JAMITA MINGGU QUINQUA GESIMA: TANGIHON JALA BARITAHON MA HATA Nl DEBATA TARINGOT TU JESUS (MARKUS 9:2-9)

Patujolo:

        Turpuk Evangelium on, Jesus rap dohot siseanNa, i ma si Petrus, Yakobus dohot si Johanes, na tongon di sada dolok na timbo. Tingki di dolok i, diida siseanNa i do Jesus muba do rupaNa, muba do ulosna gabe marsillam, bontar situtu, na so dapot ni angka panunsi di portibi on mambahen bontar songon i (transfigurasi) jala huhut diida angka sisean i Jesus manghatai rap dohot angka Naposo ni Debata, i ma si Elia dohot si Musa (Mark. 9:2-4). Elia i ma sahalak panurirang na mansai balga di tongatonga ni bangso Israel na patut tiruan angka bangkona. Songon i nang si Musa, na manguluhon bangso Israel ruar sian parhatobanan Mesir jala na manjalo patik na sampulu i, na marondolan di holong ni roha i tu Debata dohot tu dongan jolma.

        Petrus, sisean na marnida tangkas angka na masa (transfigurasi) di dolok i hatahutan situtu namanghorhon gabe so diantusi be mandok hatana tu Jesus, baliksa marsangkap sisean i pajongjonghon soposopo tolu, sada di Jesus, sada di si Elia, sada nang di si Musa (Mark. 9:5-6). Jala ndung dipasahat si Petrus angka sangkapna i, ro ma ombun mangalinggomi nasida huhut manghuling ma soara sian bagasan ombun imandok: “ on do Anak haholonganku, tangihon hamu ma Ibana.” (Mark. 9:7). Dung salpu Pangkuling namanghorhon halongangan i, jala dung manaili angka sisean i, ndang adong be diida nasida dungkon ni sahalak Jesus na ma disi. Tontu panghuling/soara i patandaphon hadirion ni Jesus. Parjolo, paboa sitangihononhon do Jesus i ala HadebataonNa, Ibana ma tutu Anak ni Debata. Paduahon, di na lao tuat nasida sian dolok i, dihatingdanghon Jesus i sandiri do dirina Anak ni jolma. Jala gomos do angka sisean i dipopai Jesus asa unang dipaboa angka na niidanasida na manghorhon halongangan i ia so jolo hehe Anak ni Jolma i sian na mate (Mark. 9 :8-9). Damang dainang na hinaholongan! Hombar tu turpuk on, tangkas taida dua horong panghuling namanghatindanghon taringot tu Jesus i. Alani tasurathon ma parjojor ni Evangelium on, ima, Thema:

“TANGIHON JALA BARITAHON MA PANGHULING/SOARA/HATA Nl DEBATA TARINGOT TU JESUS”

Transfigurasi Yesus

I.         Ala Jesus Do Sipalua Hajolmaon.

Jesus Do Mesias Naung Sinuru Jala Miniahan Ni Debata. Halongangan na masa di dolok i, ima ala panghuling sian ombun na patandaphon hadirion ni Jesus, ima ha-Debataon-Na dohot ha-Jolmaon-Na. Na masa di dolok i, songon na masa uju ro Pardisurgo jala marpanghuling di na naeng gabegabean simaria, nang di na dung tubu Jesus. Jala di na patupahon angka ulaonNa di portibi on, parbanua ginjang tongtong manghatindanghon hadirion ni Jesus na gabe Mesias, nata pe portibi on tontong targasip mida Jesus, suang songon i angka partogi ni bangsoNa sandiri Israel, jotjot targasip sahat tu namanaon haporsuhon ro di na mamparsilanghon Jesus i (Luk. 4:16-30). Alai tudos tu si Elia dohot si Musa, Jesus i do na sinuru dohot na miniahan ni Debata. Ibana ma tutu Anak ni Debata huhut Anak ni Jolma i, napaluahon bangsoNa jala namamorsan dosa ni portibi on.

Di turpuk on tung tangkas situtu do tarida, Jesus imanghatinghon diriNa na gabe Anak ni Jolma. Na marlapatan ma i, sian pardagingon hajolmaon, Ibana pinompar ni si Adam na parjolo, na gabe Kristus manang Mesias na miniahan. Pandohan taringot tu Anak ni Jolma, adong do 86 hali dihatahon di Bibel Padan Naimbaru, na manghatindanghon Jesus i, paboa na serep marroha do Ibana na gabe dos di angka parsaoran tu jolma pardosa (solider). Alani ingkon sitangihononhon do Panghuling/Soara ni Jesus ala Ibana sandiri do tutu, daging na gabe Hata i (Joh. 1:14. Jesus do Debata Jahowa na ro tu portibi on marrumanghon Jolma Manisia. Tandap do ha-Debataon-Na i tarida di sasude parngoluonNa dohot di angka panghobasionNa. Saleleng patupahon angka ulaonNa, Ibana ma tutu nagabe Panurirang, Malim huhut gabe Raja. Jesus i do na ingkon sitangihononhon SoaraNa ala Ibana do nahinalomohon ni Tuhan i (Mat.3:17, Mark. 1:11, Luk. 3:22, Joh. 1:32-34) jala di na laho marsitaonon na mansai bernit tu Hau Pinorsilang i, sai dipasangap par Banua Ginjang do Jesus (Joh. 12:7-30).

Songon i nang di Bibel Padan Narobi, nungga tibu disuriranghon taringot tu hadirion ni Jesus, ima na gabe Immanuel (Jes. 7:14). I do umbahen na mansai denggan sun diulahon Jesus angka ulaonNa, ala Ibana do Debata huhut Jolma situtu. Songon si Elia na maralo tu angka hajahaton. Nang songon si Musa na mamboan bangsoNa ruar sian parhatobanan. Songon ima nang Jesus na gabe Mesias na paluahon bangsoNa ruar sian parhatobanan ni dosa; si bolis na jahat i, tarlobi namanaluhon hamatean na jorbut i. Jesus, Mesias naung sinuriranghon di Padan Narobi (Jes. 9:1-7; 61; 62) jala na hinatindanghon di Padan Naimbaru (Mat. 16:16; 26: 63-68; Mark. 8:29; 14; 61-62, Luk. 2:26-27; 4: 41; 9:20; 22:67-71; Joh. 1:41-42; 10:24-30; 11:27; 20:31; Kiss. 2:31; 3:18; 5:42; 8:5; 9:22; 17:3; 18:5,28; 26:23; Rom 9:5). Jesus ima tutu Mesias, natape diparsilangkon, alai Jesus i do na gabe mual ni Haluaon dohot mual ni Hangoluan di angka jolma pardosa na tumangihon Hata ni Jesus. Jesus i do Mesias naung manaluhon sorop ni si bolis i.

II.      Ala Nengel Portibi On Dipanghuling/Soara/Hata Ni Jesus

Umbahen na nengel jolma manisia Songon si Petrus Uju Pardosa. Si bolis manang huaso ni dosa sai tontong do mamangke angka partingkian lao mangunjuni jolma manisia asa nengel maradophon Panghuling/Hata ni Jesus. Tung sudena do tahe pangkeon ni na jahat i angka sarana dohot prasarana na adong di parngoluan ni jolma saleleng mangolu di portibi on. Tarlobima si bolis i na sai tontong mangarajai roha, pingkiran, pamatang manang pardagingon ni jolma manisia asa unang olo tumangihon Hata ni Jesus, nagabe Mesias Sipalua Hajolmaon i. Di angka turpuk Evangelium na asing, tardok do si Petrus sahalak sisean na nengel manang na so tumangihon Panghuling/Soara ni Jesus ala sai dipangasahon ibana angka na di bagasan dirina sandiri. Pangalaho manang bangko si songon i, tontu sian si bolis na jahat i asa si Petrus dohot sisean na asing asa unang mangantusi paboa Jesus do Mesias Si palua hajolmaon i. Ndang adong na sintong na hinatahon ni si Petrus i taringot tu Jesus. Hape gariada ingkon do manaon na bernit Jesus i di Hau Pinarsilang, jala mulak mangolu sian angka na mate (Mat. 16:23; Mark. 8: 3). 

Songon i ma di bagasan jamita on, molo taida sambolus di turpuk on, boi do tarida tangkas si Petrus i, na jotjot singkat ni angka sisean pasahathon angka pandohan. Hinorhon ni biar ni rohana di angka na masa di dolok i (transfigurasi) umbahen didok si Petrus tu Jesus i paboa na mansai denggan do nasida di dolok i, huhut sisean imarsangkap paulihon soposopo tolu, ima sada tu Jesus, sada tu si Elia dohot sada tu si Musa. Alai ndang dialusi Jesus i si Petrus. Gariada ro Panghuling/Soara sian ombun i namandok: “On do Anak Haholonganku, tangihon hamu ma Ibana “ (Mark. 9:7). Di situasi na songon i, tangkas taida si Petrus na sai holan tumangihon panghuling/soara manang panggora ni rohana. Petrus mangasahon panghilalaanna dohot pingkiranna sambing. I do umbahen didok ibana tung mansai denggan nasida di dolok i jala marsangkap paulihon soposopo tolu marhite napinauli ni tangan ni angka sisean i. Tutu, na nengel do si Petrus hatiha i taringot tu Jesus ima na ingkon marsitaonon do Ibana jala bolusonNa hamatean jala hehe muse Ibana sian na mate (Mark.8:31-38; Luk. 24:46).

III. Sudena Do Angka Naporsea Di Jesus Rade Tumangihon Huhut Patubegehon     Panghuling/Soara/Hata Ni Jesus Di Portibi on Marhite Huaso Tondi ParbadiaNa.

1.     Elia Dohot Musa Gabe Tiruan    

                   Damang dainang, na hinaholongan! Di portibi on, huria/halak kristen naung pinalua ni Jesus sian parhatobanan dosa; sian gomgoman ni si bolis na jahat i ingkon do tontong tumangihon huhut patubegehon Hata ni Jesus di parngoluonna si ganup ari. Sudena i dipatupa marhite bulus ni roha dohot roha hamauliateon, roha na tumanda di holong ni rohaNa. Ibana do na tumaon na porsuk/bernit humongkop angka jolma si pardosa asa malua sian bura ni patik i (Galatia 3:13). Ima siala ni pangalaosion ni angka jolma di patik na sampulu i, ima patik na jinalo ni si Musa di punsu ni dolok Sinai uju i. Siala ni, na ingkon do saluhut huria/halak kristen i tumangihon dohot patubegehon Panghuling/Soara/Hata ni Jesus i di saluhut gulmit ni ngoluna dalan pasangaphon goarNa na marmulia i. Ala naung jinouNa tu hamubaon ni roha jala marpamuati rohaNa mida angka halak pardosa i. Jesus I do namamorsan haporsuhon ala ni dosa ni jolma manisia. Ibana do tumaon na porsuk di Hau Pinarsilang, na mate, jala na hehe sian angka na mate. Alani tung mansai tama do tinangihon jala pinatubegehon angka HataNa na manghorhon Hangoluan i tu saluhut jolma manisia na adong di humaliangta be. Sudena do angka huria/halak kristen ingkon tumiru manang marbangko songon si Elia dohot Musa, dua halak naposo ni Debata na di Padan Narobi na sai tarbarita di angka bangkona. Andorang di ngoluna be, sai tontong do nasida marholong ni roha tu Debata sian nasa rohana be. Jala nang pe jotjot nasida mangadopi angka hamaolan, parungkilon manang parsitaonon alai hot do si dua halak naposoNa on dibagasan habengeton dohot hasatiaon/ haposan tumangihon huhut patubegehon Panghuling/Soara/ Hata ni Debata marhite serep ni roha. Sada sian bangko ni si Elia dohot Musa, nasida on angka naposo naringgas martangiang di ngolu partangiangan marsasahalak. Jala na so tupa olo nasida saurdot dohot angka siula hajahaton. Jala tung mansai bahat situtu dope tahe hasurungan manang bangko ni nasida nadua, si Elia dohot si Musa na dibaritahon di Bibel Padan Narobi, paboa na tung mansai ringgas do nasida marpanungkun dompak Debata, tumangihon jala patubegehon HataNa.

2.     Apostel Petrus, Nagabe Haposan Tumangihon Dohot Patubegehon Panghuling/Soara/Hata Ni Jesus.

Suang songon i di tingki Padan Naimbaru, tardok do angka Apostel, tarlobima i Apostel Petrus. Ima sahalak jolma na hea nengel tumangihon Hata ni Jesus. Alai di angka panghobasionna di pudian ni ari, gabe tarbarita do ibana sisean nahaposan, sahalak Parbarita Nauli namanghatindanghon angka na masa na niidana na manghorhon halongangan, ima di na muba Jesus (transfigurasi) jala di rap Ibana manghatai tu si Elia dohot Musa uju di dolok i (2 Petrus 1:16-21). Jala di pudian ni ari di angka ulaonna tarsongon sahalak Apostel, sian ias dohot serep ni roha, ringgas jala gomos do Apostel Petrus manogihon torop jolma asa olo ma nian tumangihon Hata ni Jesus siboan Haluaon i. Tangkas situtu do Apostel Petrus imanogihon torop jolma asa unang be olo tumangihon angka soara na sian portibi on, baliksa holan natumangihon Panghuling/Soara/ Hata ni Jesus sambing do jala sipatubegehononhon ala Ibana do silehon Hangoluan, asa unang mate di bagasan angka dosana angka pardosa i, alai naeng ma mangolu di bagasan haporseaon tu Debata Jahowa Si Tolu Sada i na tatanda di bagasan Goar ni Kristus Jesus.

IV.             Panimpuli/Penutup

Hombar tu angka hatorangan na di ginjang di evangelium on, ndang margogo huria/halak kristen i di portibi on tumangihon, tarlobima patubegehon taringot tu holong ni roha ni Debata di bagasan Jesus i molo sai tontong dope mian jala mangolu di bagasan roha daging. Tontu sai tontong do nengel hinorhon ni dosa ala sai dipangasahon panghilalaan dohot pingkiran sambing. Baliksa holan marhite Huaso ni Tondi ParbadiaNa i do umbahen margogo angka naposoNa tumangihon jala patubegehon Panghuling/Soara/Hata ni Jesus i di angka parngoluonna si ganup ari. Jala ingkon marhite huaso ni Tondi Parbadia i paluahon torop jolma pardosa marhite Barita Nauli taringot tu Harajaon ni Debata na manjou angka pardosa tu hamubaon dohot hasesaan ni dosa (pat.Lapatan ni Hata Haporseaon ponggol III). Jala manang ise na porsea tu Jesus i asa mulak mangolu muse songon Ibana naung manaluhon hamatean i. Jesus i do tutu silehon Haluaon dohot Hangoluan. Jala songon goar ni Minggunta sadari on, Estomihi, lapatanna sai Ho ma partanobatoan di ahu.

Antong naeng ma saluhutna hita angka nahinaholongan, damang dainang, tarsongon huria/halak kristen   naung   tinobusNa   hita sian pardosaonta, sai tontong dipasupasu Tuhanta Jesus i hita manghaporseai Ibana asa sai olo hita tumangihon jala patubegehon Panghuling/Soara/Hata ni Debata Jahowa na tasomba marhite Goar ni Kristus Jesus. Ibana do Sipalua Hajolmaon, Debata mual ni Hangoluan namanontong i, na manaluhon sorop ni si bolis di portibi on. Amen.

 

Sinurathon ni: Pdt Anton Ben Gurion Hutagalung, S. Th