JAMITA EXAUDI ~ HASADAON DI BAGASAN KRISTUS (JOHANES 17:20-26)

EVANGELIUM EXAUDI (TANGIHON-ALUSI)

MINGGU, 01 JUNI 2025

Nats: JOHANES 17:20-26

(Panurat: Pdt. Jeprianto Marbun, S.Th)

Pendahuluan:

Sada tiruan do na ni ajarhon ni Jesus tu hita dibagasan tangiangna andorang so bongot dope Ibana tu Getsemane. Parjolo, ditangianghon do angka sisean-Na, paduahon, ditangianhon do angka naporsea di pamaritaan ni sesean i di barita nauli. Sian on tangkas taboto tung mansai balga situtu do holong ni Jesus tu sisean i nang tu hita angka naporsea di pamaritaan di barita nauli. Dang holan angka sisesan-Na dipingkirhon Ibana, alai dohot do ganup halak na manjangkon barita nauli sahat tu nanaeng ro. Tangiang pangondianan ni Jesus on, i ma songon sada sihol ni roha-Na asa sada Huria ni Tuhan i songon sada pamatang ni Kristus, Ibana ulu ni Huria nang hita gabe ruasNa. Boha do hasadaon i asa mian di hita? Gomos do dipodahon di Hurianta Lutheran, Hasadaon i ndang na tabahen i alai sibasabasa do i nabinasahon ni Kristus di hita. Alani do di Jou hita marhite barita nauli, dipasada dibagasan sada pamatang ni Kristus.

“Tema: Hasadaon di Bagasan Kristus”

I.    Mian holong ni Debata di hita (Ay. 20-23)

Sian 3 Tohonan ni Kristus: Malim, Raja dohot Panurirang, sada sian natolu i, I ma hamalimon ido na ni ulahon ni Jesus boasa pola Ibana martangiang mangondihon sisean i dohot angka naporsesa dipamaritaon barita nauli, dohot sada tujuan asa sada angka naporsea. Hasadaon i dang na holan sekedar hasadaon di organisasi manang istitusi ni jolma, alai hasadaon na satondi di bagasan Kristus, Kristus ulu ni Huria nang hita gabe ruas-Na. Dipodahon do di Hurianta Lutheran, hasadaon i sibasabasa do i. Dang tuk gogonta manompa hasadaon i marhite gogonta sandiri, alai Tondi Porbadia mangula marhite Hata ni Debata dohot sakramen. Hasadaon i, I do gabe panindangi tu porbion bahwa Jesus Kristus naro sian Ama i. Gabe mangolu ma hita dibagasan holong ni roha dohot hasadaon, i ma idaon portibion holong ni Kristus mian di hita.

Alai, jotjot do ta ida masa parbolatbolatan, hagaoron, hagunturon di huria dohot di humaliangta. Boha do hita menyikapi on? Parjolo, ingkon ta angku i do bahwa hita halak pardosa di adopan ni Debata, na ringkot do hita di Asi ni roha na sian Debata. Paduahon, ingkon marsihohot do hita tu Hata ni Debata songon dasar ni hasadaonta, songon na ni ajarhon opunta si Martin Luther, Sola Scriptura  (Holan Hata ni Debata) ido prinsip na mamparsadahon hita dibagasan hasintongan. 

II.  Sihol do Roha-Na Rap dohot Hita Salelengnilelengna (ay. 24)

Didok Tuhanta Jesus Kristus Ibana mangalehon hamuliaon na sian Ama i tu Ibana tu hita (Ay. 22) Aha do lapatan ni i? Dibahen hita gabe anak-anak  ni Debata (Joh. 1:12). Nang pe jolma pardosa hita, torus bergumul mangalo dosa, alai hita nunga dipasintong, dipabonar marhite haporseaon dibagasan Kristus Jesus Tuhanta i jala dilehon tu hita hasangapon gabe anak-anak ni Debata hita. Dijou do hita asa mangolu gabe panondang dohot sira di tano on laho manggombarhon holong dohot hasintongan ni Kristus dibagasan ngolu siganup ari. Dilean hita kesempatan asa gabe parjambar di surgo hasonangan inganan Debata dohot gabe ingananta muse sogot molo marujung ngolunta sian tano on. Dang di igil Jesus sada sian hita asa mago jala mate dibagasan dosa alai hangoluan namanontong di ari parpudi ido dilehon di hita angka marnida hasangapon ni Ibana. Sangap dibahen hita jala arga asa mangolu hita di Ibana saleleng ni lelengna. Tangiang ni Jesus asa manang didia pe Ibana asa rap hita dohot Ibana (ay. 24). On do bagabaga na mansai uli napaposhon rohanta tu hangoluan namanontong, jala Kristus sandiri do mandok i, ndang saotik pe upaya ni jolma disi pasintonghon dirina tu hangoluan, alai semata-mata ala ni holong ni Kristus sambing do i. Nang pe ragam ta adopi tantangan dohot angka haporsuhon, hasusaan di portibion, adong do pangkirimonta tu ari nanaeng ro dibagasan hasangapon-Na bahwa hita pasti rap dohot Jesus nadibagasan hasangapon-Na. On do apul-apul, barita las ni roha di hita.

Halak naporsea tu Jesus dang hea kecewa nang pe portibion dang mananda Ama i, alai Jesus Kristus mangajarhon bahwa parbinotoan taringot tu Debata taruli holan marhite Jesus Kristus, marasing sian Kristus, dang tarbahen hita laho mananda Debata situtu, namarlapatan diluar ni Jesus dang adong jolma boe pajumpang dohot Debata. Sada ma rohanta, mangolu ma hita  dibagasan holong na sian Tuhan Jesus Kristus, asa margogo hita manghaholongi dongan jolma, nang pe maradophon musu. Holong i do margogoihon hita asa mangolu dibagasan hasadaon dohot dame. Holong ni Debata ido dasar ni haporseaonta. Holong i dang alani parulaonta, alai sematamata asi ni roha ni Debata di bagasan Jesus Kristus. Holong i do margogoihon hita asa mangolu gabe panindangi ni Kristus di portibion.

III.       Alani Sai Marsitangiangan Ma Hita

Jesus Kristus do malim di hita na mangondihon hita dibagasan hasadaon dohot holong ni roha. Hasadaonta dang holan na tu sesama suku Batak, budaya, status, sosial dohot angka lan na asing. Alai ala naung ditobus Kristus do hita marhite mudarna nabadai naung durus di dolok Golgata. Ringkot do hita manjaga hasadaon i marhite marsisesaan dosa maradophon dongan, huhut gomos maniop Hata ni Debata. Hasangapon na ni lehon ni Kristus di hita dibaen hita gabe anak-anak ni Debata. On do mambahen hita gabe mangolu marasing sian portibion, mararga hita di adopan ni Debata, ido pola di jou hita gabe anak hatiuron tu tonga-tonga ni portibi on. Holong ni Debata na naung tajalo ingkon do  mabaor nang tu donganta jolma, marhite manghangoluhon holong i dingolu siganup ari di tonga-tonga ni keluarga, di parkarejoan, nang humaliangta huhut manangianghon nasida. Holong i do tanda ni nampunasa ni Tuhan Jesus hita manaringan ditonga-taongaa ni ngolunta. Jesus do malim di hita, dibagabahon do tu angka na porsea na ingkon rap dohot Ibana saleleng ni lelengna. Dang adong na boe manirang hita sian holong ni Debata di bagasan Kristus Jesus Tuhanta i (Roma 8:38-39).  Molo pe ragam hagunturon ingot ma ma dijou do hita gabe sada dibagasan Kristus. Molo merasa dang mararga hita diportibion, Ingot ma mararga do hita di adopan ni Tuhan i, dilehon do tu hita hasangapon gabe anak-anak ni Debata. Molo tung golap pe portibion, ingot ma dijou do hita gabe panondang laho papatarhon holong ni Tuhanta Jesus Kristus di portibion. Amen!

 

Panurat: Pdt. Jeprianto Marbun, S.Th

Plt. Pendeta GKLI Resort Manduamas