JAMITA TAON BARU 01 JANUARI 2025: RO DO TUHANTA MANDAPOTHON HITA (LUKAS 2:22-40)

Patujolo:

Jumolo hami Pucuk Pimpinan dohot sude parhobas di Kantor Pusat ni hurianta pasahathon tabe huhut selamat taon baru 01 Januari 2025, tu hamu amanami, inanami; Pandita, Evangelis, Majelis Pusat, Guru jemaat, Sintua dohot sude ruas ni huria. Puji-pujian dohot mauliate ta pasahat tu Tuhanta disiala asi dohot holong ni roha-Na na manogunogu hita mamolus taon na buruk i, sahat hita tu taon na imbaru on. Ndada ala ni gogonta umbahen na sahat hita mamasuki taon na imbaru on tung ala ni basa ni Tuhanta do i tu hita.Manghirim do hita di taon na imbaru on naeng jaloonta godang angka pasupasu; dipasupasu hita di hahipason, las ni roha, cuaca na denggan, nang tiur ni pancarian, tarlumobi ma haporseaonta nang  hangoluan saleleng ni lelengna sipapataron ni Tuhanta di angka na porsea di Ibana. Didok Par-Pslm do “Sai pabotohononmu do tu ahu dalan hangoluan, sun ma las ni roha di adopan ni bohim, angka hasudungan ni roha masa di siamunmu saleleng ni lelengna” (Psalmen 16;11).

Ro do Tuhanta manopot hita, ro Ibana laho paluahon hita, asa manang ise na porsea tu Ibana unang mago alai dapotan hangoluan saleleng ni lelengna (Joh.3:16). Sialani i marhite jamita on didok do! 

TEMA: “RO DO TUHANTA MANDAPOTHON HITA”

Ilustari Gambar Simeon dan Hana

I.         Unang tapangasahon pingkiranta.

Si Lukas do manurathon buku on, sahalak tabib/dokter. Holan ibana do panurat Evangelium na manurathon taringot tu na binoan ni natorasNa Posoposo i tu Bagas joro laho pasunathononhon, huhut pajumpang dohot si Simeon nang si Hanna. Marhite turpuk on boi do antusanta ndang piga na mangalehon rohana maimaimahon haroro ni Tuhan i, nda holan si Josep, si Maria dohot si Simeon nang si Hanna sambing do? Boha do angka na asing? Ndanunga marribu taon Israel managam haroro ni Mesis i? Jala sude do angka panurirang manurirangkon tu nasida jala berharap do sude nasida di ditopot Mesias (Mesianic hope). Saonari nunga ro Ibana alai dang piga na mananda, songon i torop jolma di Jerusalem na binolus dohot na mamolus Tuhanta i alai ndang ditanda nasida Tuhan i. Boasa boi songon i? Ala sai dipangasahon nasida do pingkiranna dohot angka parbinotoan portibi on. Panandaon nasida di Mesias songon sahalak raja na di portibi on; marpahean hasangapon, didongani angka soldadu, marhoda jala maniop podang, ala Mesias i do dihirim nasida paluahon nasida sian angka musu ni Israel tarmasuk paluahon nasida sian gomgoman ni Rom.Alai ndang songon na dipingkiri nasida haroro ni Mesias i naung ro i. Ala ni i ndang adong nanggo sahalak na umboto jala mananda, tarlumobi ma di bagasan status Posoposo i do pe Ibana, mambahen gabe lam maol tandaon ni nasida.

Uju i halak Jerusalem mangulahon ulaonna songon na somal, sibuk be nasida di angka ulaonna be. Hape sasintongna ingkon dohot do nasida ro tu dalan manomunomu Mesias i, alai dang diulahon i ala na so ditanda jala dang porsea. Didok di Hata ni Debata: “ai dipapitung debata ni portibi on do pingkiran ni angka na so porsea, asa unang nasida dipatiur sondang ni Barita na Uli taringot tu hasangapon ni Kristus, na tardok suman ni Debata (2 Korint 4:4). Portibi on do dipangke sibolis mambahen so tahaporseai Tuhanta  Jesus. Dilalaplalapi portibi on do hita, ujungna gabe lupa hita tu sitompa jala Sipalua hita. Dilehon portibi on do tu hita angka silomo ni rohanta laho mangunjuni asa tartait hita tu lomo ni roha ni sibolis. Hinorhon ni i gabe torop jolma lilu jala so porsea, Hata ni Debata na tarsurat di Johanes 3:18 “Ndang siuhumon na porsea di Ibana, alai anggo na so porsea i, nunga hona uhum ala so porsea ibana di Goar ni Anak sasada ni Debata.” Dibagasan na dua taon on, hutopot hami do pigapiga hurianta GKLI. Sai huparateatehon do; haroro ni angka ama tu gareja ndang sebanding dohot haroro ni angka ina songon i naposo bulung.  Angka ama mansai otik do na ro tu parmingguon, hape ama i do gabe malim di bagasna, ibana do sipanogunogu dohot si partangiang, ingkon ibana do mangarahon inanta dohot angka dakdanak ro di sude pangisi ni bagasna ro tu parmingguan. Sahalak ama dang holan bertanggung jawab tu ngolu siapari keluarga alai dohot do bertanggungjawab di ngolu ni partondion ni keluarga. Taida pribadi ni sahalak ama na margoar si Josua di Padan narobi. Josua ndada holan bertanggung jawab tu ngolu siapari ni keluarga alai dohot do nang ngolu partondionna, taida jamita ni si Josua tu Israel: “alai molo tung sogo rohamuna mangoloi Jahowa, pillit hamu ma sadarion, manang ise naeng oloanmuna, manang debata sileban nanioloan ni ompumuna dibariba ni batang aek i, manang debata ni halak Amori nampuna tano na niingananmuna i; alai anggo ahu dohot donganku sajabu, ingkon Jahowa do oloannami.” (Josua 24;15)

Sude ma hita patutoruhon rohanta di adopan ni Tuhan i, nunga ro Ibana tu hita, ro Ibana naeng mamasumasu hita; mangalehon dame, las ni roha, holong ni roha, mamasumasu hita dohot gogo, sipanganon, siinumon, nang haporseaon dohot hangoluan saleleng ni lelengna. Sude do tarpatupa Ibana laho tu haulion dohot hadengganonta. Ndang adong na so tarpatupa Debata (Lukas 1:37), haporseai hamu ma Ibana, Ibana do Raja sipalua hita.

II.        Ai Ibana do Raja, Sipalua i.

Dung sahat si Maria dohot si Josep tu bagas joro i, diabing si Simeon ma Posoposo i, dipuji ma Debata ninna ma: “Paluaonmu ma nuaeng ale Raja, naposom on di bagasan dame, songon na nidokmi; ai nunga diida matangku haluaon na sian Ho i, na pinaradem dijolo ni bangso sudena, bahen panondang sumondangi angka parbegu, bahen hasangapon ni Israel, bangsom i! (ayat 29,32). Tondi Porbadia manogunogu jala margogoihon Simeon manghatahon panindangion taringot tu Posoposo i. Adong do dua bagian siidaonta di bagasan panindangion ni si Simeon on:

Parjolo: Posoposo, i ma Raja manang Tuhan. Raja na mangarajai saluhutna, ndada songon raja ni portibi on ala sian surgo do haroroanNa jala HarajaonNa, hot do ro di saleleng ni lelengna. Ibana do mangarajai nang di surgo nang di tano on, songon na nidok ni Apostel Paulus tu si Timoteus: “ai di hajujumpang ni tingkina patar ma Ibana, bahenon ni na Martua i, pargogo sasadasa, Raja ni angkaraja, Tuhan ni angka tuan” (1 Tim 6:15).

Paduahon: ulaon-Na: ima Paluahon sude bangso. Disurathon si Matius: “Tumubuhon Anak ma ibana; Jesus do Goarna, bahenonmu, ai paluaonna do bangsona sian angka dosa nasida be (Matius 1:21)”. Jala hombar tusi do panindangion ni si Simeon na mandok: ”ai nunga diida matangku haluaon na sian Ho i” didok si Simeon hatana i tu Posoposo i. Ai Ibana do Raja Sipalua i, na paluahon jolma sian dosa dohot hamatean. Posoposo i do Tuhan jala Debatanta, haroroNa patupa dalan tu haluaonta. Dosa i do pangambati di hita tu haluaon, upa tinuhor ni dosa, i ma hamatean (Rom 6:23). Dang adong jolma na lias sian dosa (Rom 3:23) Alani i ndang margogo hita ro tu haluaoni, nang marhite angka ulaon na denggan, amal, manang aturan-aturan na binahen ni jolma. Holan Tuhan Jesus i do na tuk paluahon hita. Di jolo ni Debata ndang adong dosa na metmet manang dosa na balga, jala ndang adong dosa na balga situtu na so tarsesa Tuhanta,  jala ndang adong dosa na pametmethu mambahen hita sundat tu paruhuman. Nunga ro Ibana laho manesa dosanta, pasahat ma ngolum tu Ibana. Hata ni Debata di Jesaya 1:18: “dung i sai ro ma hamu, asa mardabudabu hita, ninna Jahowa Tung sura rara dosamuna songon abit bunga dapdap, bontar do bahenonku songon itak; nang pe rara songon abit hasumba, gabe songon hapas do muse”.

III.      Alani I, jangkon ma Ibana tu ngolum.

Molo taida do sikap ni si Josep, Maria songon i Simeon nang si Hanna, tung dipatutoru do roha nasida tu adopan ni Debata jala dijouhon Debata nasida asa margogo jala hot dibagasan haporseaon. Songon si Maria, di na ro surusuruan Gabriel mandapothonsa huhut mandok: “Gabegabean ma ho, tubuan anak ma ho, Jesus ma  bahenonmu goarna.” Nda suhar do sasintongna hata i di roha ni si Maria? Ala ndang adong ditanda ibana dope baoa. Alai dipatutoru si Maria do rohana di jolo ni Tuhan huhut mangalusi si Gabriel: “Naposo ni Tuhan i do ahu, sai saut ma tu ahu songon na nidokmi” (Luk 1:31,38). Taida dison, untangian do si Maria tu Hata ni Tuhanta asa sian na Tuhan Yesus” piningkaranna, gabe mambahen na uli jala na denggan di si Maria.

Songon i do nang si Josep, ama na bertanggungjawab huhut na serep marroha, ndang adong ditahi rohana paurakhon si Maria. Dipatutoru do rohana di adopan ni Tuhan i, jala ndang mabiar ibana manang songon dia pe parhatahata ni jolma ala porsea do Ibana tu TuhanNa. Marhitehite huaso ni Tondi Porbadia sambaing do na tuk paimbaruhon roha ni angka ama di huria i dohot panangihonon di hata ni Debata, na manopa rohanta asa gabe ama na burju dihuria i. Taida nang si Simeon, sahalak na marbenget ni roha paimaimahon Tuhanta sahat tu ari hatutuana. Ibana nunga matua, hurang lobi marumur 90 taon, alai ndang mangambati semangat na ro tu Bagasjoro i. Didok si Lukas do ibana sahalak na bonar huhut na daulat jala na niinganan ni Tondi Porbadia. Jala nunga dipabotohon Tondi Porbadia i tu ibana, na so idaonna hamatean, ia so jolo diida Kristus ni Tuhan i. Dialusi Tuhan i do tangiang na, pajumpang Ibana tu Tuhan i huhut ma didok: “Paluaonmu ma nuaeng ale Raja naposom on di bagasan dame songon na nidokMi” (ayat 29). Mansai las roha ni si Simeon di na pajumpang Ibana tu Tuhanta, dipuji do Tuhanta i, jala nunga tung rade rohana manjangkon hangoluan na saleleng ni lelengna. Di hamu angka ama, na hinolongan ni Tuhanta, tongtong ma marbenget ni roha di bagasan Tuhan i, na pasti ro do Tuhan i mandapothon hamu mangalehon pasupasu ima dame dohot las ni roha, tontong ma satia tu Tuhan i.

Taida muse sahalak ina naung mabalu, nunga matua, marumur 84 taon, margoar si Hanna. Diharingkothon ibana do martangiang arian dohot borngin, huhut marpuasa, sai ro do ibana ganup ari tu Bagasjoro i paimaimahon TuhanNa. Ditangihon Tuhan i do tangiang na, ro do Tuhan i mandapothon ibana jala sun las ni rohana mamujimuji Tuhan i. Hamu angka ina na hinaholongan ni Tuhanta, sai lam tu gogona ma hamu martangiang jala mangihuthon Tuhan i. Sude hita angka parhobas nang ruas pe, dijouhon Debata hita asa tontong setia hita tu Ibana, ai na setia do Ibana tu hita. Didok Hata ni Debata do: “Sahat ro di hatutuamu sai tongtong do ahu, jala ro di na ubanon sai ahu do mangusung hamu. Ahu do mambahensa na sai laon, ahu do mangompa, ahu do mangabing, jala ahu paluahon nuaeng” (Jesaya 46:4). Songon i ma Tuhanta manogunogu hita dibagasan holong ni rohaNa, ai balga situtu do holongNa di hita, diriNa sandiri dipasahat tu hamatean humophop hita. Dang tadingkononNa hita, sai diparmudumudu do hita dipardalananta di bagasan taon 2025 on. Selamat taon baru ma di hamu saluhutna, Amen.

 

Panurat: Bishop GKLI, Pdt. Jon Albert Saragih, M. Th