TUHAN JESUS MANAEK TU BANUAGINJANG (LUKAS 24:44-53)

JAMITA/ EVANGELIUM 

PARNINGOTAN DI HANANAEK TUHAN JESUS TU BANUA GINJANG

Nats: LUKAS 24:44-53

 Patujolo:

Ari sadarion, na marningot do hita di hananaek ni Tuhan Jesus tu Banuaginjang, sude do halak Kristen di portibion patupahon parningotan i. Ulaon ni Debata do i na laho manarihon ngolu ni partondionta. Molo tung godang pe jolma na so manghaporseai hananaekna I, angka jolma na mangasahon pingkiranna do i dohot na laho mangalipehon haporseaonta. Unang ganggu rohanta alani angka i, natutu situtu do Tuhan Jesus manaek tu Banuaginjang laos i do sidohonon ni jamita on di hita, Thema:

TEMA: TUHAN JESUS MANAEK TU BANUAGINJANG

I.     Songon na nidok ni panurirang di padan na Robi.

Di ayat 44, didok Tuhan Jesus do tu angka siseanna “ingkon jumpang do saluhutna na tarsurat taringot tu Ahu, di Patik ni si Musa, diangka panurirang i, nang di buku ni Psalmen. Sian na robi nunga tutu disurirangkan angka panurirang taringot tu hadirion ni Tuhan Jesus, sian hatutubuNa, ulaonNa, SitaononNa, hamamateNa na diparsilangkon, haheheonNa sahat nang tu na manaek Ibana tu banuaginjang (Pslm 68;19) Dison do idaonta hasintongan ni Debata na laho paluahon portibi on sian hamagoan. Hasintongan i ma, Tuhan Jesus mate tarsilang jala hehe diari patoluhon laho paluahon jolma sian dosa. Tung asing do parbinotoan ni portibion taringot tu hasintongan, jala suhar do diroha nasida hasintongan na sian Debata, (1 Korint 1;18 “haotoon do hata na taringot silang i di roha ni angka na laho mago). Tung so tarbahen jolma manesa dosana marhitehite ulaon na denggan manang angka cara-cara na asing, tung sisoada do i di adopan ni Debata. Titus 3;5 “ndada ala ni ulaonta hatigoran, umbahen na dipalua Ibana hita; tung sian asi ni rohana do.

Dang diantusi angka sisean i dope na nidok ni Tuhan Jesus na mandok “ingkon jumpang do saluhutna na tarsurat taringot tu Ahu” (ayat, 45). Hata on nunga marulakulak dihatahon Tuhan Jesus tu angka SiseanNa. Alai ndang diparrohaon jala ndang dipahusorhusor dibagasan rohanasida. Mungkin ndang diantusi pandohan I, ala tarpusat roha nasida holan tu pardagingon, Matius 20;20-21 marpangidoan ina ni anak ni si Sebedeus rap dohot angka anak ni nadua i, i ma si Johanes dohot Jakobus asa di pahundul sogot sada tu siamunNa jala na sadanari di hambirangNa. Alani i ndang dapot roha nasida dia do tujuan ni na nidok ni Tuhan Jesus. Songon i do nang hita molo so talehon do rohanta manangihon dohot pahusorhusorhon Hata ni Debata na tajaha manang na tabege, tung so taantusi sangkap ni Debata di hita. Alai molo sai tapahusorhusor do Hata I dirohanta urupan ni Tuhanta I do hita mangantusi jala mameop HataNa, songon hata ni Tuhan Jesus tu si Maria “Sada do na ringkot! Dipillit si Maria do tohap na uli I; ndang sibuaton i sian ibana (Lukas 11;24).

Tuhan Jesus manaek tu banuaginjang, na tutu situtu do I, dihatindangkon angka sisean I do hananaekNa I, laos dipasupasu do angka sisean I huhut manaek Ibana dipanotnoti nasida (Ulaon ni Ap. 1;9). Alani unang ganggu rohanta di hadirion ni Tuhan Jesus. jala ingkon masa do sude nanidok ni Tuhan i.

 

II.    Aha do Ulaon Na manaek tu banuaginjang.

Parjolo: Marsuru Tondi Porbadia tu angka na porsea. Tangkas do didok Tuhan Jesus taringot tu ulaonNa tu banuaginjang ima na laho marsuru Tundiporbadia tu angka na porsea di Ibana. Terbatas do kemampuanta mangantusi taringot tu Debata nang dohot angka ulaonNa di portibion nang di hita saluhutNa. Alai marhitehite Tondiporbadia na sinuruNa, i do mangajari hita na laho mangantusi ulaon ni Debata di hita nang mangajari portibion taringot tu Dosa dohot taringot tu hapintoron dohot taringot tu uhum (Joh 16;8). Jadi molo so manaek Tuhan Jesus tu banuaginjang dang suruonNa Tondiporbadia secara khusus tu hita angka na porsea. Paduahon: Parade inganan di hita angka na porsea. On do hasurungan ni angka na porsea tu Tuhan Jesus sian angka na so porsea. Diangka na porsea, diparade do inganan di ari sogot di banuaginjang inganan ni Tuhan i. sude do hita jolma ingkon maninggalhon portibion alai martua do ngolu ni angka na porsea ala naung diparade Tuhanta ingananta di banua ginjang. Di Johanes 14;3 didok “Jala laho pe Ahu mangarade inganan di hamu, sai mulak do Ahu mangalap hamu, asa rap hamu dohot Ahu!

Patoluhon: mangalehon kepastian di hita bahwa hita ingkon bongot tu surgo, natuat sian surgo do tuk namboan tu surgo, natuat sian surgo do na mamboto dalan tusurgo. Artina adong harapan dohot pangkirimon di hita, dihananaek ni Tuhan i tu Banua Ginjang hita pe sogot, gabe panean di Harajaon ni Debata.

 

III.  Antong Haposi ma Tuhan Jesus naung manaek i.

Dipatuduhon angka sisean i do sikap nasida maradophon Tuhan Jesus naung manaek tu banuaginjang. Sude do nasida marsomba tu Tuhan Jesus (ayat 52). Marsomba tu Tuhan Jesus I do hataridaan ni halak na manghaposi Tuhan Jesus. Tuhan Jesus gabe parsigantungan ni ngoluna, ndang adong angka debata na asing bahen parsigantungan dingoluna.

Taida muse, didok di ayat 53 “jadi tongtong ma nasida di joro I mamujimuji Debata. Dipatuduhon sisean I do roha na setia pasangaphon Tuhan Jesus dibagas joro ni Debata songon nanidok ni Tuhan I tunasida. Diulahon nasida do Hata ni Tuhan I dibagasan las ni roha.

Paingothon hita do on, hita angka naung pinamonang ni Tuhan Jesus dohot na parade inganan di hita sogot di surgo I, talehon ma rohanta mamujimuji goar ni Tuhanta I, tarlumobi ma mangalehon rohanta ro tu bagas joro ni Debata. Dibagas joro ni Debata do hita managihon HataNa huhut manjalo hasesaan ni dosa sian naposo ni Debata. Dijouhon Debata do hita tongtong asa ro hita tu bagas joroNa I, asa talehon ma rohanta. Amen.

 Shalom, Tuhan Yesus Memberkati :)