JAMITA NATAL, 25 DESEMBER 2024: HATUTUBU NI SIPALUA, KRISTUS TUHAN I (LUKAS 2:1-20)

Patujolo:

Selamat hari Natal ma di hita saluhut na.

Ari pesta Natal parjolo ma on di hita huria ni Tuhanta. Lobi hurang Sabulan hita parade siparadeonta manomunomu ari hatutubu ni Tuhanta.  Ta dekorasi do jabunta, garejanta, gok lampu hias, tarbege do angka lagu-lagu natal di angka deba jabunta,  tabahen do pesta-pesta mulai sian angka sikkola minggu, remaja/naposo, ina dohot ama, sude na I patuduhon  tanda las ni rohanta manomunomu ari pesta sadarion. Mauliate ma di Tuhan ala tongtong dilehon dihita semangat  laho manomunomu pesta hatutubu ni Tuhan Jesus, jala sadarion tabege ma Hata ni Debata na mandok;

Thema: Ai naung tubu do di hamu saborngin on, di huta ni si Daud, Sipalua I, I ma Kristus Tuhan i!

I.       Tubu di bara ni pinahan, di Bethlehem.

Di bara ni pinahan do tubu Sipalua I, di huta Bethlehem. Ndada inganan na wajar I bahen inganan  hatubuan  ni anak ni jolma tarlumobi ma anak ni Debata.  Haleaon do I di hita jolma , najolo nang sahat tu tingkion ndang hea begeon masa  tubu jolma di bara ni pinahan.  Ra godang do sukkun-sukkun roha ni jolma boasa bage di bara ni pinahan  Anak ni Debata tubu ?  Adong do manang piga na mungkin alus taringot tu si;

1.         Na so adong be siat bagas  inganan di huta Bethlehem I  di si Maria dohot si Josep ala dihatiha I, sude do mulak hakal Jahudi tu huta na be hombar tu parenta ni kesar Agustus.  Toho marmulakkan do jolma tu bona ni pinasana asa ribur do huta i. Dapot roha do, tuktukhon ni si Josep do angka bagas I alai sude manulak.  Ujung na ala kondisi ni si Maria naung gok ari hangoluanna,  gabe tu bara ni pinahan ma nasida,  di si ma Tuhan Jesus tubu.  Molo songoni do situasi na, tung soadong nanggo tubu perasaan na mangolu di angka jolma I,  tung mate do perasaan nasida, di ida nasida do kondisi ni si Maria na ingkon siurupon nian.  Alai ditutup nasida do pintu ni jabuna nang pintu ni rohana.  Songoni ma torop roha ni jolma ditingkion,  nunga ro Debata dibagasan Tuhan Jesus manopot hita di portibion, alai godang do na manutup rohana.  Torop do sian hita halak Kristen tingkion na so patuduhon las ni rohana di pesta Natal na pinatupa ni huria. Torop ruas na so ro di pesta natal na pinatupa ni angka huria. Nda holan pesta ni dakdanak sekolah minggu do na ni hadiran ni natoras ?  laho marnida gelleng na, pahompuna marsipajojoran ?  nda mekkel do hita molo taida penampilan ni gelleng ta songon na lucu. Boasa molo dipatupa natal ni ina di deba huria, holan ina I do na ro dohot pangula ? songoni natal ni naposo ? Boi do menyimpang tujuan ni pesta Natal di hita anggo so tangkas do tapahusorhusor makna manang tujuan ni Natal I, ujung na dang dapotan hita di pasupasu na nilehon ni Debata di hita, songoni ma hita tongtong hira gabe ruas na so marTuhan.

2.      Napaduahon, hombar tu tradisi ni halak Kristen Amerika, diloas do tu bagas,  alai ala torop ni jolma di jabu I, gabe songon na maila si Maria ujung na dipangido nasida ma bara ni pinahan ni parjabu I, toho dang apala dao sian jabu I. alai bermakna do on, molo songoni do;  Na tutu situtu do Debata patutoru rohana  (Pilipi 2;8) humokhop hita gabe daging dibagasan Jesus. jala on do na nidok ni si Johanes Debata gabe jolma.  ingkon gabe jolma do Debata asa tarjalo roha ni jolma I ulaon ni Debata .  Nataida dison, serep dohot holong ni roha ni Debata manghohop hita.  Ro Ibana, tajangkon ma.

 II.    Ai barita halalas ni roha godang do i.

Tanda do ulaon ni Debata  di hamamasa ni hatutubu ni Tuhan Jesus , nang pe di Bara ni pinahan, nang pe di huta naummemet alai tarida do huaso ni Debata na campur tangan di si. Disuru do surusuruanna laho paboahon hatutubu na I tu angka parmahan di ladang. Ai didok do tu surusuruan I, Unang mabiar hamu; ai barita halalas ni roha godang do huboan tu hamuna, parsaulian ni sandok bangso I (Ayat 10).  Ndang tiala roha mabiar angka parmahan I, ai tompu diida nasida natiur situtu jala marsinondang diborngin na holom. Nunga tarontokhon nasida, mungkin diroha nasida adong naeng manangkup jala mamusa nasida. Mungkin adong naeng manangko dorbia nasida. Bangko ni na mabiar do tubu roha na negative.  Songon hita do I, ai molo sai mabiar hita diparngoluon on, ikkon tubu rohanta manang pikiran na negative di hita, ujung na gabe madabu hita tu bagasan dosa. Ai tapingkiri do na so sipingkiranta. Tapingkiri mangalatei dongan, tapingkiri manusai dongan, tapingkiri paroarohon dongan.  Di na mabiar angka parmahan I, pintor didok surusuruan I do dihatana “ Barita halalas ni roha godang do huboan tu hamuna, parsaulian ni sandok bangso i.  ai naung tubu do dihamu sabornginon di huta ni si Daud, sipalua I, ima Kristus Tuhan i. (ayat 10-11).

Hatutubu ni Tuhan Jesus I do barita halalas ni roha godang di hita, ala marhitehite hatutubuNa ungkap dalan tu surgo di hita jolma na porsea (Yoh 14;6) “ Didok Tuhan Yesus “ Ahu do dalan I, Ahu do hasintongan jala ahu do hangoluan I, dang adong na sahat tu Ama ia so marhite Ahu”. Presiden Jokowi di halomohon  bangsonta jala torop jolma namandok projo (projokowi) alani angka pembangunan tarlumobi pembangunan jalan Tol di negaranta.   Tuhanta patupa dalan tu surgo di hita, dalan na soboi patupaon ni jolma alai dipauli dalan dihita bahen hangoluanta sisaleleng ni leleng na, las ma rohanta mida Tuhanta jala taihuthon ma Ibana huhut tapasangap Ibana tongtong dingolunta.

 III.   Ta pasangap ma Debata

Dipuji angka torop pardisurgo Debata alani pambahenan na di portibion. Didok surusuruan I “ Hasangapon ma di Debata di ginjang, dame ma ditano on, diangka jolma halomoan i. Kewajibanta do pasangapho Debata, ala holan Ibana do Debata situtu, Debata nabadia, Debata sitompa langit dohot tano on, ro di na sa isina. Molo tapasangap Debata, ingkon na turut do hita tu parenta Na huhut mangulahon lomo ni rohaNa. Taida dison pigapiga namangalehon rohana pasangaphon Debata;

1.       Angka parmahan; dung didok surusuruan hata I” pintor laho do nasida tu Betlehem gabe jumping nasida do disi si josep dohot simaria nang posoposo na peak dipanggatan I huhut dibaritahon nasida do boaboa naung dihatahon tu nasida taringot tu dakdanak I (ayat 16-17).

2.         Si Josep : tetap setia mandongani si Maria nang  pe godang pergumulan, tangtangan alai setia do si Josep mandongani si Maria.

3.     Si Maria: didok di ayat 19 “ di peop do hata I sudena jala dipahusorhusor dibagasan rohana. Sitiruon do on dingolunta, on do parbue ni haporseaon I dihita tanda na setia hita pasangap Debata. Selamat hari Natal ma dihita, dipasupasu Tuhanta ma hamu saluhutna. Syalom.