SAI DI JOU DEBATA DO HITA ASA RO TU HAMUBAON NI ROHA (JESAYA 1:10-18)

Patujolo:

Somalna  sude do angka natua tua marsak huhut marungkil molo diida anakkon na hinaholongan na sai manimbil sian angka poda dohot sian angka sipaingot na mambahen ngolu ni anakkon i gabe di bagasan pangalaho na ma dabu tu  hajahaton dohot tu bagasan dosa.  Songon i ma molo masa halumlamon si masyarakat  nang bangso pe. Angka partigor tontu sahali marungkil jala marsak do paida-ida pangalaho i,  sipata olo do tarrimas marnida pangalaho i. Tarlumobi ma  Jahowa sandiri marnida bangso Israel naung jinou na huhut dipillit gabe bangso. Tung ragam do panogu-noguon  dohot pangkaholongon ni Debata di nasida alai tung sai dao jala dipajogal do rohana jala ndang olo paundukhon rohana tu panogu noguon ni Debata. Ido umbahen ingkon lalu rimas ni Debata mida nasida ingkon gabe tu habuangan. Alai sai holong do rahaNa  dijou do asa mulak nasida sian dosa i. Laos ido dijouhon jamita di ari Minggu sadarion tu hita ganup : 

Tema : Sai di jou Debata  do hita asa ro tu hamubaon ni roha.

I.         Tu hamagoan do na so olo paubahon roha

Dibagian turpuk na parjolo  ima  parisuangon ni Jahowa mida halumlamon ni Isreal  (ayat 2 - 9 ) tangkas do di soarahon Panurirang Jesaya  holso  ni Debata  marnida pangalaho ni bangso i. Pola didok di ayat 3 i, “Ditanda jonggi do nampuna ibana, jala diboto halode panggagatan binahen ni tuanna. Alai anggo Israel ndang tumanda ahu, jala ndang marroha bangsongku.”  Nunga tung saep na sida mardosa. Ndang adaong be panimbangion di roha nasida. Gari angka binatang na holan nampuna instink ( naluri ) diboto do na denggan na binahen ni tuan na. Hape halak Israel naung tangkas mandai huhut marnida saluhut denggan basa ni Jahowa ndang marroha hape nasida. Nunga tutup  panggora ni rohana. Di Roma 1 : 12 di dok Apostel Paulus do “Ai atik pe diboto nasida Debata, ndang dipasangap Ibana songon na tama di Debata, jala ndang dipuji, gabe dipaotooto angka pingkiranna do nasida, jala mangkolom ma rohanasida na so mangarti i.”  Somalna ndang manigor mangimbukbuk hajahaton i, alai adong proses na. Ala ni lam mate panggora ni roha  atik pe di boto Debata, alai sai di pasiat si bolis mangula di rohana, ujung na lam disarat do jolma  i tu ulaon hajahaton na lam balga na manghorhon dosa.  Songon i muse di dok di Yakobus 1:15 “ Jadi dung manjangkon sangkapsangkap ni roha i, ditubuhon ma dosa; alai dung gok dosa i, ditubuhon ma hamatean.”

Di ayat 4 di dok “Marjea ma bangso na mardosai, na sun marhajahaton! Pinompar ni angka parjahat, angka anak jea, angka na tumadingkon Jahowa, angka na mangaleai na badia ni Israel, angka na sumurut tu pudi.”  Di bahen na so olo nasida mangangihon hata ni Debata songon nang angka panurirang na sinuru ni Debata, ujungna ingkon marjea/terkutuk. Hata marjea di dok di hata na  asing Awnagema.  Hata  “Awnaqema” marlapatan do i sada kondisi ni hajolamaon na parohon uhum   ndada holan bura tu dirina alai dohot do nang tu natorop ala ni dosa na niulahon na mambahen godang halak madabu tu haliluon.  Ido alana di goari nasida pinompar ni angka parjahat, angka anak jea , na manadingkon Debata. Ingkon manat do hita angka dongan,  saluhut dosa pangalaosion i ingkon marujung do i tu hamatean molo so olo paubahon roha.

II.        Tundalhon ma dosa i ai umbalga do holong ni roha Na sian rimas Na.

Nang pe naung mardosa bangso diadopan ni Debata jala uhum nunga ditariashon ingkon gabe jambarna  alai sai tonton do dipajogal rohana. Dia ayat  5  di dok “Tu aha i sai datdatan linsingan hamu? Sai ditambai hamu do panundalion. Ganup ulu marsahit do, jala ganup roha bebenesan.  Sian i idaonta tung na so ra mehon do halak Israel tong sai ditambai dosa mambahen hagigian diadopan ni Debata. Sasintongna ianggo sian muruk dohot rimas ni Debata, nunga ingkon sun siap bangso Israel. “  Tung sura so  ditebahon Jahowa Zebaot boni di hita saotik, siol doshon Sodom dohot Gomora hita “ ( ayat 9 ). Lapatanna holan asi ni roha ni Debata do umbahen so sun siap bangso i.   Ido nang andung-andung ni panurrang Jeremia di na ni dok na  “Asiasi ni Jahowa sambing do umbahen so haru sun siap hami, ai ndang marpansohotan asi ni rohana i. Mulak rata do i tahe ganup sogot, godang ma tutu habonaronmu! ( Andung 3 : 22- 23).

Dao do umbalga holong ni roha ni Debata  sian rimas Na sandiri. Nunga tangkas Ai upa tinuhor ni dosa do hamatean; alai basabasa ni Debata do hangoluan salelenglelengna marhitehite Kristus Jesus Tuhanta i. ( Rom 6 : 23 ). Ondo na gabe apul –apul di angka jolma pardosa. Songon dia pe dosa i, marhite hite holong ni roha ni Debata di jolma nunga dilehon Anak Na Jesus Kristus di lehon do hasesaan ni dosa diangka halak na olo ro tu ibana. Di Buku Endenta No 174 :  3 di dok  “. Pardosa ho didok roham, na so tama be dohot? Ndang pola ala ni dosam, umbaen na sundat bongot. Ai nunga sae do dosam i, digarar Tuhan Jesus i. Naung sae, naung sae, naung sae do dosami. “  Dijangkon Jesus do pardosa na olo manopoti dosana na olo ro tu hamubaon ni roha  alana ndang dihalomohon Debata hamamte ni angka parjahat alai mulak ma nian parjahati tumadingkon dalanna na jahat i asa mangolu ibana ( bnd Hes 33 : 11)

 III.      Alani tangihon ma panjouon Na huhut pauba ma roham asa di urasi sian nasa dosam

Di Jakobus   4 : 8  “Pajonok hamu ma tu Debata, dung i pajonohonna ma tu hamu! Paias ma tanganmuna, hamu angka pardosa, jala pabontor ma rohamuna hamu angka na mardua roha!” . On ma jou – jou ni Debata tu hita jolma. Di soarahon do asa ro hita pajonokhon dirinta dugi pajonokonna ma tu hamu. Tangkas do ia Debata  na badia, na so adong marlaok dosa di Ibana. Ndang boi marsaor na badia tu na ramun.  Hombar tu pandohanon na bersedia do Debata manjangkon angka pardosa i di bagasan habadiaon Na.

Di ayat 18 nunga diontang Debata angka pardosa asa ro mardabu-dabu tu Debata. Hata mardabu –dabu di son tar tudos do i, sahalak terdakwa di Pengadilan. Dibagasan proses persidangan adong do dilehon hak tu terdakwa laho mambahen pembelaan. Suang songon i do panjouaon ni Debata tu angka padosa, unang sai mian di bagasan dosa i. Tung ringkot do ro tu Tuhan Jesus mengakui dosa dohot hasalaan. Unang ala ni mansai balga ta etong dosa i gabe so olo ro tu Ibana. Di dok do di ayat 18 i muse,  “Tung sura rara dosamuna songon abit bunga dapdap,  bontar do bahenonku songon itak; nang pe rara songon abit hasumba, gabe songon hapas do muse.” Songon dia pe jorbut ni dosa i  rade do Tuhan Jesus manesa angka dosanta.  Di I Johanes 1 : 9 didok do  “  Molo tatopoti angka dosanta, haposan do Ibana jala bonar, manesa dosanta jala paiashon hita sian nasa hageduhon.  Dibahen i tangkas ma ro hita tu Ibana, manopoti dosanta, asa disesa dosanta huhut dipaias hita sian nasa  hageduhon i.   Huhut togu-togu on na do ngolunta asa tongtong mangolu di bagasan habadiaon jala marparangehon ngolu na imbaru di bagasan Tuhan Jesus. Amen.

Panurat: Pdt. Dr. Esra Sinaga, M.Mis