluarga. Taida pribadi ni sahalak ama na margoar si Josua di Padan narobi. Josua ndada holan bertanggung jawab tu ngolu siapari ni keluarga alai dohot do nang ngolu partondionna, taida jamita ni si Josua tu Israel: “alai molo tung sogo rohamuna mangoloi Jahowa, pillit hamu ma sadarion, manang ise naeng oloanmuna, manang debata sileban nanioloan ni ompumuna dibariba ni batang aek i, manang debata ni halak Amori nampuna tano na niingananmuna i; alai anggo ahu dohot donganku sajabu, ingkon Jahowa do oloannami.” (Josua 24;15)

Sude ma hita patutoruhon rohanta di adopan ni Tuhan i, nunga ro Ibana tu hita, ro Ibana naeng mamasumasu hita; mangalehon dame, las ni roha, holong ni roha, mamasumasu hita dohot gogo, sipanganon, siinumon, nang haporseaon dohot hangoluan saleleng ni lelengna. Sude do tarpatupa Ibana laho tu haulion dohot hadengganonta. Ndang adong na so tarpatupa Debata (Lukas 1:37), haporseai hamu ma Ibana, Ibana do Raja sipalua hita.

II.        Ai Ibana do Raja, Sipalua i.

Dung sahat si Maria dohot si Josep tu bagas joro i, diabing si Simeon ma Posoposo i, dipuji ma Debata ninna ma: “Paluaonmu ma nuaeng ale Raja, naposom on di bagasan dame, songon na nidokmi; ai nunga diida matangku haluaon na sian Ho i, na pinaradem dijolo ni bangso sudena, bahen panondang sumondangi angka parbegu, bahen hasangapon ni Israel, bangsom i! (ayat 29,32). Tondi Porbadia manogunogu jala margogoihon Simeon manghatahon panindangion taringot tu Posoposo i. Adong do dua bagian siidaonta di bagasan panindangion ni si Simeon on:

Parjolo: Posoposo, i ma Raja manang Tuhan. Raja na mangarajai saluhutna, ndada songon raja ni portibi on ala sian surgo do haroroanNa jala HarajaonNa, hot do ro di saleleng ni lelengna. Ibana do mangarajai nang di surgo nang di tano on, songon na nidok ni Apostel Paulus tu si Timoteus: “ai di hajujumpang ni tingkina patar ma Ibana, bahenon ni na Martua i, pargogo sasadasa, Raja ni angkaraja, Tuhan ni angka tuan” (1 Tim 6:15).

Paduahon: ulaon-Na: ima Paluahon sude bangso. Disurathon si Matius: “Tumubuhon Anak ma ibana; Jesus do Goarna, bahenonmu, ai paluaonna do bangsona sian angka dosa nasida be (Matius 1:21)”. Jala hombar tusi do panindangion ni si Simeon na mandok: ”ai nunga diida matangku haluaon na sian Ho i” didok si Simeon hatana i tu Posoposo i. Ai Ibana do Raja Sipalua i, na paluahon jolma sian dosa dohot hamatean. Posoposo i do Tuhan jala Debatanta, haroroNa patupa dalan tu haluaonta. Dosa i do pangambati di hita tu haluaon, upa tinuhor ni dosa, i ma hamatean (Rom 6:23). Dang adong jolma na lias sian dosa (Rom 3:23) Alani i ndang margogo hita ro tu haluaoni, nang marhite angka ulaon na denggan, amal, manang aturan-aturan na binahen ni jolma. Holan Tuhan Jesus i do na tuk paluahon hita. Di jolo ni Debata ndang adong dosa na metmet manang dosa na balga, jala ndang adong dosa na balga situtu na so tarsesa Tuhanta,  jala ndang adong dosa na pametmethu mambahen hita sundat tu paruhuman. Nunga ro Ibana laho manesa dosanta, pasahat ma ngolum tu Ibana. Hata ni Debata di Jesaya 1:18: “dung i sai ro ma hamu, asa mardabudabu hita, ninna Jahowa Tung sura rara dosamuna songon abit bunga dapdap, bontar do bahenonku songon itak; nang pe rara songon abit hasumba, gabe songon hapas do muse”.

III.      Alani I, jangkon ma Ibana tu ngolum.

Molo taida do sikap ni si Josep, Maria songon i Simeon nang si Hanna, tung dipatutoru do roha nasida tu adopan ni Debata jala dijouhon Debata nasida asa margogo jala hot dibagasan haporseaon. Songon si Maria, di na ro surusuruan Gabriel mandapothonsa huhut mandok: “Gabegabean ma ho, tubuan anak ma ho, Jesus ma  bahenonmu goarna.” Nda suhar do sasintongna hata i di roha ni si Maria? Ala ndang adong ditanda ibana dope baoa. Alai dipatutoru si Maria do rohana di jolo ni Tuhan huhut mangalusi si Gabriel: “Naposo ni Tuhan i do ahu, sai saut ma tu ahu songon na nidokmi” (Luk 1:31,38). Taida dison, untangian do si Maria tu Hata ni Tuhanta asa sian na Tuhan Yesus” piningkaranna, gabe mambahen na uli jala na denggan di si Maria.

Songon i do nang si Josep, ama na bertanggungjawab huhut na serep marroha, ndang adong ditahi rohana paurakhon si Maria. Dipatutoru do rohana di adopan ni Tuhan i, jala ndang mabiar ibana manang songon dia pe parhatahata ni jolma ala porsea do Ibana tu TuhanNa. Marhitehite huaso ni Tondi Porbadia sambaing do na tuk paimbaruhon roha ni angka ama di huria i dohot panangihonon di hata ni Debata, na manopa rohanta asa gabe ama na burju dihuria i. Taida nang si Simeon, sahalak na marbenget ni roha paimaimahon Tuhanta sahat tu ari hatutuana. Ibana nunga matua, hurang lobi marumur 90 taon, alai ndang mangambati semangat na ro tu Bagasjoro i. Didok si Lukas do ibana sahalak na bonar huhut na daulat jala na niinganan ni Tondi Porbadia. Jala nunga dipabotohon Tondi Porbadia i tu ibana, na so idaonna hamatean, ia so jolo diida Kristus ni Tuhan i. Dialusi Tuhan i do tangiang na, pajumpang Ibana tu Tuhan i huhut ma didok: “Paluaonmu ma nuaeng ale Raja naposom on di bagasan dame songon na nidokMi” (ayat 29). Mansai las roha ni si Simeon di na pajumpang Ibana tu Tuhanta, dipuji do Tuhanta i, jala nunga tung rade rohana manjangkon hangoluan na saleleng ni lelengna. Di hamu angka ama, na hinolongan ni Tuhanta, tongtong ma marbenget ni roha di bagasan Tuhan i, na pasti ro do Tuhan i mandapothon hamu mangalehon pasupasu ima dame dohot las ni roha, tontong ma satia tu Tuhan i.

Taida muse sahalak ina naung mabalu, nunga matua, marumur 84 taon, margoar si Hanna. Diharingkothon ibana do martangiang arian dohot borngin, huhut marpuasa, sai ro do ibana ganup ari tu Bagasjoro i paimaimahon TuhanNa. Ditangihon Tuhan i do tangiang na, ro do Tuhan i mandapothon ibana jala sun las ni rohana mamujimuji Tuhan i. Hamu angka ina na hinaholongan ni Tuhanta, sai lam tu gogona ma hamu martangiang jala mangihuthon Tuhan i. Sude hita angka parhobas nang ruas pe, dijouhon Debata hita asa tontong setia hita tu Ibana, ai na setia do Ibana tu hita. Didok Hata ni Debata do: “Sahat ro di hatutuamu sai tongtong do ahu, jala ro di na ubanon sai ahu do mangusung hamu. Ahu do mambahensa na sai laon, ahu do mangompa, ahu do mangabing, jala ahu paluahon nuaeng” (Jesaya 46:4). Songon i ma Tuhanta manogunogu hita dibagasan holong ni rohaNa, ai balga situtu do holongNa di hita, diriNa sandiri dipasahat tu hamatean humophop hita. Dang tadingkononNa hita, sai diparmudumudu do hita dipardalananta di bagasan taon 2025 on. Selamat taon baru ma di hamu saluhutna, Amen.

 

Panurat: Bishop GKLI, Pdt. Jon Albert Saragih, M. Th

JAMITA MINGGU KANTATE: MIAN MA HITA DIBAGASAN JESUS (JOHANES 15:1-8)

Patujolo:

Adong do angka ugamo naeng mangomo hasonangan/surgo marhitehite angka ulaon na denggan, mangalehon asi asi; puasa, dohot na pasiak siak dirina sandiri. Naeng taruli nasida di hasonangan sogot marhitehite ulaonna na nirajum ni roha na denggan; so pola manghaporluhon Tuhan Jesus gabe Sipalua nasida. Marrumanghon agama amal do agama na songon i. Alai di Rom 3, 23 didok hata ni Debata, aluhut na do jolma mardosa; jala ndang dapot pujion ni Debata nasida. Ndang tarpatupa jolma dalan tu banuaginjang; tarpatudos do i tu kapal terbang na mamboan halak tu luat na dao. Holan panumpang i do na boi sahat boanon ni kapal terbang. Songon i hita jolma holan na dibagasan Jesus do na boi sahat tu surgo. Ala ni i dijouhon Jamita on do tu hita: Thema:

“MIAN MA HITA DIBAGASAN JESUS”

Ilustrasi 

I.        Unang ambolong hita (ay. 6)

Di Jesaya 7, 14 digoari do Mesias na sorang i, Immanuel, na marlapatan donganta ma Debata manang saor tu hita Debata. Gok do i di Joh 1:14; gabe daging Hata i (logos) jala maringan ditongatonga ni hita on. Gabe jolma do Debata di bagasan Jesus (Kol 2:9) asa tung saor Ibana tu hita marhitehite hajolmaonNa i. Alai Debata situtu do Jesus. Dipanompaon diullushon Debata Hosa hangoluan tu hita, gabe martondi ma hita, gabe boi ma marparsaoran, marpardomuan Debata tu jolma, jala jolma tu Debata. Aha do panghorhon ni pardomuan i? Debata Jesus do mual ni ngolu, sian Ibana do sandok ngolu ni jolma. Hangoluan na nidokna dison ima ngolu na sian banuaginjang na sian Jesus. Adong nama dua mansam na ro tu jolma; i ma ngolu na manontong, ngolu partondion na jinalo ni ompunta si Adam sian Debata dipanompaon i. Alai dung mardosa jolma i, ingkon hona uhum nama jala mate, ngolu parsatongkinan nama ngolu ni jolma na mardosa, jala ngolu parsatongkinan on pe nunga sai disusupi sibolis i ganup ari, ngolu na mardosa nama na marujung tu hamatean saleleng ni lelengna. Alai ro Debata dibagasan Jesus tu portibi on, diboan do ngolu na manontong i.

Andorang so tarsilang dope Jesus, nunga diserang Ibana sibolis i, jala ujungna muse dipatunduk marhitehite haheheonNa. Alai dijolo ni i nunga torop halak na malua marhitehite ulaon habalgaon dohot jamita Harajaon ni Debata sian Jesus. Nunga torop halak na porsea di Ibana. Angka na mian di Ibana ndang be dikuasai manang hatoban ni sibolis, Jesus nama donganna ganup ari. Jesus do hau anggur i, jala halak na umbege hatana rantingna. Dibagasan ni sumisi do sibolis. Alai nang pe songon i sai diuji sibolis i do asa sompol saluran sipanganon sian batang (Jesus) tu ranting manang tu jolma, jala molo sompol sipanganon hangoluan tu jolma, na gabe songon ranting ni Kristus, mahiang ma ranting i ndang olo marparbue masak ma i ujungna ingkon sigotapon jala dirotongkonon tu api (ay. 2).

Di portibi on pe jotjot do jumpang di ngolu ni torop halak na manggoari dirina Kristen. Ndang ringkot rohana marsaor dohot Jesus, ndang ringkot rohana marminggu, tu partangiangan, ndang dihapusuhon manjaha hata ni Debata dohot patupa kebaktian keluarga. Molo tapamanat ngolu ni halak i, holom do ndang tarbege angka panghataion hakristenon, holan arta tano on manggohi rohana, jala nunga malos huhut mate ngolu partondionna, nang pe targoar dope ibana ruas ni huria. Jamot hita unang tois rohanta di Jesus dohot di Hatana, molo tois rohanta disi utahononna do hita (Pangk 3:16) songon huria na danggoldanggol sisilon.

II.        Asa ias jala marparbue na godang hita

Dipaias do ranting i asa marparbue, songon i hita halak kristen dipaias Hata ni Debata (ay 3) Hata ni Debata na tabege parhitean ni Tondi Porbadia do i bongot huhut mangula di rohanta; Sude Hata ni Debata na tarsurat i marisi patik/ pinsangpinsang dohot Barita Nauli na gabe apulapul jala ngolu do i. Sai marpoda do angka natuatua tu ianakkonna, alai jotjot poda i ndang siat, ndang margogo, ai godangan bisuk ni portibi on do. Jadi ndang margogo mangula, mangaropuhi, mangurati huhut manutung rohana. Alai molo hata ni Debata manggohi rohanta, na ni donganan ni Tondi Porbadia i, dipaias i do rohanta. Di na mian hita di Jesus, mudarna dohot Tondina i paias hita (1 Joh 1:7 ). Disesa do sude dosanta (1 Joh 1:9), gabe hilalaonta do ias ni panggora ni roha tiur ulaonta, jala gok tua dohot olopolop ngolunta (Pslm 32:1). Torop sian hita na gaor panggora ni rohanta, ndang adong dame maradophon Debata dohot dongan jolma. Sude i tarjadi ala so sesa dope dosanta, ndang tatopoti, ndang dibagasan Jesus ngolunta, ala ni lam gaor ma rohanta songon roha ni si Kain dibahen sibolis i. Ala ni i tung sai mian ma hita di Jesus marhitehite na mian di HataNa, asa tung ias ngolunta, sonang panggora ni roha (1 Joh 3).

Tu ranting ni anggur do hita dipatudos Jesus, ndang tu bunga manang hau haiason, bunga dohot bulung na rugun na pinangido ni Tuhan Jesus. Alai anggur ingkon parbuena do na tabo panganon jala halomoan di Israel. Songon i do hita halak Kristen, parbue halomoan ni Debata diigil Jesus sian hita. Angka aha do parbue i? Di Galatia 5:22; adong do sia (9) parbue partondion diigil Debata sian hita, i ma: Holong dohot las ni roha, dame dohot lambas ni roha, habasaron, habasaon, haporseaon, halambohon dohot hatomanon. Sada pe na hurang sian i ndang marparbue na denggan; tiruanna, molo so pardame hita holan na guntur ma jabunta, guntur dohot dongan sahuta, sabangso, parbue na asing i ndang marguna manang marurus ma i. Ala ni do tapamanat ma dirinta be, parbue aha do na jumpang dingolunta? Parbue na busuk manang parbue partondion do tu dongan? Manang ndang hea tapingkiri asa adong parbuenta diadopan ni Debata dohot jolma. Molo so gabe anggur na marparbue hita, tudos ma hita tu hau ara na tinoruan ni Tuhan i na so marparbue i (Mat 21:19) i, manang songon ranting ni anggur na so marparbue i na ingkon digotap jala dibolongkon (Joh 15:2) Hadameonta dohot Jesus do mambahen hita mangolu jala marparbue, siala i molo naeng ture jala marparbue, hita sai domu ma hita tu Tuhan Jesus i.

III.        Dibahen i mian ma hita dibagasan Jesus jala baen hasangapon ni Debata ma ngolunta.

Godang do jolma na mambahen marlea Debata ala ni ngoluna. Molo taida daftar ni na hona tahan manang tarhurung ala ni hajahaton, tung godang do i margoar Kristen, naung tardidi dohot ruas ni huria. Aha do dohonon ni pejabat na manghurung i? Dohononna ma songonon do hape halak Kristen? Huroha hajahaton do diajarhon Jesus tu pengikutna. Nda nunga marlea Debata? Dalan asa marsangap Debata dohot Jesus marhitehite i ma molo saurdot pangalahonta tu Hakristenonta. Isara barang sigadison; molo merekna patent hape isina roa, penipuan do goar ni i. Jala uhumon do sibahen barang palsu i. Ala ni i ingkon sipasangap Debata do sandok ngolunta.

Di 1 Kor. 10:31 “Na mangan manang na minum pe hamu, manang dia pe diula hamu bahen hamu saluhutna pasangap Debata”. Hita pe las do rohanta molo tahilala jala tahaporsea i marsangap Goar ni Tuhanta ala ni hita. Alai torang do taboto na so tau hita patupa i, ai ganup ari do sai diunjuni, dielaela sibolis i hita, gabe marlea Debata. Alai asa boi ngolunta i gabe pujipujian tu Debata, ingkon tarumari dirinta, sai pasiat Jesus tongtong bongot jala mian di rohanta, gabe tardok hita ma: Ndang ahu be na mangolu i nuaeng; alai Kristus do na mangolu dibagasan ahu (Gal. 2:20) Ala ni sai mian ma hita tongtong dibagasan Jesus. Amen.

 

Sinurathon ni: Pdt. Swingly Sihotang, S. Th

JAMITA JUMAT AGUNG: TUHAN JESUS MATE DIPARSILANGHON (JOHANNES 18:38b-19:1-16a)

Patujolo:

Di ari sadari on, marningot do hita di hamamate ni Tuhan Jesus hirahira 2000 taon na salpu di Dolok Golgota, Jerusalem. Ganup taingot hamamate ni Tuhanta i, pintor lungun jala gondok do roha, torop hita na tarilu ala taingot godang ni sitaonon ni Tuhanta i. Hape hinorhon ni holong ni roha do umbahen na ro Ibana sian banua ginjang tu portibion laho patupa haluaon di na sa na manghaporseai Ibana. Di taon Tuhanta i godang sitaonon jala diparsilangkon Ibana ndada alani dosaNa tung alani dosa ni hita jolma do. Marhitehite Jamita on didok Hata ni Debata do tuhita, Thema:

“TUHAN JESUS MATE DIPARSILANGKON”

Ilustrasi 

I.       Hinorhon ni dosanta do Ibana mate diparsilangkon.

Ndang piga na mangantusi boasa Tuhan Jesus mate diparsilangkon, tarlumobi ma diangka jolma na so porsea, ai haotoon do dinasida hata taringot tu silang i (1 Korint 1:18a). Pingkiran nasida do dipangasahon ndada Hata ni Debata. Molo tapaihutihut pangalaho ni angka halak Jahudi, sibotosurat dohot angka Parise marsitutu do nasida manulak Tuhan Jesus. Ai dang diparhatutu nasida Jesus do Mesias na pinarbagabaga di Padan na Robi. Ndang tarjalo nasida hadirion ni Tuhan Jesus songon na niida nasida sandiri tu na hinirim nasida. Ai songon raja Daud na mangarajai di Israel do diroha nasida hadirion ni Mesias i na manaluhon torop bangso marhitehite porang dohot na sanggup pamatehon si Goliat nagogo i, panglima soldadu ni Palistin. Ujung na ditulak nasida Tuhan Jesus huhut ingkon marutang hosa Ibana ala didok Anak ni Debata Ibana (ayat. 7).

Songonon ma pangalaho ni halak na mangasahon pingkiranna mamingkiri ulaon ni Debata ujungna gabe lipe. So tarpingkiri jolma sangkap dohot ulaon ni Debata di portibion. Ingkon sadar do hita ia hita jolma na tinompa ni Debata jala jolma pardosa, terbatas do kemampuanta jala dang tarpingkiri hita sangkap ni Debata. Molo tapaksahon pingkiranta ingkon sega sude jala hita sandiri pe gabe luangan, luangan sian pasupasu ni Tuhan, luangan sian haluaon na pinarade ni Tuhanta. Dijolo ni turpuk on nunga sai disukkuni si Latus taringot tu hadirion ni Tuhan Jesus, didok do: “Asa Raja do Ho”? dung i di alusi Tuhan Jesus ma ibana: “songon na nidokmi ma tutu. Raja do Ahu! Umbahen na tubu Ahu jala umbahen na ro Ahu tu portibion, asa huhatindangkon hasintongan i. Ganup na sian hasintongan i tangihonon ni i do soarangku” (ayat. 37). Dipahusorhusor si Latus do alus ni Tuhan Jesus, asa dihatahon do hatana tu halak Jahudi mandok: “Ndang jumpang ahu manang dia salana” (ayat. 38b). Alai sai margogo do halak Jahudi i na ingkon uhuman Tuhan Jesus jala diparsilangkon, dungi dipasahat si Latus ma Tuhan Jesus tu halak Jahudi huhut didok muse: “ai dang jumpang ahu salana” (19;6). Dung songon i didok si Latus do muse tu halak Jahudi: “alai tahe, somal hupalua sada halak tu hamu jumpa Paska i. Anggo na lehet di rohamu, hupalua ma Raja ni Jahudi i tu hamu? Alai dijouhon halak Jahudi i do si Latus, unang Ibana, si Barabas ma (ay. 39-40).

Si Barabas, sahalak na tarhurung, ala memberontak tu pamarenta Roma. Alai tagonan ma di halak Jahudi paluahon sahalak pamberontak asa siboan Hasintongan dohot Haluaon di portibion. Songonon ma molo nunga dipapitung portibion roha ni jolma, tung so diboto be manimbangi dia na denggan sian na roa, ingkon pasidingonta do pangalaho sisongonon sian tongatonganta. Dung so siat hata ni si Latus tu halak Jahudi, pintor disuru si Latus ma soldadu na mangalinsingi, diampehon ma tu simajujung na tumpal (mahkota) sian sungsangduri, dipastapi dungi dipasahat ma tu halak Jahudi. Dung i didok angka sintua ni malim dohot naposo ma tu Tuhan Jesus, asa diparsilangkon Ibana, manggogo do halak Jahudi asa diuhum Tuhan Jesus marhitehite na diparsilangkon. Sai naeng do paluaon ni si Latus Tuhan i sian paruhuman i, alai mansai gogo do dijouhon halak Jahudi na ingkon diparsilangkon do Ibana, ayat. 16. Dungi dipasahat ma Ibana tu nasida, asa diparsilangkon”. Tutu situtu do Tuhanta i diparsilangkon jala mate di hau pinarsilang i do Ibana. Jala pigapiga hali didok Tuhan Jesus tu angka siseanNa, ia anak ni jolma i ingkon godang do sitaononna, ingkon bolongkonon ni angka sintua dohot malim dohot siboto surat do ibana, laos pusaonna do; dungi mulak mangolu di ari patoluhon (Markus 8:31). Sai adong do parpoda na asing, na mangalipehon barita parsilangon ni Tuhan Jesus, adong do mandok ndang tutu Tuhan Jesus na diparsilangkonna i, sahalak sian siseanna do. Adong do mandok ndang tutu mate Tuhan Jesus di hau pinarsilang. Sude angka na mamodahon sisongonon angka sibolis do i angka na mansoadahon Hata ni Debata.

II.     Alai Hagogoon ni Debata do parsilangon i, paluahon na sa na porsea.

Disurirangkon panurirang Jesaya do taringot tu ulaon dohot sitaonon ni Mesias i di portibi on manghophop hita jolma. Jesaya 53:4-5 “tongon do angka sahitta diusung ibana, jala angka pardangolanta diporsan; alai anggo rohanta mandok: Debata do maminsang, mamungkul dohot pasipal Ibana. Hape ala ni pangalaosionta ibana tartullang, binahen ni hajahatonta Ibana mabugang. Ampe tu Ibana pinsangpinsang parhitean ni hasonanganta, jala binahen ni bugangNa malum itahilala”. Hamamate ni Tuhan Jesus di hau pinarsilang, gabe hamamalum jala pasupasu di hita na manghaporseai Ibana. Sahitta, bugangta, pardangolanta dohot pangalosionta diporsan Ibana sude dihaupinarsilang. Tung soadong boi hita paluahon dirinta sian sahitta i, i do dosa i (Roma 3;23). Manang alani haburjuonta, manang alani ringgasta mangulaulaon, manang alani silehonlehonta (amal) manang alani aturanaturan ni jolma na tadalanhon isarana: mamantanghon angka sipanganon manang siinumon, martapa (askese).

Sude aturan ni jolma tung so boi paluahon hita sian paruhuman alani dosanta, sisiasia do i. Ai upa tinuhor ni dosa do hamatean (Roma 6:23). Molo tung adong na mangasahon gogona manang haburjuonna asa malua ibana sian paruhuman i gabe lam bagas do ibana madabu tu bagasan dosa. Tudos ma i songon sahalak jolma na masuk tu gambo lisop, lam digogo asa malua sian gambo i, lam tu bagasna ibana lonong. Holan Tuhan Jesus do na tuk paluahon hita; na badia, na bonar, jala na sintong do Ibana. Dipasahat ngoluna tu hamatean di hau pinarsilang i, tanda holong ni rohaNa di hita jolma asa unang tu hamagoan do hita alai asa tu hangoluan saleleng ni lelengna hita sude angka na manghaporseai Ibana (Joh. 3:16). Hamamate ni Tuhan Jesus di hau pinarsilang i do hagogoon ni Debata manaluhon huaso ni sibolis, manaluhon sorop ni hamatean i jala paiashon hita sian dosanta. Nunga rade hasesaan ni dosa di hita, jala nunga rade hamonangan di hita dipatupa Tuhan Jesus, ro ma hita tu Ibana.

III.   Ai dijouhon Debata do hita manghaporseai Tuhan Jesus na tarsilang i.

Dibagasan Parsilangon ni Tuhanta, nunga sidung sude angka utangta, jala dipamalum nang angka sahitta, sude tahe dohot angka pardangolanta nunga diporsan Ibana. Di jouhon Tuhan i do hita asa ro hita tu Ibana. Didok Tuhan Jesus: “Ro ma hamu tu Ahu, hamu angka na loja jala na sorat, asa hupasonang hamu! Jangkon hamu ma augangku, marguru ma hamu tu Ahu, ai na lambok do Ahu jala na serep marroha, asa dapotan hasonangan tondimuna. Ai lambok do augangku jala neang do dohot na hupaporsanhon”. Ndang na laho manusai hita Tuhan i, jala ndang hea disangkapi Tuhan i mambahen hinamago tu hita. sangkap nadenggan do disangkapi. Unang be jua panjouon ni Tuhan i, ditingki parasirohaon on, lehon roham dohot ngolum paubaonNa asa jumpang parbue na denggan di ngolum. Amen.

 

Sinurathon ni: Pdt. Jon Albert Saragih, M. Th

JAMITA REMINISCERE: IHUTHON MA TUHAN JESUS SIAN NASA ROHAM (MARKUS 8:27-38)

Patujolo:

Nunga lam mangerbang barita nauli i, hinorhon ni pamaritahonon ni Tuhan Jesus di na humaliang Galilea. Lam tarbege do goar ni Jesus di tongatonga ni angka na torop jala lam popular gabe adong ma roha nasida laho mengangkat Jesus gabe Raja di portibion. Di pihak na asing angka Parise dohot Siboto surat nunga lam sogo rohana di Jesus, songon i muse Raja Herodes nunga jut jala humasusa ibana ala popularitas ni Tuhan Jesus nunga tung dao di ginjang ni ibana sandiri. Situasi on mambahen konstelasi politik memuncak na gabe ancaman tu Tuhan Jesus sandiri, hape ulaon ni Tuhan Jesus di portibi on ndang sidung dope. Ido umbahen adong 4 hali ingkon menyingkir Jesus sian Galilea laho tu tungkan timur ni tao Galilea (Mark 6:31-56), tu Tirus dohot Sidon (Markus 7:24-30), tu Dekapolis (Markus 7:31-8:9) dohot tu Kaisarea Filipi (Markus 8:10-9:50). Di tingki on ma pelayanan utama ni Tuhan Jesus mangulahi muse mangajari angka sisean i taringot tu hadirionNa sandiri (Na sinuru ni Debata), hamamateNa dohot haheheonNa suang songon i nang haroroNa muse di hasangapon i. Marhite perikop jamita di ari sadarion dijouhon do tu hita ganup: Thema:

“IHUTHON MA TUHAN JESUS SIAN NASA ROHAM”

Ilustrasi 

I.     Ai ndang ditanda portibion na sinuru ni Debata.

Nunga sahat Tuhan Jesus tu huta Kaisarea Filipi. Di huta on i ma inganan na mansai penting ai dison diakui do Kaisar i, i ma Tuhan. Di huta on pe dison do tong inganan dohot pusat ni hasipelebeguon ai dison masa do manuhor ganaganaan (patung patung) sisombaon. Jadi sungkunsungkun ni Jesus di tongan dalan i tu angka sisean i tung mansai taringot tu ise (hadirion) ni Jesus mansai toho do tu situsi na masa i. Dipungka Jesus do marhite sungkunsungkun taringot tu pandohan ni halak tu Ibana. Somal do sungkunsungkun sisongon i dimasyarakat Mediterania Purba (kuno). Di hatiha i, ia pengakuan manang identitas ni sasahalak ndang ro sian dirina sandiri, alai sian na torop (masyarakat/komunitas). Alani identitas/hadirion ni sasahalak ingkon tangkas do dihatindangkon angka jolma na asing. Alai nang pe diboto Tuhan Jesus alus ni sungkunsungkunNa i tu sisean i naeng do botoon ni Jesus aha pandohan ni halak taringot tu Ibana (ayat 27-28). Penilaian ni natorop na mandok Tuhan Jesus i ma si Johannes Pandidi, si Elia dohot sahalak sian angka panurirang. On ma pataridahon na so ditanda nasida do Jesus i hape Ibana do na sinuru ni Debata paluahon hajolmaon.

Diuduti Tuhan Jesus do manungkun angka sisean i huhut mandok: “Ia hamu, ise do Ahu didok hamu? (ayat 29). Dialusi si Petrus do Ibana: “Kristus i do Ho “. Dimatius 16:16 tumangkas do pangkatindangkonon ni si Petrus ai didok ibana: “Kristus (Mesias), Raja na pinarbagabaga i do Ho, Anak ni Debata na mangolu“. Dison dipatuduhon si Petrus do pengakuanna tu Tuhan Jesus, na mansai songkal do Tuhan Jesus ai Ibana do na pinarbagabaga ni Debata. Jala pengakuan i ndang tubu sian roharoha ni si Petrus sambing manang na pinapatar ni daging dohot mudar alai sian Debata Ama na di banua ginjang i do (bnd Mat 16:17). Nian sian mula ni angka sisean i pajumpang dohot Jesus, nunga dihaporseai nasida Jesus i do Mesias (Joh 1:14). Alai di hatiha i pangantusion nasida di Mesias i, i ma Mesias sebagai pemimpin politik.

II.   Dipapatar do sitaononNa laho paluahon portibion.

Secara perlahan, dipatandahon Jesus do hadirionNa tu angka sisean. Dipataridahon do huasoNa di na pinamalumNa na nengel di Dekapolis (Markus 7:30-37). Songon i muse na binuha ni Jesus mata ni na mapitung di huta Betsaida (ayat 22-26) laos i ma na lam mambuka mata haporseaon ni si Petrus dohot sisean na asing manghaporseai Tuhan Jesus, Mesias na sinuru ni Debata. Alai nang pe songon i, panandaon nasida i, ndang apala haru torang dope. Memang nunga diakui si Petrus, ia Jesus i, ima Mesias, alai ndada Mesias na marsipal, na mate di hau pinarsilang (bnd 31-32). Ai ditingki dipungka Jesus mangajari nasida huhut paboahon sitaononNa na ingkon mate tarsilang jala mate Ibana alai mulak mangolu di ari patoluhon, manigor diarahon si Petrus do Jesus jala disaritai huhut didok: “Asima roha ni Debata di Ho, Tuhan! Unang ma songgop i tu Ho” (Mat. 16:22). Alai dipinsang Jesus do konsep berfikir si Petrus na sala i, didok ma: Laho ma ne ho, bolis! Gasip do ho di Ahu, ai ndang na diparrohahon ho angka na di Debata, angka na di jolma do (Mat. 16:23).

Ai ndang di suru Debata AnakNa i tu portibion asa laho pasonangkon dohot pasombu hagiot ni hajolmaon. I do umbahen diorai Tuhan Jesus angka sisean i unang dipaboaboa na Ibana do Mesias. Ai ringkot do panandaon dohot pengakuan na tangkas sian jolma ise do Tuhan Jesus di ngoluna sandiri asa unang sala motivasina mangihuthon Jesus. Ai nang sahat tu tingkion pe adong dope na sala pangantusion na taringot tu Jesus ai panandaon nasida di Jesus i holan sebatas paluahon sian angka kesulitan dohot na mangalehon kebutuhan seharihari. Tu angka jolma na songon on ma pandohan ni Apostel Paulus di I Korintus 15:19: “Anggo holan di tano on hita mangkirim di Kristus i, jolma na dumangol do hita sian saluhutna.“ Hape na ro do Jesus laho manalesehon masalah na mendasar (fundamental) ni hajolmaon i ma asa salese (lunas dibayar) utang dosa i marhite pangkophopon ni Tuhan Jesus di hau pinarsilang i.

Haroro Na tu portibion, tangkas do laho paluahon jolma sian utang dosa dohot hamatean i marhite partinaonan di hau pinarsilang i. Hita pardosa do nian na ingkon gantung di silang i alai Ibana do manggantihon hita. Alani hamamateNa i, i ma hamamate pengganti (Vikaria). Ai on do dipatupa Debata: Humophop hita gabe dosa Ibana, na so tumanda dosa, asa gabe hatigoran ni Debata hita dibagasan Ibana (II Korint 5:21). Adong ilustrasi taringot tu hamamate penganti (vicaris death). Cerita rakyat di Afrika manggombarhon sada induk ni manuk na terjebak dohot angka anakna di tonga ni ramba. Dijoui induk ni manuk i do angka anak na i jala ditabunihon tu toru ni habonghabongna. Dihokhop do angka anak nimanuk i sian gor ni api sahat ro di na mintop. Dung mintop api i, ruar ma angka anak ni manuk i sian toru ni habonghabong i, ianggo induk ni manuk i mate do ala api na sai gor i, alai anggo angka anak ni manuk i mangolu do. Suang songon i ma holong ni Debata na so halompoan i, na manguhum Tuhan Jesus siala ni dosanta ingkon pola mate Ibana di hau pinarsilang i asa mangolu hita angka na hinokhopNa. Sian i ma tandaonta Ibana do na tutu situtu Juru Selamat (Almasih).

III.  Asa na giot mangihut Jesus, ido paluaonNa.

Sian ayat 34-38 on ma udut ni pandohan ni Jesus na ingkon marsipal jala mate Ibana manghophop portibi on. Asa ganup halak na mangihuthon Kristus ingkon do naung mamolus sitaonon ni Jesus ima mansoadahon diri jala manuhuk silang i. Silang, i ma lambang ni sitaonon. Mansoadahon diri, i ma lambang ni haserepon manaon na hansit ala ni barita nauli i nang angka dongan pe. Di ayat 35 on pandohan ni Tuhan Jesus: “Ai na naeng paluahon hosana, mangagohonsa do; alai na agoan hosa ala ni Ahu dohot ala ni barita nauli i, i do paluahonsa”. Sian pandohan na dua i songon na paradoks (bertentangan) do idaon molo sian pangantusion hajolmaon. Alai sasintongna. Ia pandohan na parjolo: “Na naeng paluahon hosana, mangagohonsa “. Lapatanna: Ia na naeng paluahon hosana i ma sikap na sai berusaha hangoluan/hahipason ni pamatang asa unang tu hamatean. Halak na sai naeng merasa aman (secure), melindungi dirina asa di ibana angka arta, hahipason, hasangapon na di tanoon di ujungna mangagohon ngolu salelenglelengna. Alai sebalikna pandohan: “Alai na agoan hosa ala ni Ahu dohot ala ni barita nauli i, i do paluahonsa” Lapatanna: Angka jolma na mangalehon hibul dirina, ngoluna tu Debata jala na rade agaon hosa ala ni Kristus dohot barita nauli i, i do na na manjalo, manaen ngolu na sumurung i. Nunga di ibana antong pandohan ni Apostel Paulus i: “Ai Kristus do hangoluan di ahu, jala laba nang hamatean“ (Filipi 1:21).

Sungkun sungkun na mansai ringkot do on di hita ganup parhalaho ni huria tarlumobi pelayan full timer (Pandita & Evangelist GKLI). Beha nunga tangkas pangihuthononta di Tuhan Jesus i?. Nunga hobas hita di ganup situasi nang di hamaolon dohot parungkilon tarlumobi kondisi sosial ekonomi na so adong jaminan di huria i?. Beha tadingkonta do ulaon ni pangkobasion di porlak ni Tuhanta i (HuriaNa i) molo adong angka kesempatan dohot tawaran sian luar na menggiurkan secara finansial manang gabe parkarejo ni portibion? Dia do ummarga di hita Kristus i do manang portibion? Ai aha ma antong gunana di jolma, nang liat portibion di omo, anggo mago do hosana? ai aha do tarlehon jolma bahen tobus ni tondina? (Mark 8:36) Ingot ma, angka na maila/na manadingkon panindangion di ulaon ni Tuhan i, laos songon i do sogot Tuhanta i, maila mangkatindangkonsa di jolo ni Amana i. (bnd 36-38). Antong unang tadingkon Tuhanta Jesus alai ihuthon ma Ibana sian nasa roham asa dohot ho malua. Amen.

Sinurathon ni: Pdt. Dr. Esra Sinaga, M. Mis

 

JAMITA MINGGU INVOCAVIT: ASI NI ROHA DOHOT HASINTONGAN (MARKUS 1:9-15)

Patujolo:

Dijolo ni turpuk on dipabotohon si Markus do taringot si Johannes pandidi na disuru Debata laho patandahon Jesus Kristus, paradehon dalan asa torop jolma mananda dohot mangihuthon Jesus. Sude na marhadomuan dohot haroro ni Jesus Kristus na gabe Sipalua, i ma sangkap hatuaon, ndada na ro sambing. Naung disangkapi Debata do haluaon i dohot denggan, boi jahaonta di Jesaya, jala di angka panurirangon ni panurirang di Padan na Robi. Na ro do si Johannes Pandidi di halongonan jala joujouna di jamitana paboahon: hamubaon ni roha, pandidion, dohot hasesaan ni dosa. Ndang adong sangkapna laho mambuat huaso nang kedudukan na naeng ro i, alai na manindangi do ulaonna tu sude jolma taringot tu Jesus i. Didok ibana: na ro ma na gumogo sian ahu, na hurang tama do ibana paunduk ibana mangkarhari tali ni sipatuna. Aek do dididihon si Johannes; alai Tondi Parbadia do didihonon ni Jesus Kristus.

Tema: Asi ni Roha Dohot Hasintongan

Khotbah Markus 1:9-15

Naung leleng do dibagabagahon Debata na so siaphononNa be manisia i, dihalomohon Debata do pardamean tu saluhut jolma. Boi ma botoonta sian na masa aek na sumar i (air bah) di 1 Musa 9:8-17. Dipaujung do aek i marhite halibutongan di ombun i. Denggan do ingotonta angka na porsea i padan na binabagabagahon ni Debata. Holan Debata Jahowa do na marhuaso mangatasi saluhutna i, naeng do ro hita mangadop Ibana mangido pangaramotionNa tu hita. PangaramotionNa i tangkas do i begeonta jala jahaonta sian HataNa i di Padan Na Robi dohot di Padan Na Imbaru. Jala tangkas do i disurathon di Psalm 119. Marhite na manjaha, mangantusi dohot na mamutihi podaNa, sai jalaoonta do panogunoguon na tangkas sian Debata Jahowa. Mansai torop di partingkian on pangalaho na padaohon ngolunta sian Debata. Berengonta do sian media cetak, nang elektronik, nang di humaliangta torop do jolma ‘korban hidup instan’, naeng sude jolma marsiadu hatop salese ulaonna. Na deba mangolu holan mangalului hasonanganna sambing, naeng do ingotonta ia Debata mangajari hita asa tongtong mangolu di bagasan haserepon ni roha. Diigil sian hita asa tongtong satia mangihuthon Ibana jala boi marparbue mangalehon parbue na denggan, jala gabe pasupasu di tongatonga ni humaliang (Pslm 25:1-10). Sian haporseaon i do hita manghatindanghon dohot gogo, ia Barita na Uli na pinasahat Debata di bagasan Kristus mangalehon haluaon. Haluaon i ndada holan nampuna ni naposo ni Debata na parjolo i, alai boi do sahat tu hita di partingkian on. Na marhuaso do Kristus di sude angka na mangolu, na mangatasi hamatean, Ibana mangalehon las ni roha di tingki mangolu hita nang pe di tingki mangadopi hamatean. Binsan mangolu hita, naeng do tapangke partingkian di ngolu on. Manjalo dohot manomunomu Kristus na marhuaso di bagasan roha, pingkiran nang parangenta pe.

Molo Apostel Petrus manggombarhon haluaon na masa tu si Noak sian aek na sumar i gabe simbol ni pandidion. Sada ulaon na badia marhitehite aek. Di bagasan pandidion, dipasada jala dipatomu do hita dohot Jesus Kristus. Ngolu na robi naung lonong, jala ngolu na imbaru ma dilehon. Pandidion i gabe sada padan do i, alai dibagasan ni i adong haporseaonta na marningot hamatean dohot haheheon ni Kristus. Ingot hita hamonangan ni angka na porsea na dibasabasahon Debata. Hamonangan di haporseaon i gabe paluahon. Di bagasan pandidion adong hamubaon ni roha (Rom 6:3-5; Gal 3:27; Kol 2:12). Uju tapahombar dirinta dohot Kristus marhite pandidion i, dipargogoi do hita asa unang mulak tu hasomalan nang ngolu na robi i. Dipargogoi do hita asa satia nang pe godang angka hamaolon nang ambatambat. Nuaeng angka na tarididi i mangolu di bagasan pangalaho na imbaru, na boi berengon ni na torop. (1 Ptr. 3:18-22). Dipasahat Johannes pandidi do pandidion songon tanda tu halak na marhamubaon ni roha sian angka dosana. Boasa Jesus pasahat diriNa asa dididi si Johannes pandidi? Songon angka panurirang na bolon; Jesaya, Jeremia nang si Hesekiel na mangokui angka dosana. Alai ianggo Jesus ndang mardosa, ndang ringkot di Ibana hasesaan ni dosa. Alai na olo do Ibana dididi di buha ulaon panghobasionNa. Naeng dipatuduhon disi na manolopi ulaon panghobasion ni si Johannes pandidi. Jala dipatuduhon do disi na olo Ibana tudos dohot jolma na mardosa i.

Dipatuduhon do disi serep ni roha na boi parsiajaranta songon angka siihuthon Kristus hita. Solidaritas ni Jesus tu angka na mardosa, solidaritas na di bagasan hasusaan. Jala porlu do ingotonta, ia pandidion ni si Johannes Pandidi marasing do i sian pandidion ni halak Kristen, siala di bagasan bibel i boi jahaonta ia angka sisean ni si Johannes na mangihuthon Apostel Paulus, dididi do muse (Ul.Ap.19:2–5). Ditingki dididi, songgop ma Tondi songon darapati tu Jesus. Ro ma soara sian surgo na mandok: “Ho do Anak haholongan ni rohangku; lomo do rohangku di Ho!” Pandohan on i ma sada panontophon na tangkas sian Debata si Tolusada i di tonga ni portibi on. Udut ni i, ditadingkon Jesus ma sihatoropan i, laho tu halongonan. Diunjuni sibolis, alai ndang na marshuaso pangunjunan i di Jesus (Mat. 4:1-11). Ndada na so hasea pangunjunan i, na so hasea do pangunjunan i molo gabe gale do hita, hohom sambing jala talu. Halak na tang haporseaonna margogo do ibana laho mangadopi pangunjunann i. Sai na luluanna do sangkap ni Debata sian pangunjunan i. Marhite pangaramotionNa, sai pargogoanNa do ibana asa marhamonangan. Tu angka naporsea, sai donganan ni Kristus do ibana laho mangadopi angka pangunjunan nang hamaolon i. Monang ma ibana sian pangunjunan i, jala laos ihut do ibana laho mangurupi jolma asa monang manaluhon pangunjunan i (Heber 4:15).

Nuaeng sahat hita tu turpukta na mangondolhon “Dalan Ni Jahowa: Asi Ni Roha Dohot Hasintongan.” Ala ni i molo naeng malua do hita jala mamasuhi Harajaon ni Debata taparrohahon ma point na mangihut on:

V  Diigil do haporseaon na polin tu Jesus Kristus, i ma sada alus na mansai uli jala denggan di bagasan ngolunta. Jala molo lam bagas tapahusorhusor laos i do unok ni haporseaon ni halak Kristen. Tingkina naeng jonok nama Harajaon ni Debata, asa marhamubaon ni roha jala manghaporseai Barita na Uli.

V  Ia padan ni Debata naung digohi marhite haroro ni Kristus. Marhite ulaon ni Kristus dipatuduhon do huaso ni Debata na manggomgomi songon Raja. Haroro ni Jesus tu angka na maheu, na loja, na sorat, na so marpangkirimon, manogunogu, mangalehon haluaon, hatigoran dohot panghirimon na imbaru. Hita angka na porsea nunga manjalo padanNa i jala dipargogo i laho patulushon ulaon ni Kristus ditongatonga ni portibi on siala naung dipadame do hita dohot Debata.

V  Asa gabe anak halomoan ni roha ni Debata hita songon Kristus, naeng ma olo hita pararonNa gabe sitotas dalan tu angka jolma asa marhamubaon ni roha torop halak jala porsea dohot mangihuthon Jesus. Songon Jesus na olo solider di didi laho manean hadosaon ni jolma. Naeng ma olo hita solider manang perduli di hadosaon ni dongan jolma asa ditundalhon dosana. Tapatutoru ma dirinta jala tapaserep asa boi jala mampu hita manogunogu torop halak porsea di Kristus Jesus.

Minggu Invocavit: Jounonna ma ahu, jadi alusanhu ma Ibana. Angka jolma na sai joujou tu Debata i ma na marhamonangan. Angka naung tardidi dibagasan Goar ni Debata Ama, Anak dohot Tondi Parbadia, ndada na gabe malua sian angka hamaolon, pangunjunan, sitaonon dohot angka na bernit. Alai sai na joujou do angka na porsea i tu Debata dibagasan tangiangna asa tartaon ibana saluhutna i, sabam rohana jala benget manaon ihut sai tongtong dijuggulhon mangulahon Hata ni Debata. Songon Jesus i, dung dididi sahat do diboan Tondi i tu halongonan na gok angka tantangan sian cuaca, iklim, situasi ni angka binatang na liar nang sian sibolis pe na mangunjuni ibana. Laos songon i do adopanta dipardalanan ni ngolunta godang angka tantangan sian lingkungan nang pangunjunan sian sibolis i. Asa ndada sangkap na roa nang tu hamatean sangkap ni Debata alai tu hangoluan di siala Dalan ni Jahowa i ma Asi ni roha dohot Hasintongan. Tudos songon na tarsurat di Jeremia 29:11 “Ai nunga tangkas huboto sangkap angka na husangkapi taringot tu hamu, ninna Jahowa, sangkap hasonangan do tahe ndada tu hamagoan, asa ahu mangalehon tu hamu ujung na hinalungunhonmuna.” Dohot di turpuk evangelium minggunta. Pslm 25:10: “Asi ni roha dohot hasintongan do sude dalan ni Jahowa di angka na mangaradoti padanna dohot angka panindangionna. Siala ni i molo songgop na bernit i, naeng ma angka naung porsea jala tardidi i sai tongtong manghalungunhon Jahowa (Pslm.25:1) asa dapotononna hamonangan i. Amen.

 

Sinurathon ni: Pdt. Natal Sahat M. Sihombing, M. Pd

 

JAMITA MINGGU QUINQUA GESIMA: TANGIHON JALA BARITAHON MA HATA Nl DEBATA TARINGOT TU JESUS (MARKUS 9:2-9)

Patujolo:

        Turpuk Evangelium on, Jesus rap dohot siseanNa, i ma si Petrus, Yakobus dohot si Johanes, na tongon di sada dolok na timbo. Tingki di dolok i, diida siseanNa i do Jesus muba do rupaNa, muba do ulosna gabe marsillam, bontar situtu, na so dapot ni angka panunsi di portibi on mambahen bontar songon i (transfigurasi) jala huhut diida angka sisean i Jesus manghatai rap dohot angka Naposo ni Debata, i ma si Elia dohot si Musa (Mark. 9:2-4). Elia i ma sahalak panurirang na mansai balga di tongatonga ni bangso Israel na patut tiruan angka bangkona. Songon i nang si Musa, na manguluhon bangso Israel ruar sian parhatobanan Mesir jala na manjalo patik na sampulu i, na marondolan di holong ni roha i tu Debata dohot tu dongan jolma.

        Petrus, sisean na marnida tangkas angka na masa (transfigurasi) di dolok i hatahutan situtu namanghorhon gabe so diantusi be mandok hatana tu Jesus, baliksa marsangkap sisean i pajongjonghon soposopo tolu, sada di Jesus, sada di si Elia, sada nang di si Musa (Mark. 9:5-6). Jala ndung dipasahat si Petrus angka sangkapna i, ro ma ombun mangalinggomi nasida huhut manghuling ma soara sian bagasan ombun imandok: “ on do Anak haholonganku, tangihon hamu ma Ibana.” (Mark. 9:7). Dung salpu Pangkuling namanghorhon halongangan i, jala dung manaili angka sisean i, ndang adong be diida nasida dungkon ni sahalak Jesus na ma disi. Tontu panghuling/soara i patandaphon hadirion ni Jesus. Parjolo, paboa sitangihononhon do Jesus i ala HadebataonNa, Ibana ma tutu Anak ni Debata. Paduahon, di na lao tuat nasida sian dolok i, dihatingdanghon Jesus i sandiri do dirina Anak ni jolma. Jala gomos do angka sisean i dipopai Jesus asa unang dipaboa angka na niidanasida na manghorhon halongangan i ia so jolo hehe Anak ni Jolma i sian na mate (Mark. 9 :8-9). Damang dainang na hinaholongan! Hombar tu turpuk on, tangkas taida dua horong panghuling namanghatindanghon taringot tu Jesus i. Alani tasurathon ma parjojor ni Evangelium on, ima, Thema:

“TANGIHON JALA BARITAHON MA PANGHULING/SOARA/HATA Nl DEBATA TARINGOT TU JESUS”

Transfigurasi Yesus

I.         Ala Jesus Do Sipalua Hajolmaon.

Jesus Do Mesias Naung Sinuru Jala Miniahan Ni Debata. Halongangan na masa di dolok i, ima ala panghuling sian ombun na patandaphon hadirion ni Jesus, ima ha-Debataon-Na dohot ha-Jolmaon-Na. Na masa di dolok i, songon na masa uju ro Pardisurgo jala marpanghuling di na naeng gabegabean simaria, nang di na dung tubu Jesus. Jala di na patupahon angka ulaonNa di portibi on, parbanua ginjang tongtong manghatindanghon hadirion ni Jesus na gabe Mesias, nata pe portibi on tontong targasip mida Jesus, suang songon i angka partogi ni bangsoNa sandiri Israel, jotjot targasip sahat tu namanaon haporsuhon ro di na mamparsilanghon Jesus i (Luk. 4:16-30). Alai tudos tu si Elia dohot si Musa, Jesus i do na sinuru dohot na miniahan ni Debata. Ibana ma tutu Anak ni Debata huhut Anak ni Jolma i, napaluahon bangsoNa jala namamorsan dosa ni portibi on.

Di turpuk on tung tangkas situtu do tarida, Jesus imanghatinghon diriNa na gabe Anak ni Jolma. Na marlapatan ma i, sian pardagingon hajolmaon, Ibana pinompar ni si Adam na parjolo, na gabe Kristus manang Mesias na miniahan. Pandohan taringot tu Anak ni Jolma, adong do 86 hali dihatahon di Bibel Padan Naimbaru, na manghatindanghon Jesus i, paboa na serep marroha do Ibana na gabe dos di angka parsaoran tu jolma pardosa (solider). Alani ingkon sitangihononhon do Panghuling/Soara ni Jesus ala Ibana sandiri do tutu, daging na gabe Hata i (Joh. 1:14. Jesus do Debata Jahowa na ro tu portibi on marrumanghon Jolma Manisia. Tandap do ha-Debataon-Na i tarida di sasude parngoluonNa dohot di angka panghobasionNa. Saleleng patupahon angka ulaonNa, Ibana ma tutu nagabe Panurirang, Malim huhut gabe Raja. Jesus i do na ingkon sitangihononhon SoaraNa ala Ibana do nahinalomohon ni Tuhan i (Mat.3:17, Mark. 1:11, Luk. 3:22, Joh. 1:32-34) jala di na laho marsitaonon na mansai bernit tu Hau Pinorsilang i, sai dipasangap par Banua Ginjang do Jesus (Joh. 12:7-30).

Songon i nang di Bibel Padan Narobi, nungga tibu disuriranghon taringot tu hadirion ni Jesus, ima na gabe Immanuel (Jes. 7:14). I do umbahen na mansai denggan sun diulahon Jesus angka ulaonNa, ala Ibana do Debata huhut Jolma situtu. Songon si Elia na maralo tu angka hajahaton. Nang songon si Musa na mamboan bangsoNa ruar sian parhatobanan. Songon ima nang Jesus na gabe Mesias na paluahon bangsoNa ruar sian parhatobanan ni dosa; si bolis na jahat i, tarlobi namanaluhon hamatean na jorbut i. Jesus, Mesias naung sinuriranghon di Padan Narobi (Jes. 9:1-7; 61; 62) jala na hinatindanghon di Padan Naimbaru (Mat. 16:16; 26: 63-68; Mark. 8:29; 14; 61-62, Luk. 2:26-27; 4: 41; 9:20; 22:67-71; Joh. 1:41-42; 10:24-30; 11:27; 20:31; Kiss. 2:31; 3:18; 5:42; 8:5; 9:22; 17:3; 18:5,28; 26:23; Rom 9:5). Jesus ima tutu Mesias, natape diparsilangkon, alai Jesus i do na gabe mual ni Haluaon dohot mual ni Hangoluan di angka jolma pardosa na tumangihon Hata ni Jesus. Jesus i do Mesias naung manaluhon sorop ni si bolis i.

II.      Ala Nengel Portibi On Dipanghuling/Soara/Hata Ni Jesus

Umbahen na nengel jolma manisia Songon si Petrus Uju Pardosa. Si bolis manang huaso ni dosa sai tontong do mamangke angka partingkian lao mangunjuni jolma manisia asa nengel maradophon Panghuling/Hata ni Jesus. Tung sudena do tahe pangkeon ni na jahat i angka sarana dohot prasarana na adong di parngoluan ni jolma saleleng mangolu di portibi on. Tarlobima si bolis i na sai tontong mangarajai roha, pingkiran, pamatang manang pardagingon ni jolma manisia asa unang olo tumangihon Hata ni Jesus, nagabe Mesias Sipalua Hajolmaon i. Di angka turpuk Evangelium na asing, tardok do si Petrus sahalak sisean na nengel manang na so tumangihon Panghuling/Soara ni Jesus ala sai dipangasahon ibana angka na di bagasan dirina sandiri. Pangalaho manang bangko si songon i, tontu sian si bolis na jahat i asa si Petrus dohot sisean na asing asa unang mangantusi paboa Jesus do Mesias Si palua hajolmaon i. Ndang adong na sintong na hinatahon ni si Petrus i taringot tu Jesus. Hape gariada ingkon do manaon na bernit Jesus i di Hau Pinarsilang, jala mulak mangolu sian angka na mate (Mat. 16:23; Mark. 8: 3). 

Songon i ma di bagasan jamita on, molo taida sambolus di turpuk on, boi do tarida tangkas si Petrus i, na jotjot singkat ni angka sisean pasahathon angka pandohan. Hinorhon ni biar ni rohana di angka na masa di dolok i (transfigurasi) umbahen didok si Petrus tu Jesus i paboa na mansai denggan do nasida di dolok i, huhut sisean imarsangkap paulihon soposopo tolu, ima sada tu Jesus, sada tu si Elia dohot sada tu si Musa. Alai ndang dialusi Jesus i si Petrus. Gariada ro Panghuling/Soara sian ombun i namandok: “On do Anak Haholonganku, tangihon hamu ma Ibana “ (Mark. 9:7). Di situasi na songon i, tangkas taida si Petrus na sai holan tumangihon panghuling/soara manang panggora ni rohana. Petrus mangasahon panghilalaanna dohot pingkiranna sambing. I do umbahen didok ibana tung mansai denggan nasida di dolok i jala marsangkap paulihon soposopo tolu marhite napinauli ni tangan ni angka sisean i. Tutu, na nengel do si Petrus hatiha i taringot tu Jesus ima na ingkon marsitaonon do Ibana jala bolusonNa hamatean jala hehe muse Ibana sian na mate (Mark.8:31-38; Luk. 24:46).

III. Sudena Do Angka Naporsea Di Jesus Rade Tumangihon Huhut Patubegehon     Panghuling/Soara/Hata Ni Jesus Di Portibi on Marhite Huaso Tondi ParbadiaNa.

1.     Elia Dohot Musa Gabe Tiruan    

                   Damang dainang, na hinaholongan! Di portibi on, huria/halak kristen naung pinalua ni Jesus sian parhatobanan dosa; sian gomgoman ni si bolis na jahat i ingkon do tontong tumangihon huhut patubegehon Hata ni Jesus di parngoluonna si ganup ari. Sudena i dipatupa marhite bulus ni roha dohot roha hamauliateon, roha na tumanda di holong ni rohaNa. Ibana do na tumaon na porsuk/bernit humongkop angka jolma si pardosa asa malua sian bura ni patik i (Galatia 3:13). Ima siala ni pangalaosion ni angka jolma di patik na sampulu i, ima patik na jinalo ni si Musa di punsu ni dolok Sinai uju i. Siala ni, na ingkon do saluhut huria/halak kristen i tumangihon dohot patubegehon Panghuling/Soara/Hata ni Jesus i di saluhut gulmit ni ngoluna dalan pasangaphon goarNa na marmulia i. Ala naung jinouNa tu hamubaon ni roha jala marpamuati rohaNa mida angka halak pardosa i. Jesus I do namamorsan haporsuhon ala ni dosa ni jolma manisia. Ibana do tumaon na porsuk di Hau Pinarsilang, na mate, jala na hehe sian angka na mate. Alani tung mansai tama do tinangihon jala pinatubegehon angka HataNa na manghorhon Hangoluan i tu saluhut jolma manisia na adong di humaliangta be. Sudena do angka huria/halak kristen ingkon tumiru manang marbangko songon si Elia dohot Musa, dua halak naposo ni Debata na di Padan Narobi na sai tarbarita di angka bangkona. Andorang di ngoluna be, sai tontong do nasida marholong ni roha tu Debata sian nasa rohana be. Jala nang pe jotjot nasida mangadopi angka hamaolan, parungkilon manang parsitaonon alai hot do si dua halak naposoNa on dibagasan habengeton dohot hasatiaon/ haposan tumangihon huhut patubegehon Panghuling/Soara/ Hata ni Debata marhite serep ni roha. Sada sian bangko ni si Elia dohot Musa, nasida on angka naposo naringgas martangiang di ngolu partangiangan marsasahalak. Jala na so tupa olo nasida saurdot dohot angka siula hajahaton. Jala tung mansai bahat situtu dope tahe hasurungan manang bangko ni nasida nadua, si Elia dohot si Musa na dibaritahon di Bibel Padan Narobi, paboa na tung mansai ringgas do nasida marpanungkun dompak Debata, tumangihon jala patubegehon HataNa.

2.     Apostel Petrus, Nagabe Haposan Tumangihon Dohot Patubegehon Panghuling/Soara/Hata Ni Jesus.

Suang songon i di tingki Padan Naimbaru, tardok do angka Apostel, tarlobima i Apostel Petrus. Ima sahalak jolma na hea nengel tumangihon Hata ni Jesus. Alai di angka panghobasionna di pudian ni ari, gabe tarbarita do ibana sisean nahaposan, sahalak Parbarita Nauli namanghatindanghon angka na masa na niidana na manghorhon halongangan, ima di na muba Jesus (transfigurasi) jala di rap Ibana manghatai tu si Elia dohot Musa uju di dolok i (2 Petrus 1:16-21). Jala di pudian ni ari di angka ulaonna tarsongon sahalak Apostel, sian ias dohot serep ni roha, ringgas jala gomos do Apostel Petrus manogihon torop jolma asa olo ma nian tumangihon Hata ni Jesus siboan Haluaon i. Tangkas situtu do Apostel Petrus imanogihon torop jolma asa unang be olo tumangihon angka soara na sian portibi on, baliksa holan natumangihon Panghuling/Soara/ Hata ni Jesus sambing do jala sipatubegehononhon ala Ibana do silehon Hangoluan, asa unang mate di bagasan angka dosana angka pardosa i, alai naeng ma mangolu di bagasan haporseaon tu Debata Jahowa Si Tolu Sada i na tatanda di bagasan Goar ni Kristus Jesus.

IV.             Panimpuli/Penutup

Hombar tu angka hatorangan na di ginjang di evangelium on, ndang margogo huria/halak kristen i di portibi on tumangihon, tarlobima patubegehon taringot tu holong ni roha ni Debata di bagasan Jesus i molo sai tontong dope mian jala mangolu di bagasan roha daging. Tontu sai tontong do nengel hinorhon ni dosa ala sai dipangasahon panghilalaan dohot pingkiran sambing. Baliksa holan marhite Huaso ni Tondi ParbadiaNa i do umbahen margogo angka naposoNa tumangihon jala patubegehon Panghuling/Soara/Hata ni Jesus i di angka parngoluonna si ganup ari. Jala ingkon marhite huaso ni Tondi Parbadia i paluahon torop jolma pardosa marhite Barita Nauli taringot tu Harajaon ni Debata na manjou angka pardosa tu hamubaon dohot hasesaan ni dosa (pat.Lapatan ni Hata Haporseaon ponggol III). Jala manang ise na porsea tu Jesus i asa mulak mangolu muse songon Ibana naung manaluhon hamatean i. Jesus i do tutu silehon Haluaon dohot Hangoluan. Jala songon goar ni Minggunta sadari on, Estomihi, lapatanna sai Ho ma partanobatoan di ahu.

Antong naeng ma saluhutna hita angka nahinaholongan, damang dainang, tarsongon huria/halak kristen   naung   tinobusNa   hita sian pardosaonta, sai tontong dipasupasu Tuhanta Jesus i hita manghaporseai Ibana asa sai olo hita tumangihon jala patubegehon Panghuling/Soara/Hata ni Debata Jahowa na tasomba marhite Goar ni Kristus Jesus. Ibana do Sipalua Hajolmaon, Debata mual ni Hangoluan namanontong i, na manaluhon sorop ni si bolis di portibi on. Amen.

 

Sinurathon ni: Pdt Anton Ben Gurion Hutagalung, S. Th

 

JAMITA MINGGU XIII DUNG TRINITATIS: TINGKOS MA TAHANGOLUHON HATA NI DEBATA (MARKUS 7:1-13)

Patujolo:            

Jotjot do masa angka parsoalan na manghorhon tu jogal ni roha ala so sada pangantusion be halak Jahudi taringot tu haporseaon ala nunga sian mulana nasida hurang tangkas mangatusi isi ni haporseaon i di bagasan ngoluna jala gabe mambahen nasida munafik jala gabe dihasogohon na nidok ni hata ni Debata, ala ni i marhite jamita on di jouhon tu hita, Thema:

“TINGKOS MA TAHANGOLUHON HATA NI DEBATA”

Bibel Bahasa Batak

I.             Asa unang tasegai hata ni Debata Alani hasomalan dohot adatta

II.           Asa tingkos hita songon angka anak ni Debata

III.          Alani i tingkos ma tahangoluhon hata ni Debata

I.            Asa unang tasegai hata ni Debata alani hasomalan/adatta

Mulai dung adong parsaoran ni Jolma di bagas joro dohot Debata di tingki ni panurirang Yesaya nunga tardapot angka pangalaho ni bangso Israel di bagas joro na maralo tu lomo ni roha ni Debata tarlobi ma angka pangantusion na so tingkos taringot tu hata ni Debata ala sopot do masuk angka pingkiran ni bangso na marragam sian hombar balokna na jotjot mambahen tamba ni sipingkiran laho manegai haporsseaon ni bangso Israel.

Ditingki ni Tuhan Jesus dope nunga lam nalnal hajahaton naluar biasa masa di bangso Israel mardomu ala nunga di bahen parise, saduse nang siboto surat angka aturan taringot patik ni Debata na soboi laosan ni bangso i tarlobi ma tu ari sabat dohot angka sipanganon ni nasida asa badia nasida di adopan ni Debata (Yes 29:13), ibarat ugamo silom ingkon 5 hali sadari sembahyang, hinorhon ni i dang be hata ni Debata anggo nanioloan nasida alai gabe umbiar nama tu patikpatik ni halak jahudi sian tu hata ni Debata Alani i ma gabe umbahen barani nasida mandapothon Tuhan Jesus manungkun boasa asing ajaran ni Tuhan Jesus sian na niantusan ni nasida (bnd. Mat. 7:28).

Ndang adong na so mardalan anggo angka panghobasion di bagas joro ibadah, alai na gabe masalah dang sian haporseaon be diulahon alai nunga holan asal ma mardalan tata cara ni ibadah i di bagas joro, ai di jolo ni bagas joro pe nunga tardapot gabe partigatigaan dibahen halak saduse Joh 2:16 na mambahen arsak ni Tuhan Jesus jala muruk, ndada holan i dohot do angka na tardok angka naposo ni Debata sian bangso Israel dipajeajea Tuhan Jesus (Mat. 23:3,13-29). Manganhon sipanganon pe ingkon adong aturan jolo marburi nang inganan ni panginuman pe ingkon sesuai tu aturan ni bangso Israel, songon i muse na manghaholongi natoras alai gabe tumagon do pelehononton tu Debata sian na pasangaphon natoras na mansai ringkot panarihonon tu natoras, Debata na tarida do natoras i songon sinkkat ni Debata marmuduhon anakhonna alai asa songon na marpartodion idaon tumagon dipelehon tu Debata asa mangurupi natoras, ndang adong diorai Debata hita mamelehon pelean tu Debata, alai molo memang ingkon urupanta do natoras na mansai butuh pangurupion na sian hita denggan do urupanta natorasta i Patik palimahon (bnd. Rom. 2:24) asa unang gabe jolma na mapitung hita di adopan ni Debata (Mat. 13: 13-15)

II.           Asa tingkos hita songon angka anak ni Debata.

Hira sude do angka halak partohonan di bagas joro manghilala dirina jolma sihabiari Debata, ala marhobas nasida dibagas joro songon halak lewi, malim dohot sintua ni malim jala nasa aturan ni halak Jahudi singkop do diulahon nasida ala ni i do barani halak parise mandok sijalo beo pardosa (Luk 18:9-14) ala anggo Tuhan Jesus naeng do paulakhon pangantusion ni halak Jahudi tu lomo ni roha ni Debata asa partohap hita diharajaon ni Debata (pat. Joh 3:1-11 pat. Pil. 3:4-15). Ndang dihalomohon Tuhanta Jesus hita mago tu api narokko, Alani i do ro Ibana gabe jolma asa Ibana singkatta tu hamatean anggiat gabe dohot hita parjambar di surgo naung pinaradeNa di angka na porsea (Joh 3:16; Gal. 3:13). Ndang adong di bagasan patik dohot sipanganon anggo haluaon (pat. Rom. 14:15-19) alai holan marhite Tuhanta Jesus do dalan tu hangoluan (Joh. 14:6), jala dihangkam do i di bagasan Tuhanta Jesus marhite haporseaon (Mark. 16:16) ai di bagasan haporseaon i do hangoluan jala marhite haporseaon i do tarida manang ise hita di tongatonga ni hajolmaon II Kor. 4:10.

Ndang dihalomohon Tuhanta Jesus marlaok haporseaonta alai naeng pita, ai pita do holong ni Debata dipapatar tu hita jolma jala naeng hita manundalhon angka patikpatik ni hajolmaon na mandok: ”sambola langit tangiang ni tulang” ndang na sala pasangaphon tulang alai dang adong didok hata ni Debata hata na songon i jala na manambai hata ni Debata do hita disi jala manghorhon muruk ni Debata Pangk. 22:18. Dang natingkos angka na niula ni parise, saduse nang siboto patiki jala maralo doi tu lomo niroha Debata ai dang adong manghorhon tu hangoluan alai manang ise namanghangoluhon hata ni Debata sahat tu ujung ni ngoluna pasti do adong jaminan ni ngoluna tu surgo hasonangan naung pinarade ni Tuhanta Jesus. Amen.

  

Panurat: Pdt. Kilber Simbolon