Patujolo:
Hea do ulaning sungkun-sungkun rohanta molo
marujung ngolunta sian tano on tu dia do hita muse? Boha surgo do ulaning
ingananta molo nunga salpu sian tano on? Hurasa sude do hita pasti hea tubu
sungkun-sungkun tu rohanta si songoni, ala memang sude do ugamo mangajarhon
adong hangoluan dung salpu sian tano on. Sude do ugamo di portibion
manghaporseai adong ngolu dung salpu sian tano on. Alai boha do? Molo sude do
ugamo mangajarhon taringot tu hangoluan sogot, sude do na marugamo masuk tu
banua ginjang? Tontu gabe godang do sian tonga-tonga ni hita naung gabe Kristen
mandok, Sarupa do sude ugamo sada do tujuanna surgo. Toho memang sada do tujuan
ni namarugamo surgo gabe bona ni pasogit ni tondina. Alai nang pe songoni dang
ugamo na namanontuhon jala mamboan jolma bongot tu surgo, dang ala ni ringgasna
mangulahon ritual ha ugamaon, ringgas mangulahon amal manang na ala ni parulaon
nadenggan sebagai puncak tu haluaon, alai sada do kunci na! aha ma i, ay. 24
masuk sian pintu na gogot i, I do kunci na asa bongot tu Harajaon ni Debata.
Tung pe marragam ugamo di portibion manawarhon angka pintu-pintu na asing,
cara-cara na asing asa bongot tu surgo, alai anggo Jesus mandok ingkon sian
pintu na gogot i do halak asa bongot tu banua ginjang. Aha do pintu na gogot i?
Pintu nagogot i, i ma Jesus Kristus, di haporsea i Ibana Tuhan jala si palua, i
do kuncina. Alani di podahon do tu hita marhite jamita on:
“TEMA: “JESUS DO PINTU NA GOGOT I”
I. Dang Adong Pintu Na Asing Dungkon ni Ibana
Dibagasan Pardalanan ni
Jesus tu Jerusalem, adong ma sahalak na manungkun Ibana, songonon; Tuhan, otik do ulaning na saut malua? (ay. 23).
Sungkun-sungkunon sasintongna patuduhon songon sihol ni roha ni Jolma na
umbagas asa panean di Harajaon ni Debata! Alani Haluaon do di sangkapi roha ni
jolma. Tontu kuatir do hita molo dang dohot panean di bagasan Harajaon-Na i.
Mangalusi songon kebutuhan ni jolma tu haluaon i, didok Jesus di ay. 24
namandok: marungkil ma hamu, asa masuk sian pintu na gogot i. Namanggombarhon
do on bahwasana holan sada do pintu tu Harajaon ni Debata, i ma masuk sian
pintu na gogot i, dang adong pintu-pintu na asing dungkon ni sasada Jesus.
Torop do halak di luar ni pintu i namandok (ay. 26): Na rap mangan jala
minum do hami dohot Ho, jala diajari Ho do hami di angka alamannami. Merasa
jonok nasida secara agama, alai dao ianggo rohana. On do nuaeng torop gombaran
ni halak diportibion, marugamo alai dao do rohana sian Tuhan i, dao sian pintu
na gogot i, i ma Jesus Kristus Tuhan i. Boe do hita ringgas marminggu, ringgas
mangapil patik, gabe parhobas manang parhalado di tonga-tonga ni huria, alai
boha do ulaning rohanta, tutu do hita mangasahon Kristus i sambing di ngolunta?
Manang na talului do pintu-pintu na asing. Dang mura si ihuthon Kristus, godang
do sitaonon na ta adopi, parungkilon hasusaan, las ni roha dinamardalan
dibagasan haporseaon i, jala ingkon do tabolus i. Godang do halak ala ni maol
ni sidalanan i, gabe mamillit dalan na asing. Ay. 27 didok: Dung i dohononna ma: Hudok ma di hamu:
Ndang huboto hamu, manang sian dia. Sumurut ma hamu sian Ahu, hamu sudena,
siula hageduhon!. Ayat on dang na patoranghon ala na jahat secara moral
nasida dison, alai ala na di tulak do Kristus Tuhan i dalan sipalua di ibana.
Sada hal na pasti dang bongot ia halak na mangasahon dalan na asing/ pintu na
asing, jala dang dang bongot halak ia mangasahon dirina sandiri, pambahenanna,
gogo dohot parbinotoanna gabe suhat-suhatna tu haluaon. Boasa dang di tanda
Jesus halak na diduru ni pintu i? Ala merasa nasida layak alani usahana sandiri
merasa layak masuk tanpa pintu i, parulaonna do di etong-etong gabe
suhat-suhatna tu Tuhan i. Ginjang ni roha do pangalaho na di duru i
dipatariashon tu Tuhan i, dang ringkot nasida di Jesus Kristus tu haluaon.
Alani do nasida gabe pulik di duru manean paruhuman. Jala hamatean do jambar ni
halak na so olo manjangkon Jesus. Songoni do hita molo dang olo mangungkap
pintu nagogot i, dang boe hita bongot tu bagasan harajaon ni Debata.
II.
Ungakap Do Pintu Harajon Ni Debata Tu Sude
Jolma Na Olo Bongot Tu Pintu Na
Gogot I
Alai mauliate ma di Tuhanta i, dilehon do tu hita barita
nauli, barita las ni roha, bahwa adong do hape pangkirimon di hita di angka na
porsea tu Tuhan Jesus Kristus. Di goari Ibana pintu na gogot i, i ma laho
manggombarhon dalan haluaon. Holan sada do dalan haluaon, i ma marhite
haporseaon dibagasan Tuhanta Jesus Kristus. Johanes 14:6 “Gabe didok
Jesus ma tu ibana: Ahu do dalan i dohot hasintongan dohot hangoluan. Ndang
adong na sahat tu Ama i, ia so marhite sian Ahu”. Di ayat 29
didok Tuhan Jesus: “Disi ma ro angka na sian purba dohot sian pastima,
sian utara dohot sian dangsina, gabe hundul ma marsipanganon di harajaon ni
Debata”. On ma gombaran ni halak na merasa dirina dianggap dang layak,
halak na asing na diluar ni bangso israel, pardosa, si jalo beo taruli di
panjouon ni Debata tu haluaon. Digokhon Debata do sude halak asa bongot tu
haluaon tu Harajaon ni Debata, dang adong sahalak pe disangkapi Debata asa tu
hamatean alai tu hangoluan. Alani do di hita di ha- batakhon mandok: “gokhon
do sipaimaon jou-jou do si alusan”. Nunga digokhon hita, dang holan tu
bangso Israel haluaon i dilehon alai dohot do tu sude bangso. Dang dibatasi
sian latar belakang aha pe hita, alai ungkap do pintu haluaon di halak na
manjanghon haluaon i na dibagasan Kristus Jesus. Alani do songon singot-singot
ni Tuhan Jesus di ayat 30: “Angka naung parpudi hian tupa gabe parjolo; jala
angka naung parjolo hian, tupa gabe parpudi”. Halak na dianggap parpudi
(halak pardosa, sijalo beo) boe do bongot, alai halak na merasa parjolo (Farise)
justru gabe parpudi. On ma singot-singot tu halak na ginjang marroha/ sombong
secara rohani, na merasa dirina untingkos sian halak na asing. Haluaon dang
manaringoti taringot tu prestasi manang status ni jolma i aha! Alai taringot tu
serep ni roha di bagasan haporseaaon di adopan ni Debata. Songon halak si jalo
beo namartangiang dibagasan serep ni roha namandok, asi roham di au halak
pardosa on (Lukas 18:13). Songoni do hita di jou ro tu adopan ni Tuhan i
dibagasan roha namagopo dohot serep ni roha.
Sahali na i, haluaon dang bersifat eksklusif alai inklusif, sude do
halak dijou tu haluaon, alai holan na porsea do na dipalua. Unang ma ginjang
roham, angahon ma haluaon i, ai pasupasu ni Debata do i.
III.
Alani Mangolu Ma Hita
Dibagasan Serep Ni Roha
Dilehon Debata do tu hita kesempatan, ungkap do pintu i
tu sude jolma na ro dibagasan roha na gopo jala porsea. Dang na alani na merasa
paling badiaan hita, merasa paling sintong dijamin masuk tu harajaon-Na i alai
na olo manopoti: Tuhan jolma pardosa do au
on, asi roham di au!. Ida ma balganai holong ni Debata tu hita,
dibasabasahon do tu hita haluaon i jolma pardosa, jolma na so tama do nian hita
goaran alai di pasiat do hita tu bagasan Harajaon-Na i. Di ungkap dope di hita
pintu surgo, asa bongot hita tu bagasan harajaon-Na. Marlojong ma hita tu
haluaon i, gomos maniop haporseaon i di bagasan serep ni roha mangalusi gokhon
ni Tuhan i tu haluaonta.
Plt. Pendeta GKLI Resort Manduamas