JAMITA PARNINGOTAN NAMONDING: NA RO MA TUHANTA I (MARKUS 13:24-37)

Patujolo:

Di goari do Minggu sadarion, Minggu ujung taon parhuriaon jala sadarion do dijahaon di hurianta angka naung jumolo dialap Tuhanta  dibagasan sataon on. Mansai lungun do rohanta, marningot angka sisolhotta naung jumolo i. Sai taingot bohina, parengkelna, holong ni rohana, na mambahen tamba lungun ni rohanta. Alai ndang na manungguli sidangolanta umbahen na dipatupa huria parningotan on.  Alai  na paingothon hita, ia hita pe naeng alapon ni Tuhanta do muse,  asa dungo hita unang tarpodom , ai na ro do Ibana mangalap hita. Marhitehite jamita on didok do;

Tema: Na ro ma Tuhanta i

I.      I.    Ndang  taboto sadihari haroro Na i.

Uju di namanaek Tuhan Jesus tu banua ginjang, di natinuluthon ni angka siseanNa I Ibana manek tu ginjang, didok surusuruan I tu angka sisean I ” “ O hamu halak Galilea, aha ma sai jongjong hamu mamerengi dompak ginjang ? Anggo Jesus I, na tarhinsat sian lambungmuna tu banua ginjang I, na ro do Ibana sogot, songon na ni idamuna Ibana laho laho dompak banua ginjang “ (Ul.Ap.1;11). Laos songoni do hata ni Tuhan Jesus tu angka sisean Na di na manjamitahon taringot tu ari sogot, dung masa angka tanda-tanda nan i dok ni Tuhan I I doan nasida ma  Anak ni jolma I ro marhitehon ombun mantat huaso dohot hasangapon godang (Lukas 21;27). Laos di hatindangkon si Johannes do muse marhitehite pangukapon na jinalona sian Tuhan Jesus di Pulo Patmos didok “ Ida ma, na ro ma Ibana dibagasan ombun ! Idaon ni nasa mata do Ibana, nang angka naung manullang Ibana, gabe mangangguhi be ma saluhut bangso ni tano on mida Ibana. I ma tutu, Amen.(Pangukapon 1;7).

Marhitehite Hata on, ditogotogu do hita manghaporseai na ro do Tuhan Jesus muse mangalap hita sian portibion. Ai godang dope jolma na so porsea di si, nang songoni sian hita tongatonga ni hita halak Kristen.  Ai molo so porsea hita di si, tu hamagoan do jambarta sogot. Na pasti, ro do Tuhan Jesus padua halihon tu portibion. Andigan do haroroNa I ? Adong do piga-piga halak manang aliran na lipe (sesat) na hea manontuhon ari haroro ni Tuhan Jesus na paduahalihon i.  naparjolo sahali hira-hira di taon 150-170 M (masehi) didok si Montanius do “ na ro ma Tuhan Jesus  pajongjong Jerusalem na imbaru di taon 200 di Pepusa (Asia Kecil). Marpungu ma sude angka na mangihuthon ibana di taon 200 i paimaimahon, gabe kecewa ma sude jolma i. Si Mantanius on mangaku naung sinonggopan ni Tondi Porbadia, huhut naung manjalo pangukapon sian Tuhan i. alani dipodahon ma uju I, ala naeng ro ma Tuhan I, taparde ma rohanta marhitehite : unang be marhasohotan (tidak menikah), hidup sederhana, rade mate  martir (prioritas). Dilaon-laon ni ari gabe diputushon huria ma, na lipe (ajaran sesat ) do na niajarhon ni si Montanius (montanisme).

Di Negaranta sandiri hea do masa barita sisongonon, huingot na jolo sahala na manggoari diri na pandita mandok na ro ma Tuhan Jesus paduahalihon, marpungu ma sude angka na mangihuthon ibana di Bandung paimaimahon Tuhan I. ujung na gabe hona tangkup do pandita I, ala mangalipehon torop jolma. Dang  adong  umbotosa  manang sadihari haroro ni Tuhan I.diturpuk on tolu hali di surathon si Markus na so adong umbotosa manang sadihari haroro ni Tuhan I (ayat 32, 33 dohot 35) Jala Tuhan I pe didok do “ Alai anggo arina dohot sadiharina, dang adong na umbotosa , nang surusuruan na dibanua ginjang , nang Anak i pe; nda holan Ama i.(Markus 13;32). Sian on idaonta, hahomion ni Debata do I, ndang paboaon Na tu hita manang sadihari haroro ni Anak Na I tu portibion manopot hita. Alai didok si Paulus do tu huria Tesalonika “ Ai di boto hamu do tangkas, na songon panangko borngin do haroro ni ari ni Tuhan I (1 Tesalonika 5;2). Alani ingkon mangarade jala tongtong hita dungo ganup tingki.

II.   II.  Tagam jala dungo ma hamu.

Nda holan angka tanda do dipaboa tu hita, ia molo nunga masa angka tanda-tanda I, na jonok ne ma ari na.   Sahali disungkunthon sisean I do Tuhan Jesus, mandok; Paboa ma tu hami andigan masa I, jala dia ma tanda ni harorom dohot ajal ni hasiangan on ? (Matius 24;3 -12). Gabe dialusi Jesus ma nasida didok ma, Na ro ma angka panurirang pargapgap :  Jaga ma hamu sotung dililuhon halak hamu ,Ai lan do na ro sogot manoluk Goarhu, angka na mandok; Ahu do Kristus I, gabe torop lilu bahenonna,  Begeonta ma barita ni angka hamusuon dohot soara ni na marmusu, Ai na hehe ma bangso maralohon bangso, haleon dohot lalo marluatluat. Pasahathonna ma ham tu haporsuhon, pola pusaonna hamu gabe hosoman ni bangso saluhut na ma hamu alani Goarhu. Lam tu ngali na ma haholongon ni roha di jolma godangan.   Alai didok Tuhan I do, ndang I do pe ujung na.

Didok di ayt 28-29” Alai sian hau ara I ma guruhon hamu tudosanna. Ia dung martunasi punsuna jala rungkar bulung na, botoonmuna ma naung jonok partaonan las, suang le songoni, jumpa diida hamu masa angka ondeng, botoonmuna ma naung jonok hasosonggopna. Hau ara, tanaman special do on di Israel manang di Timur Tengah.  Hau na pir jala na angur , najolo dipangke Raja Salomo do on tu pembangunan bagas joro ni Debata na tinuhorna sian Tirus (2.Sam 5;11). Hau ara on jotjot dipatudos Tuhanta I tu bangso Israel dohot tu angka pemimpin agama. Di Markus 11;2 “ hona toru hau ara dibahen Tuhan Jesus ala so marparbue hape nunga tingkina marparbue. Na manggombarhon halak Israel do Tuhan Jesus di si. Ia halak Israel na so marparbue di haporseaon ingkon songo hau ara I gabe hona toru. Alai didok Jesus nangkin marguru tu hau ara, molo nunga naeng martunasi punsuna jala rungkar bulungna, pasti na jonok ne ma partaonan las. Lapatanna ni hata on, songoni ma nang haroro ni Tuhan Jesus pasti dang adong keraguraguan di si.

Songoni do nang umpama “ songon halak na marhuta sada na manadingkon jabuna , disagihon do huaso tu angka na posona, tu ganup siulaonna be, jala sijaga pintu I didokkon marjaga. (ay.34-35). Dang dipaboa tu sijaga pintu manang sadihari, jam piga, tanggal piga haroro ni tuanna I, alai didok do tu ibana, so tung jumpangsa hamu modom. Na nidok ni ayat on,  na ingkon ro do Ibana muse,  asa unang tarpadom hita.  Lapatanna unang tardapot hita lalap diparlalapan alani portibion, unang tardapot hita mangulahon dosa, unang tardapot hita mar debata sileban, mardatu, marbadai, pahatahata dongan, unang tardapot hita madabu tu ginjang ni roha. Alai dungo ma hita tongtong. Ala so binoto manang sadihari haroro ni Tuhan I, jala pasti do ianggo haroro Na, ingkon dungo do hita managam haroro na i.  Dungo : tinggil di sora ni Tuhan jala pahusorhusorhon Hata Na I di ngolunta asa mangula Tondi ni Tuhan ta di hita laho margogoihon haporseaonta di hasiaongan on.

Ditingki parasirohaon on, ta haburjuhon ma mangulahon ulaon na hombar tu hata ni Tuhanta. Ta paserep rohanta tu Ibana, gomos hita martangiang huhut benget hita mangadapoi siadopanta di hasiangan on. Ta haburjuhon ma tu bagas joro ni Tuhanta laho tu mangihon HataNa huhut manjalo hasesan ni dosanta sian Ibana marhite naposaNa.  Ai naeng boanon na do hita tu surgo I, hangoluan saleleng ni lelengna. Na pajumpang do hita muse dohot angka donganta, sisolhonta naung jumolo dialap Tuhanta. Sialani i: Sai burju ma ho rasirasa mate; dungi lehononku ma tu ho tumpal hangoluan I (Pangukapon 2;10 b). Amen.

Panurat: Pdt. Jon Albert Saragih, M.Th 

JAMITA MINGGU EXAUDI: DISURU DO ANGKA NAPORSEA GABE PANINDANGI TU PORTIBION (JOHANES 17:11b-19)

Patujolo:

Goar ni minggu sadarion, i ma Exaudi lapatanna Tangihon. Hombar tusi do dipaumbuk turpuk on (Joh 17), i ma tangiang Pangidoan ni Tuhan Jesus tu Debata Ama andorang so marsangap (tarsilang) Ibana. Dipardalanan sian bilut parginjang dung sun nasida marpanganon paskah i porlak na margoar Getsemene. Dipardalanan i do ditariashon Tuhan Jesus tu angka sisean i, taringot tu hakekat ni hubunganNa dohot Ama I na sada do Ibana dohot Ama I jala Ama I maradophon Ibana. Dijouhon do asa ditangihon Debata Ama Pangidoan ni Tuhan Jesus taringot tu sisean i asa diramoti jala asa sada nasida na sapunguan i, songon angka jolma na porsea muse hinorhon ni pamaritahonon ni angka sisean di haluaon na pinatupa ni Tuhan Jesus. Tung tangkas do sihol ni roha ni Tuhan Jesus pe na paingothon nasida anggiat diantusi huhut mangolu hombar tu tugas ni angka sisean dohot angka na porsea i siulahononna di portibi on dung partinading ni Tuhan Jesus. Hombar tusi ma di Evangelium di ari Minggu Exaudi sadarion di jouhon do tu hita luhut: Tema:

“DISURU DO ANGKA NA PORSEA GABE PANINDANGI TU PORTIBION”

I.   Ai ndang sian portibi on nasida.

1. Tangkas do sian mulana disangkapi Debata paluahon hita jolma sian gomgoman ni sibolis i, mamboan tu haluaon huhut mananda dalan hatigoran i. Dimulana nunga disuru Debata angka panurirang, patolhashon panurirangon dohot pandohan na ro ma Mesias na pinarbaga i, laho paluahon portibion. Marribu taon lelengna sai i do ditariashon anggiat dijalo hatiuron i. I do na dicatat ni Apostel Paulus di surat parmahanionna tu si Timoteus didok do: “Ai dipangido rohana do, naeng saluhut jolma malua jala sahat mananda hasintongan I”. (I Timoteus 2:4). Sangkap hatuaon i nunga dipataridahon Debata i di na sinuruNa anakNa na sasada i, i ma Tuhan Jesus tu portibion (Missio Dei-Pengutusan Allah) laho paluahon portibi on sian hamagoan alai asa taruli di hangoluan saleleng lelengna (bnd. Yohanes 3:16). Tulus do antong sangkap hatuaon i.
2. Molo tapamanat do di ayat 1–5, i ma tangiang ni Jesus taringot tu diriNa sandiri, na manghatindangkon diriNa sandiri tu Ama i na manjalo tugas ULAON–MISI na sian Ama I di portibi on asa papatarhon Ama I tu roha ni na torop na olo manjalosa, jala nunga porsea nasida, tarbukti do i sian pandohan ni Jesus di ayat 3 i na mandok: “Alai na mananda Ho, Debata na sasada I, na sintong I, dohot Jesus Kristus na sinurum, ido hangoluan na salelenglelengna”. Asa nunga taruli hangoluan salelenglelengna di angka na porsea i. Nunga di pasun Tuhan Jesus ulaonNa di portibi on marhite pandohan: “Nunga hupasangap Ho di tano on, ai nunga hupasidung ulaon na nilehonMi siulaonMu” (ayat 4). 
3. Mangihut muse molo tapamanat di udut ni turpuk on i ma di ayat 11-19 tangiang ni Tuhan Jesus asa diramoti nasida maradophon portibion ai pasti do hosoman ni portibi on nasida, ai ndang sian portibi on nasida songon Kristus na so sian portibi on (bnd Joh 1:10-11). Sian i ma parsuruon i mansai ringkot asa torop jolma mananda dalan hasintongan i. Parsuruon ni Debata Ama di Tuhan Jesus (Missio Dei) diuduti muse Parsuruon ni Tuhan Jesus tu angka sisean i (Missio Chirsti). Jala di tingki nuaeng on di suru Huria i do angka Parbarita Nauli (Missio Eklesia) anggiat torop jolma ro tu haluaon.

II.   Asa diramoti Debata nasida maralohon na jahat.

1. Dung manaek Tuhan Jesus tu banua ginjang jala hundul disiamun ni Debata Ama, di hata na asing di goari “Sessio et Dextram Dei,” disi do Ibana marhabangsa rap dohot Ama i. Hombar tu Heber 1:3 na mandok: “Sillam ni hasangaponna dohot suman ni hadirionna do Ibana, jala diusung do parluhutan i marhitehite hatana na marhagogoon i. Jala dung dipatupa Ibana haiason sian angka dosa, hundul do Ibana tu siamun ni Hatongamon na di ginjang i.” Sian ayat on tangkas do dipaboa na hundul do Tuhan Jesus tu siamun ni hatongamon na di ginjang i, i ma Debata Ama.” Disi do Ibana marhabangsa huhut manangianghon (berdoa syafaat) angka na porsea asa mangolu di hasadaon dohot di holong ni roha huhut maniru teladan ni Jesus, huhut membela angka na porsea i di adopan ni Debata, ai diboto do hagaleaonta na muramura madabu tu bagasan dosa. I do umbahen didok Apotel Johanes: “Ale angka anaha, umbahen husurat on tu hamu, asa unang mardosa hamu. Molo tung adong na mardosa, adong do pangondianta tu Ama i, i ma Jesus Kristus, partigor i.” (I Johanes 2:1). 
2. Di ayat 11 didok Tuhan Jesus do: “Ndang diportibi on be Ahu tu joloan on, diportibi on do anggo nasida; na ro do Ahu manopot Ho, Ale Amang Nabadia, ramoti ma nasida dibagasan goarMu, angka na nilehonmi tu Ahu, asa sada nasida songon hita “. Dipangidohon Tuhan Jesus do tu Ama I, asa diramoti angka na porsea i. Marhahonaan do pandohan on tu Tangiang na ni ajarhon ni Jesus tu angka sisean i, i ma di tangiang pangidoan i; na mangidohon pangaramotion dohot parmahanion ni Debata di hita ganup ari, termasuk mangaramoti unang madabu tu pangunjunan jala asa malua sian pangago. Ragam do bentuk ni parmaraan di portibi on na niadopan ni huria ni Tuhanta, alai tarlumobi ma i pangaramotion sian angka ajaran na sesat na boi manghorhon perpecahan di huria.
3. Molo tapamanat muse di udut ni turpuk on (ayat 21) dipatorang do, na dihasiholi Tuhan Jesus do asa sada nasida saluhutna marhite pandohan: “songon Ho, ale Amang, di bagasan Ahu jala Ahu di bagasan Ho, songon i ma nang nasida di bagasan Hita, asa porsea portibi on, Ho marsuru Ahu.” Tangiang ni Jesus i, mangidohon asa angka na porsea i, atik pe berbeda warna kulit, bangso, hata dohot berbeda di organisasi Gereja, alai sude ma nasida nian sada huhut mangolu dibagasan na masihaholongan.
4. Hasadaon ni angka na porsea jala na badia (ut omnes unum sint), i ma hasadaon secara universal hinorhon ni haringgason mangaradoti hasadaon ni Tondi, na pinadomu ni dame (bnd Epesus 4:3). Hasadaon na pinadomu ni Tondi ndang terbatas i, ndada ala ni sada organisasi Gereja manang persekutuan. Ndang apala na ingkon sada organisasi manang huria asa patuduhon na masihaholongan, alai lobi sian i parsaoran ni na porsea i, jala ingkon do na ni rahut hasadaon ni Tondi dibagasan Tuhan Jesus. Hasadaon ni Tondi i ma parbue ni na tangkas mangolu di panandaion di hata ni Debata. Pengajaran na tangkas na marojahan tu Hata ni Debata. On do padaohon mara sian tongatonga ni huria i nang songon maradophon portibi on.
5. On do hataridaan ni hasadaon ni na porsea di portibi on jala on ma na digoari Gereja yang Tidak Nampak (Invible Church). Alani i andul do hataridaan ni holong na ni rahut ni hasadaon Tondi di bagasan Kristus sian hasadaon na sekedar na ni rahut ni na saorganisasi manang na sahuria.

III.   Disuru do hita manghatindangkon hasintongan i tu portibion.

1. Ciri khas ni huria na parjolo (gereja mula-mula) i ma “saroha saoloan.” Di Ulaon ni Apostel 4:32 didok “Alai saroha saoloan do angka na porsea na sapunguan i; jala ndang adong nanggo sada sian angka paradongan na mandok: Hapunjunganna artana i, hatopan do i saluhutna dietong. Tarida do parbue ni tangiang ni Jesus dung manaek Ibana tu banua ginjang. Ai di huria na parjolo jumpang do sada ni roha dohot na masipaoloan. Dipadao do angka roha diri/egois, jala ndang pola dietong na di ibana be gabe pangumpolanna alai disagihon do i tu angka na marhahurangan. On ma hataridaan tugas ni angka na porsea (Huria) di portibi on. Asa tugas naung pinaojak ni Tuhan Jesus tu Huria na di tano on i ma: Marparsoran Partondion (Koinonia), Marpanindangion di goar ni Tuhan Jesus (Marturia) dohot Mangulahon holong ni roha tu angka dongan/sesama (Diakonia). Hombar tu si ma Visi ni GKLI: “Menjadi Gereja Lutheran yang Dewasa, Mandiri dan Misioner”. Marhite sian Visi on tarida ma tujuan ni GKLI na tang (dewasa) secara partondion jala hot di teologi Lutheran, na Mandiri (tuk/mampu manarihon angka haporluanna, baik secara organisasi, sumber daya pelayan gereja dohot secara keuangan). Suang songon i tugas Misioner/Mengutus jala Marbarita Nauli (di bagasan huria songon i tu luar ni GKLI). Na ingkon rap mardalan do na tolu on, asa rimpas peran dohot tanggung jawab ni na porsea (huria GKLI) di tano on.
2. Alani ndang jadi hita padaohon diri/menyingkir sian portibion songon na niulahon ni na deba sian kalangan ni Kristen. Alai di hita hurianta GKLI ingkon do saluhut na hita (Parhalado nang ruas ni huria) marpanindangion hombar tu perananta ganup marsada sada. Asa nang marhite naung pinarbadiaan ni Kristus diriNa humongkop hita (ayat 19), songon i ma nang hita ganup mangolu dibagasan habadiaon asa nang marhite sian i gabe tau hamuliaon di Debata hinorhon ni angka na tarboan tu hasintongan i. Amen!

 

Soli Deo Gloria 😊😊 😊

JAMITA ARI HANANAEK: TUHAN JESUS MANAEK TU BANUA GINJANG (LUKAS 24:44-53)

 Patujolo:

Ari sadarion, na marningot do hita di hananaek ni Tuhan Jesus tu Banuaginjang, sude do halak Kristen di portibion patupahon parningotan i. Ulaon ni Debata do i na laho manarihon ngolu ni partondionta. Molo tung godang pe jolma na so manghaporseai hananaekna I, angka jolma na mangasahon pingkiranna do i dohot na laho mangalipehon haporseaonta. Unang ganggu rohanta alani angka i, natutu situtu do Tuhan Jesus manaek tu Banuaginjang laos i do sidohonon ni jamita on di hita, Thema:

“TUHAN JESUS MANAEK TU BANUAGINJANG”

 I.                Songon na nidok ni panurirang di padan na Robi.

Di ayat 44, didok Tuhan Jesus do tu angka siseanna “ingkon jumpang do saluhutna na tarsurat taringot tu Ahu, di Patik ni si Musa, diangka panurirang i, nang di buku ni Psalmen. Sian na robi nunga tutu disurirangkan angka panurirang taringot tu hadirion ni Tuhan Jesus, sian hatutubuNa, ulaonNa, SitaononNa, hamamateNa na diparsilangkon, haheheonNa sahat nang tu na manaek Ibana tu banuaginjang (Pslm 68;19) Dison do idaonta hasintongan ni Debata na laho paluahon portibi on sian hamagoan. Hasintongan i ma, Tuhan Jesus mate tarsilang jala hehe diari patoluhon laho paluahon jolma sian dosa. Tung asing do parbinotoan ni portibion taringot tu hasintongan, jala suhar do diroha nasida hasintongan na sian Debata, (1 Korint 1;18 “haotoon do hata na taringot silang i di roha ni angka na laho mago). Tung so tarbahen jolma manesa dosana marhitehite ulaon na denggan manang angka cara-cara na asing, tung sisoada do i di adopan ni Debata. Titus 3;5 “ndada ala ni ulaonta hatigoran, umbahen na dipalua Ibana hita; tung sian asi ni rohana do.

Dang diantusi angka sisean i dope na nidok ni Tuhan Jesus na mandok “ingkon jumpang do saluhutna na tarsurat taringot tu Ahu” (ayat, 45). Hata on nunga marulakulak dihatahon Tuhan Jesus tu angka SiseanNa. Alai ndang diparrohaon jala ndang dipahusorhusor dibagasan rohanasida. Mungkin ndang diantusi pandohan I, ala tarpusat roha nasida holan tu pardagingon, Matius 20;20-21 marpangidoan ina ni anak ni si Sebedeus rap dohot angka anak ni nadua i, i ma si Johanes dohot Jakobus asa di pahundul sogot sada tu siamunNa jala na sadanari di hambirangNa. Alani i ndang dapot roha nasida dia do tujuan ni na nidok ni Tuhan Jesus. Songon i do nang hita molo so talehon do rohanta manangihon dohot pahusorhusorhon Hata ni Debata na tajaha manang na tabege, tung so taantusi sangkap ni Debata di hita. Alai molo sai tapahusorhusor do Hata I dirohanta urupan ni Tuhanta I do hita mangantusi jala mameop HataNa, songon hata ni Tuhan Jesus tu si Maria “Sada do na ringkot! Dipillit si Maria do tohap na uli I; ndang sibuaton i sian ibana (Lukas 11;24).

Tuhan Jesus manaek tu banuaginjang, na tutu situtu do I, dihatindangkon angka sisean I do hananaekNa I, laos dipasupasu do angka sisean I huhut manaek Ibana dipanotnoti nasida (Ulaon ni Ap. 1;9). Alani unang ganggu rohanta di hadirion ni Tuhan Jesus. jala ingkon masa do sude nanidok ni Tuhan i.

II.             UlaonNa manaek tu banuaginjang.

Parjolo: Marsuru Tondi Porbadia tu angka na porsea. Tangkas do didok Tuhan Jesus taringot tu ulaonNa tu banuaginjang ima na laho marsuru Tundiporbadia tu angka na porsea di Ibana. Terbatas do kemampuanta mangantusi taringot tu Debata nang dohot angka ulaonNa di portibion nang di hita saluhutNa. Alai marhitehite Tondiporbadia na sinuruNa, i do mangajari hita na laho mangantusi ulaon ni Debata di hita nang mangajari portibion taringot tu Dosa dohot taringot tu hapintoron dohot taringot tu uhum (Joh 16;8).

Jadi molo so manaek Tuhan Jesus tu banuaginjang dang suruonNa Tondiporbadia secara khusus tu hita angka na porsea. Paduahon: Parade inganan di hita angka na porsea. On do hasurungan ni angka na porsea tu Tuhan Jesus sian angka na so porsea. Diangka na porsea, diparade do inganan di ari sogot di banuaginjang inganan ni Tuhan i. sude do hita jolma ingkon maninggalhon portibion alai martua do ngolu ni angka na porsea ala naung diparade Tuhanta ingananta di banua ginjang. Di Johanes 14;3 didok “Jala laho pe Ahu mangarade inganan di hamu, sai mulak do Ahu mangalap hamu, asa rap hamu dohot Ahu!

Patoluhon: Manangiangkon hita. Ditangiangkon Tuhan Jesus do hita angka na porsea tu Ibana, ai diboto Tuhan I do huaso ni portibion na sai mangago na porsea jala manegai parsaoran nasida tu Debata nang tu dongan sama nasida. Di Joh 17;9 didok “ndang apala portibion hutangiangkon, nasida on do angka na nilehonmi tu Ahu, ai Ho do nampuna nasida. Taida dison marhitehite tangiang ni Tuhan Jesus diondihon do angka naporsea tu Ama I. Didok do muse di Joh 16;11 tangiang ni Tuhan Jesus “Ale Amang na badia, ramoti ma nasida dibagasan goarMu, angka na nilehonmi tu Ahu, asa sada nasida songon hita! Hasadaon di bagasan goar ni Tuhan Jesus do nahinalomohon ni Tuhan I di hita angka na porsea. Dibagasan hasadaon I do hita margogo, dipargogoi Tuhan i.

III.           Antong Haposi ma Tuhan Jesus naung manaek i.

Dipatuduhon angka sisean i do sikap nasida maradophon Tuhan Jesus naung manaek tu banuaginjang. Sude do nasida marsomba tu Tuhan Jesus (ayat 52). Marsomba tu Tuhan Jesus I do hataridaan ni halak na manghaposi Tuhan Jesus. Tuhan Jesus gabe parsigantungan ni ngoluna, ndang adong angka debata na asing bahen parsigantungan dingoluna.  Taida muse, didok di ayat 53 “jadi tongtong ma nasida di joro I mamujimuji Debata. Dipatuduhon sisean I do roha na setia pasangaphon Tuhan Jesus dibagas joro ni Debata songon nanidok ni Tuhan I tunasida. Diulahon nasida do Hata ni Tuhan I dibagasan las ni roha.

Paingothon hita do on, hita angka naung pinamonang ni Tuhan Jesus dohot na parade inganan di hita sogot di surgo I, talehon ma rohanta mamujimuji goar ni Tuhanta I, tarlumobi ma mangalehon rohanta ro tu bagas joro ni Debata. Dibagas joro ni Debata do hita managihon HataNa huhut manjalo hasesaan ni dosa sian naposo ni Debata. Dijouhon Debata do hita tongtong asa ro hita tu bagas joroNa I, asa talehon ma rohanta. Amen.

 Soli Deo GLoria :) 

JAMITA MINGGU ROGATE: MANGHAHOLONGI IDO PATIK NI DEBATA (JOHANES 15:9-17)

        Turpuk evangelium on, i ma sada bagian sian pandohan ni Jesus di na martading hata Ibana jala naeng adopanNa ma hamatean i, tarlumobi ma naeng tadinghonon ni Jesus portibi on dung ditaluhon hamatean i. Jadi turpuk on mangondolhon holong ni roha tu angka siseanNa nang pe angka sisean i ingkon mangadopi mansai bahat parungkilon andorang di portibi on paboa nasida siihuthon Jesus. Patik na sian Jesus i ingkon do radotan ni sisean i, i ma patik na ingkon masihaholongan huhut rade sumeahon hosaNa humongkop angka alealeNa songon na pinatuduhon manang binahen ni Jesus. Alani, marhite patik ni Jesus i, naeng tagurithon ma thema ni turpuk on, i ma:

                             “Tema: MANGHAHOLONGI I DO PATIK NI DEBATA”

        Hombar tu poda Lutheran somalna do angka nauli na denggan i marbona, marmula, marharoroan sian Debata di bagasan Jesus. Jala somal do tatangihon pandohan sian Debata sambing do haroroan angka nadenggan i (Causa Prima). Lapatanna: Debata do na manjadihon sude na denggan i. Ndang holan tingki panompaon langit dohot tano on, alai tung saluhutna do tahe sun denggan ditompa Debata (1 Musa 1).

        Ditompa Debata do jolma na parjolo i tumiru rupa dohot tudos tu pangalahoNa (Imago Dei). Alai gombaran ni Debata na adong di bagasan diri ni jolma i gabe sega dung madabu jolma i tu dosa. Jala nang pe naung mardosa jolma i, alai tong do Debata na parjolo sahali manjou, mangalului, manjumpangi, mandapothon huhut marhobas di si Adam dohot Hawa, i ma marhite na dipatupa Debata angka pahean di nasida (1 Musa 3:21). On ma sada bukti paboa Debata sambing do haroroan ni angka na uli na denggan i. Debata do parholong ni roha situtu nang pe jolma manisia i, tarlobi ma bangso napinillitNa jotjot mardosa jala mangalo tu patik ni Debata. Debata do tutu naparjolo sahali patupahon nadenggan i, ala i do sintuhu (hakekat) bangko ni hadirionNa. Debata ma tutu na mangkaholongi jolma manisia pardosa marhite na marsuru suruanNa, angka Panurirang, Apostel, jala tarlobi ma marhite haroroNa di bagasan Jesus. Di turpuk on tangkas tarida holong ni roha ni Debata na gabe patik ni Jesus tu angka sisean jala ojahan ni saluhut na denggan maradophon jolma pardosa.

1.     Holong Ni Debata Do Ojahan Ni Parsaoran:

       Dung madabu jolma i tu dosa, gotap ma parsaoranna tu Debata dohot donganna jolma. Isara si Kain mambunu anggina si Habel (1 Musa 4:8). Pangalaho si songon i ditean pinompar ni jolma manisia pola do marsundutsundut rasirasa nuaeng, sian sundut na sada ro di sundut na sada nari. Di ngolu marsasahalak, houm manang punguan ro di torop bangso jotjot tubu hosom, late, sogo ni roha tarlobi mamunu donganna jolma. I do umbahen ndang margogo be jolma i padengganhon parsaoranna. Jala i do umbahen na ro Debata parholong i di bagasan Jesus tumopot angka jolma pardosa.

        Di turpuk on, diondolhon Jesus paboa AmaNa i do na parjolo mangalehon manang manghaholongi, i do umbahen nasinuruNa i Jesus ro tu portibi on humongkop angka pardosa. Jala dung dijalo Jesus holong ni roha na sian AmaNa i, dilehon ma muse holong i tu siseanNa huhut dipatihi Jesus sisean i asa mian di bagasan holong ni rohaNa (ayat 9). Jadi marhite pandohan ni Jesus di ayat on, tarida ma tangkas na sian Debata sambing do saluhutna na denggan i. Boi do tagombarhon (tarumushon secara sederhana), i ma holong ni roha i tongtong do dimulana marharoroan sian Debata Ama na di ginjang, jala holong ni roha ni Ama i marhitehite Jesus tuat tu jolma manisia pardosa (Top Down). Ndang na boi sabalikna, sian jolma manisia manaek tu Debata di Ginjang (Bottom Up) hombar tu pandohan ni Jesus di turpuk on. Tontu saluhutna i masa ala na so margogo be jolma manisia pardosa i manghaholongi Debata dohot donganna jolma. Tutu do i molo parnidaan sambolus ayat on, hira na diondolhon Jesus do tu sisean i jumolo asa diradoti patikNa, dung pe i asa mian nasida di bagasan holong na jinaloNa sian AmaNa i (ayat 10). Hape ingkon jamot do tajaha alana ayat on holan ondolan Jesus sambing do tu sisean paboa na sai tontong do Jesus i mian di bagasan holong ni AmaNa i umbahen nadiradoti patikNa. Jala pandohan on ma na gabe hataridaan na sun denggan taringot parsaoranNa dohot AmaNa i, songon nasomal didok, hasadaon di bagasan dua hadirion.

     Diondolhon Jesus i do molo sai tontong mian sisean i di bagasan holong ni roha ni Jesus i, manghorhon las ni roha ma i di Jesus i sandiri, jala gok ma nang las ni roha ni angka siseanNa i (ayat 11). Gariada las ni roha ni sisean i gabe sun denggan nang pe siseanNa i ingkon mangadopi bahat parungkilon namansai dokdok situtu marhite nasumeahon hosa. Jala pandohan las ni roha ni Jesus di ayat on, paingothon hita ma muse di angka pangajarionNa, i ma paboa na sai tontong do adong masa angka las ni roha godang ni par Banua Ginjang molo adong angka pardosa i napaubahon dirina (Ida, Lukas 15:1-31). Lapatanna, parbinoto do Debata di angka na masa di siseanNa. Alani, asa jumpang las ni roha ni Jesus di bagasan diri ni siseanNa i ingkon do sisean i mangaradoti patikNa, I ma patik masihaholongan songon Jesus i manghaholongi nasida (ayat 12). Holong ni roha ni Ama i dilehon tu Anak i jala dilehon Anak i muse tu sisean i. Saluhutna i paingothon hita di hasadaon na sun denggan hombar tu tangiang pangondianan ni Jesus (Johannes 17:1-26) hombar tu holong na nipatikkon ni Jesus i. Jadi na sai tontong do holong ni roha i marharoroan sian Ginjang tuat tu jolma manisia.

2.     Holong Ni Debata Do Ojahan Ni Nasumeahon Hosa Humongkop Alealena

      Patik ni Jesus taringot tu holong ni roha i tung mansai andul do marasing sian na masa di parngoluan ni hajolmaon rasirasa nuaeng on. Ala mansai tullom situtu do pangajarionNa mardomu ala holong na nipodahonNa tung mansai bulus, ndang na marsipalensem, tung polin situtu, tarlobi holong na rade sumeahon hosana humongkop alealena (ayat 13). Saurdot manang na sai rap do holong na pinodahon ni Jesus, i ma holong di angka pandohan huhut di pambahenan (teoritis dan sekaligus praktis). Lapatanna, holong i ingkon do ditangihon, dipatubegehon huhut diulahon angka siseanNa. Jala na so tupa angka sisean i marpangalaho songon angka si tuan natorop uju i, na sai holan longang sambing di na umbege impola holong hombar tu na niajarhon ni Jesus i, i ma taringot tu Patik Raja jala parjolo i, manang na somal digoari Hukum Emas/Golden Rule (Mateus 22:37-39, Markus 12:28-34, Lukas 10:25-28). Jala tutu do, Patik Raja na niajarhon ni Jesus i na sai na tontong do i manghorhon halongangan di torop halak na marsagap, di torop angka pangajari Moral dohot Etika rasirasa nuaeng di portibi on.

        Di partikkian modern sinuaeng on, mansai ringkot situtu do holong na pinatikkon ni Jesus i di ngolu parsaoran di si ganup ari. Nang di ngolu ni angka namaraleale, na sahuria manang saluhutna halak Kristen. Asa dao ma holong na marpangansi, holong na gok gabus sian diri ni saluhut sisean ni Jesus i rasirasa nuaeng. Ala tung mansai jorbut situtu do holong si songon i ala marharoroan sian si bolis najahat i, si bunu jolma do ibana jala ama ni gapgap (Johannes 8:44). Holong na pinatikkon ni Jesus, tung manghorhon gok las ni roha do, nang pe ingkon sumeahon hosa humongkop aleale (songon angka pandohan di Buku Ende no. 519).

3.        Holong Ni Debata Do Ojahan Ni Pamilliton Ni Sisean Dohot Ojahan Ni Tangiang

         Diulahi Jesus muse pandohanNa na mandok paboa na tardok ma sisean i alealeNa molo diulahon patikNa i (ayat 14). Ndang goaron ni Jesus be sisean i anak somang ala ndang diboto anak somang na niula ni indukna. Pandohan anak somang dison, hombar tu angka na masa do i uju i. Jala somalna do angka anak somang uju i holan sisuruon ni indukna sambing. Ndang adong nanggo otik hak kebebasan di ibana, nang maradophon dirina sandiri, tarlobi ma maradophon indukna. Jala ingkon unduk situtu do anak somang i manang na aha pe siulahononna di bagasan manipat sadari saborgin, manang gok 24 jam ingkon rade suruon ni indukna. Lapatanna, sadihari jala di dia pe i, ingkon do ulahononna angka patik ni indukna nang pe so diantusi, so diboto manang tu dia ibana lao huhut patupahon angka na hombar tu patik indukna i.

        Di ayat on, ndang goaran ni Jesus be angka sisean i anak somang. Gariada dijou manang tardok ma sisean i aleale ni Jesus ala dohot do sisean i umboto angka ulaon ni Ama i songon naung pinaboa ni Jesus tu nasida. Ala saluhut na tinangihon ni Jesus sian AmaNa nungga dipasahat tu siseanNa (ayat 15). Lapatanna, na sai tontong rap Jesus dohot sisean i di bagasan hasadaon i do umbahen na rap do umboto taringot tu angka siulahonon nasida tarsongon angka na solhot mardongan manang maraleale (patudos Poda 17:17). Diuduti Jesus do pandohanNa, paboa na so sisean i na mamillit Ibana. Alai Jesus i do namamillit sisean i jala dipadiri asa laho marpurbue jala asa mian parbuena. Jala dilehon tu sisean i nasa sipangidoon nasida sian Ama i marhitehite goar ni Jesus (ayat 16). Hombar tu ayat on, tangkas tarida ondolan ni Jesus songon panindangion ni Bibelta i, i ma paboa Debata sambing do haroroan manang mula ni angka nadenggan i (Causa Prima) hombar tu angka hatorangan na di ginjang i, songon i nang di pamilliton ni sisean i. Jesus do namamillit siseanNa gabe alealena jala asa lao marparbue. Lapatanna, marparbue di na naparohon Harajaon Ni Debata, di na marbarita na uli, mambaritahon haluaon tu saluhut jolma manisia di portibi on.

    Alai saluhut ulaon na mamaritahon barita na uli i, ndang marparbue manang ndang manjadi i molo ndang na martangiang, ndang mangido sisean i tu Ama i marhitehite goar ni Jesus. Jadi sahali nari, tung tangkas situtu do tarida marhite ayat on, tung sun denggan do hasadaon manang parsaoran ni Ama, Jesus dohot sisean i. Ditangihon Ama i do Jesus jala ditangihon Jesus i do siseanNa. Songon Jesus namangaradoti angka patik ni AmaNa, songon i do sisean i ingkon do mangaradoti patik ni Jesus i. Jadi hasadaon i tung tarida situtu do i di bagasan tangiang na gabe pusupusu di angka ulaon partondion ni siseanNa rasirasa nuaeng, i ma ruas ni Huria, saluhutna halak Kristen di portibi on. Jala angka tangiang i sai na tontong do i marharoroan sian haporseaon na nilehon, na nibasabasahon ni Ama marhitehite goar ni Jesus di bagasan huaso Tondi PorbadiaNa tu saluhut angka siseanNa.

        Alani i sude ma hita ruas ni huriaNa, tarsongon halak Kristen na ingkon do hita mangolu jala olo pangoluhon ngolu partangiangan i di ngolunta si ganup ari, nang di ngolu marsasahalak, punguan, tarlobi ma angka Huria i na gabe panindangion ni hasadaon dohot Debatanta di portibi on. Saluhutna do hita na tarrajum sisean ni Jesus i ingkon sipartangiang, gabe sitindangi ma hita saluhutna angka siseanNa, patuduhon hasadaon parsaoran dohot Ibana, Debata na manghophop alealeNa, naung sumeahon hosaNa humongkop hita angka pardosa. Didok apotel Jakobus: Antong masitopotan dosa ma hamu dohot masitangiangan, asa malum hamu. Na margogo situtu do tangiang ni partigor, molo dihaburjuhon... (Jakobus 5:16). Alani, naeng ma gabe sipartangiang hita songon pandok apostel Paulus (1 Tesalonika 5:17). Alani, burju ma hita saluhutna martangiang, mangido tu Ama i marhitehite Goar ni Jesus i asa marparbue hita jala asa mian parbuenta i. Jala dilehon Debata angka natapangido, tarlobi asa margogo hita saluhutna mangaradoti patik ni Jesus i, i ma patik masihaholongan, hita sama hita (ayat 17) songon Jesus naung mamillit jala manghaholongi hita saluhutna. Amen.

 

Soli Deo Gloria :) 

 

 

JAMITA MINGGU EPIPHANIAS: PANDIDION NA BADIA (MARKUS 1:4-14)

Hatorangan ni Turpuk:

Dijamitahon si Johanes Pandidi do taringot tu hamubaon ni roha. Mansai torop halak Jahudi na ro mandapothon ibana dung dibege nasida jamitana i. Didok si Markus do di Evangelium on, pola ruar do “sude pangisi ni tano Judea ro di sude halak Jerusalem manopot ibana” (ayat 5a). Dia do huroha jamita ni si Johanes umbahen apala tung sude ro halak mandapothon ibana? 

Na parjolo sahali dipatorang do di turpukta on, na dijamitahon si Johannes do pandidion hamubaon ni roha. Jala didok muse, ia pandidion i mangkorhon hasesaan ni dosa do (4). Na marlapatan ma i, molo dung tardidi sasahalak dapotan hasesaan ni dosa ma ibana sian Debata. Alai nang pe songoni, ganup halak na ro mandapothon si Johannes, ndanda manigor dididihon ibana. Jolo ditangkasi do ganup halak na ro i marsadasada manang na tutu situtu do nasida na olo marhamubaon ni roha. Sian dia ma dapot hita pangantusion sisongoni? Di turpuk on, di ayat 5b, didok do songon on: “dipandidihon do nasida di batang aek Jordan dung ditopoti be dosana”. Pandohan “dung ditopoti be dosana”, na marlapatan ma i na jolo tangkas do diboto dohot dirajumi ganup halak na ro i, na jolma pardosa na dangol do nasida, dohot silaosi patik ni Debata. Ihut tu si muse, na ingkon disolsoli nasida do nasa dosa dohot pangalaosion nasida i, jala ditopoti di adopan ni Debata. Dung i pe asa rade si Johannes mandididihon nasida. Hinorhon ni i talup ma ganup na tardidi i manjalo hasesaan ni dosa do sian Debata.

            Ra, olo do sungkunsungkun rohanta. Dia do dalanna umbahen mangkorhon hasesaan ni dosa pandidion i? Tung margogo ma aek manesa nasa dosa? Tontu dapot roha do sungkunsungkun si songon i. Alai songon na nidok ni turpukta on di ayat 4 i, mansai tangkas didok: ia pandidion i i ma pandidion hamubaon ni roha. Jala dipatupa i, laho pasesahon dosa. Ia si Johannes naposo na pinillit ni Debata do ibana. Sahalak panurirang na sorang di si Sakarias dohot si Elisabet (Lukas 1:7). Songon sada panurirang, holan hata na sian Debata do sipasahaton ni i. Jala Debata do na pasahathon ulaon pandidion i tu ibana. Haposan do hata ni Debata. Jala ndang hea tubu gabus di Debata. Jadi molo didok hata ni Debata pandidion i laho pasesahon dosa, tontu na tutu situtu do i. Jala hinorhon ni hata i do umbahen na margogo pandidion i manesa dosa ni jolma.

Dung sidung si Johannes mandidihon pandidion nabadia i, dijamitahon ibana do muse taringot tu haroroni sahalak na gumogo sian ibana. Didok ibana songon on, “Na ro ma sian pudingku na gumogo sian ahu; na hurang tama do ahu paunduk ahu mangkarhari tali ni sipatuna” (Markus 1:7). Jala didok ibana muse, “Aek do hudidihon tu hamu; alai Tondi Parbadia do didihononna tu hamu” (Markus 1:8). Ia na gumogo na naeng ro i, songon na nidok ni si Johannes Pandidi, i ma Tuhanta Jesus, Sipalua

i. Ibana do na mandidihon Tondi Pardia tu ganup halak na porsea. Alai andorang so dididihon Jesus Tondi Parbadia i, ro do Ibana mandapothon si Johannes asa dididihon Ibana. Di mulana i ndang ditolopi si Johannes pangidoan-Na i. Ai tangkas do didok si Johannes, na gumogo do Jesus i sian ibana. Tung mangkarhari tali ni sipatuNa pe ibana ndang tama. Na marlapatan ma i, tung gabe hatoban ni Jesus pe si Johannes ndang tama. Dia alana? On do! Ia mangkarhari sipatu, ulaon ni hatoban do i. Jala ndang tung hea sasahalak, manang sada sisean pe, mangkarhari sipatuni sada guru. Holan hatoban do na mangulahon i. Na hinangkam ni pandohan on, tung na so tama do si Johanes tung sura pe ibana holan gabe hatoban ni Jesus. Alani i do umbahen didok si Johannes muse, di na ro i Jesus naeng padidihon Dirina, “Ahu do nian patut didionMu, hape Ho ro mandapothon ahu” (Mateus 3:14). Alai ro do hata ni Jesus mandok tu si Johannes, “Songon i ma jolo! Ai tama do tapajongjong nasa hatigoran!” (Mateus 3:15). Na marlapatan ma i, na ditolopi Jesus do pandohan ni si Johannes. Jala na tutu situtu do na nidok na i. Tung na so tama do si Johannes mandidihon Jesus. Ai Anak ni Debata do Jesus i. Nabadia. Ndang adong dapot dosa di Ibana. Alai dia ma pandok ni Jesus i? “Songon i ma jolo! Ai tama do tapajongjong nasa hatigoran!” Na marlapatan ma i, na unduk do Jesus tu Hata ni Debata. Unduk tu sangkap ni Debata. Sipangoloi di Hata ni Debata.

            Alai dia ma sangkap ni Debata umbahen na ingkon didihonon ni si Johannes Jesus? Songon naung tinariashon di ginjang, na mangoloi Hata ni Debata do Jesus. Alai dia do hinorhon ni pangoloion na i? Manang, dia do sangkap ni Debata umbahen na ingkon tardidi Ibana? Songon pandok ni Jesus tu si Johannes, “Ai tama do tapajongjong nasa hatigoran!” “Hatigoran”, molo di hata Gorik (Yunani), didok do i “dikaiosunen”. Na marlapatan ma i, “kebenaran”, “hasintongan” manang “hatigoran” di hata Batak Toba. Di buku ni si Musa, didok do “Jadi porsea ma si Abram di Jahowa, gabe hatigoranna do i dietong Jahowa.” (1 Musa 15:6). Dia do lapatanni hatigoran na nidok na dison? Songon na tangkas taboto, ndang marianakkon si Abraham dohot parsondukna si Sara. Nunga mansai matua nasida. Ndang holan i, alai si Sara sada parompuan na hol do ibana. Molo di hata Indonesia, didok “mandul”. Lapatanna ndang dung talup bortian ni si Sara gabegabean sada dakdanak mulai sian habajaraonna sahat tu na matua ibana. Alai songon pandok ni Debata tu si Abraham, “Ua tailihon ma dompak langit i jala bilangi angka bintang, molo habilangan ho angka i. Dung i didok muse tu ibana: Songon i ma pinomparmu sogot.” (1 Musa 15:5). Dungi didok hatani Debata ma muse: “Jadi porsea ma si Abram di Jahowa, gabe hatigoranna do i dietong Jahowa.” (1 Musa 15:6). Na nidok na dison, hinorhon ni haporseaon ni Abram, gabe halak na tigor ma ibana di adopan ni Debata.

Dihaporseai ibana na tuk do gogo ni Debata patupahon dohot pasauthon na nidok na i. Pos do roha ni si Abraham di Hata ni Debata tung pe ndang tuk pikkiranna mangantusi hataNa i. Ai hombar tu hajolmaon, ndang tagamon marianakkon, manang manubuhon posoposo sada ina na hol (mandul), jala muse nunga na matua. Alai porsea do si Abraham di hata ni Debata. Alani i, gabe hatigoran ma i dietong Jahowa. Marhite on, boi ma taantusi pandohan ni Tuhanta Jesus na mandok: “Songon i ma jolo! Ai tama do tapajongjong nasa hatigoran!” (Mateus 3:15). Na marlapatan ma i, tardidi pe Jesus, asa jongjong do hatigoran ni Debata. Jala pandidion najinalo na i, patujolo ni hataridaan ni na bernit dohot hamatean naeng siteanonna do muse di hau pinarsilang. Marhite i, diporsan jala ditean Ibana ma sude nasa dosa ni portibi on. Jongjong ma hatigoran ni Debata. Jala songon pandok ni Tuhanta Jesus di Johanes 3:16 “Ai songon on do holong ni roha ni Debata di portibi on, pola do Anakna na sasada i dilehon, asa unang mago ganup na porsea di Ibana, asa hangoluan na salelenglelengna di ibana”. Dungi, jumpa ma muse pandohan ni Tuhanta Jesus: “Laho ma hamu, podai hamu ma saluhut bangso, didi hamu ma nasida tubagasan Goar ni Ama. Anak dohot Tondi Parbadia!” (Mateus 28:19). “Na porsea jala tardidi, dapotan haluaon; alai na so porsea i, hona uhum do!” (Markus 16:16). Tamba ni i, songon na nidok apostel Petrus tu halak Jahudi na ro mandok tu ibana: “Aha nama sibahenonnami, ale angka dongan?” “Alai didok si Petrus ma tu nasida: Pauba hamu ma rohamuna, dung i padidihon hamu ma ganup hamu tu bagasan Goar ni Jesus Kristus, bahen hasesaan ni dosamuna, asa dijalo hamu silehonlehon i, i ma Tondi Parbadia i.” (Ulaon ni Apostel 2:37-38).

Marhite pandidion najinalo ni Tuhanta Jesus, gabe jongjong ma hatigoran i. Ganup halak na porsea di Ibana jala tardidi, gabe partigor ma ibana di adopan ni Debata. Di bagasan goarni Debata Ama dohot (+) Anak dohot Tondi Parbadia. Amen.

Soli Deo Gloria :) 

JAMITA VIII DUNG TRINITATIS: DANG ADONG NASO TARPATUPA DEBATA (MARKUS 6:30-44)

 

JAMITA MINGGU, 21 JULI 2024

VIII DUNG TRINITATIS (Hasitolusadaon ni Debata/ Ke-Tritunggalan Allah)

Nats: Markus 6:30-44

Penulis: Pdt. Jeprianto Marbun, S.Th

 

Patujolo:

Torop dope halak naso mananda hadirion ni Jesus Anak ni Debata namarhuaso. Songon nadiari jamita na di ari minggu i, molo pandohan ni halak natorop marragam do Pandok ni halak taringot tu Jesus: Adong mandok si Elia, panurirang najolo, molo si Herodes si Johanes do Jesus di rohana (Ay. 14). Songoni do nang namasa diturpuk on, songon sisean i Tuhan Jesus pe gagal do mananda Jesus. Hape nunga dibereng nasida di tingki namarparau na naeng lonong parau nasida ditonga-tonga ni tao mandapothon gadara, holan sakkababa do didok Jesus, sip, so! Gabe tunduk do tu Ibana tao dohot alogo i. Sungkun-sungkun nasida taringot tu ise Jesus nunga dialusi di tingki na sahat nasida di Gadara marhite naro nasinonggopan ni Legion namandok: Marhua Ho tuson Jesus Anak ni Debata natumimbul? Secara tidak langsung sungkun-sungkun nasida di Identitas ni Jesus terungkap secara tidak langsung marhite haroro nasida di Gadara. Namate dipahehe boruni si Jairus, namarsahit bulan 12 taon di pamalum dohot angka lan na asing. Hape boe do lupa nasida di Jesus namarhagogoon i.

Tema:  “Dang Adong Nasotarpatupa Debata” 

I.                Unang ganggu roham

Tontu do diboto Jesus halojaon ni sisean i di namandalanhon tugas sian Tuhan Jesus mamaritahon barita nauli, ido pola disuru Jesus nasida asa pahosahon saotik namarlapatan paulak hosa loja (ay. 31). Sada hal namanusiawi do molo loja ringkot istirahat. Tangkas do diboto Jesus aha na gabe haporluan ni sisean i. Alai dung laho Jesus dohot sisean i, halak natorop manang punguan bolon i gabe mangihunton nasida. Tontu merasa terganggu do ra angka sisean i, naeng istirahat gabe sundat ala haroro punguan nabolon mangihuhton nasida. Alai Jesus asi do rohana mangida natorop i ala songon biru-biru naso marparmahan. Jesus patuduhon tu hita bahwa Ibana peduli do tu kebutuhan partondion dohot pardagingon nasida. Dang holan mangajari, alai dohot do manarihon sipanganon na gabe kebutuhan nasida satiha i. Di Ay. 35-36 sisean i mandapothon Jesus mandok tu Ibana na lungun inangan on, jala guling bot ari nuaeng. Dohot tujuan asa dipamuli Jesus nasida tu angka lumban humaliang dohot tu angka huta lao manuhori sipanganonnasida. Dison diparenta nasida Tuhan Jesus, asa muli mangalului sipanganon nasida. Boe sajo do pandohan on hata bentuk kekesalan ala so adong tingki nasida maradi, manang kekwatiran nasida dituntutan ni natorop i di sipanganon songon na mangihuthon Jesus dohot sisean i. Tindakan ni sisean i manggombarhon songon parmahan na ni upaan naso adong tanggung jawab di napinarmahanna, melepaskan tanggung jawab pasombuhon birubiruna mangalului naringkot didirina. Siseani seolah-olah pasombuhon birubiru i marhite usaha dohot gogona mangalului sipanganonna. Songon ni gombaran ni biru-biru molo pinasombu olo do lilu manuntun lomona. Jala dialusi Jesus do pandohan ni Sisean i: Lehon hamu nasida mangan! Jala dialusi sisean i Tuhan Jesus: Asa hami nama manuhori roti arga duaratus uang silehononnami panganon nasida?

Sikap rela berkorban dang adong di sisean i, dang siap hata ni Tuhan i tu nasida, selalu mamparetonghon pambahenanna dinalaho manarihon birubiruNa. Dang tangkas ditanda nasida namanuru nasida! Seolah-olah gabe harugian do di nasida pandohan ni Jesus, rugi di halojaon, rugi di pambahenan. Portibion manutup rohanasida mananda Jesus. Dang ro nasida mangido pangurupion dohot saran tu Tuhan i aha nanaeng ulahonon nasida.

 

II.             Parasi roha do Ibana

Tuhan Jesus selalu mengutamakan pelayan asi ni roha, diboto do nagabe kebutuhanta ima: kebutuhan rohani dohot kebutuhan Jasmani, asi ni roha ni Tuhan Jesus taruli birubiru i disipanganon partondion, diajari nasida jala disarihon nasida disipanganon pardagingon. Ibana do Parmahan nadenggan, parmahan namarmahani biru-biru, naso mamparetonghon pasupasuna tu birubiruna, ditogu-gogu, dilului, disarihon na ringkot dingoluna, jala dilehon rohaNa. Parmahan parholong roha do Jesus, naselalu mengutamakan kepentingan ni birubiru sian diriNa. Dang dipasombu nasida tanpa parmahan. Diboto Ibana do aha do nagabe kebuhan ni biru-biru i, ima sipanganon.

 Sipanganon partondion dohot sipanganon pardaginon. Tanda halonganan napinatupa ni Jesus marhite 5 roti dohot 2 dengke boe manarihon 5000 halak. On patuduhon tuhita dang adong naso tarpatupa Debata. Boe do patupahon nasaotik i gabe godang. Aha naadong dihita, otik manang godang molo taboan tu Tuhan Jesus gabe tarpasupasu do i. Tuk do Ibana manarihon hita di naotik molo ro hita tu Ibana.  Amang/ inang peristiwa on paingothon hita bahwa Tuhan Jesus boe do mambaen manang aha pe natapelehon tu Ibana. Nang pe idaon gelleng songon so marlapatan,  alai boe do pangkeon ni Debata laho mangulahon hal-hal yang luar biasa. Sai marposni roha ma ho tu Tuhan Jesus.

Di asi i Tuhan Jesus do nasida nang hita, diboto Ibana merap do hita molo mangasahon gogonta mangalului naringkot di hita. Dang tarpatupa hita malua molo mangasahon gogota sandiri. Alai holan  ala asi ni rohani Tuhan i sambing taruli hita dihaluaon. Jesus do parguruan di hita asa gabe parmahan parasiroha hita, namanghaholongi, mangasihi sude jolma. naso mamereng rupa dohot mangetong pambahenan asa mangasi i, alai ala naung di asi do hita jala dipalua. Songon parbue ni haluaon ni manggombarhon holong ni Tuhan Jesus na halauar sian hita gabe parasi roha.

 

III.           Dang Adong Naso Tarpatupa Debata

Marhite turpuk dijari hita asa marposniroha, marhuaso do Ibana manarihon hita Ai Debata do Jesus, Jesus mangelean 5000 halak mangan mangajarhon hita laho mangelehon aha pe na adong dihita tu bagasan tangan Debata. Jala unang anggap dirim dang mararga dang marguna. Tuk do ibana mamangke hita, dang peduli songon dia pe metmetta. Haporseaon i do di igil sian hita asa patar huasoNa i dihita. Aha na adong di ho ido buanonmu tu Tuhan i asa dipasupasu. Holan haporseaon na togu dohot pangoloion namanontong, tabereng do huaso ni Tuhan i na karejo di ngolunta. Songon Tuhan na sarupa mamasumasu roti dan dengke, songoni do huason ni Debata mangula ditonga-tonganta.

Soli Deo Gloria :) 

TUK DO JESUS PALUAHON HO (MARKUS 4:35-41)

 

JAMITA IV DUNG TRINITATIS

(Hasitolusadaon Ni Debata/ Ke-Tritunggalan Allah)

Nats: Markus 4:35-41

Patujolo

Dipardalanan ni ngoluni jolma, ragam do angka namasa na ro tubagasan ngoluna. Hasusaan, hapariron, pangunjunan, las ni roha, arsak dohot angka lan na asing namarragam. Olo do sipata jotjot tabege molo holsoan dongan mandok; E tahe Tuhan, naso parduli do nuaeng Ho tu au, boasa pola ingkon masa songonon dingolungku, boasa Tuhan, boasa huae na haccit, boasa ingkon hutaon songonon di ngolungkon dohot angka lan na asing. Mancam ma tahe angka hata pandohan tu Tuhan i molo pada saat hita berada dititik terendah dingolunta.

Keputusasaan jot-jot do tubu dihalak naso porsea, sai di rimpu do uhuman diampehon Debata molo jumpa di hagogotan, hape sasintongna daong. Alani, haporseaon na tang, ingkon tahan uji.

Tema: Tuk Do Jesus Paluahon Ho

I.                 Sian Ragam ni Hagogotan

Diloas Debata masa angka hagogotan dingolunta, songon di Turpuk Jamita on, namodom Jesus dinaro alogo dohot galumbang naeng mangago nasida saluhutna. Alai hinorhon ni biar ni roha ni angka sisesan i mamereng namasa i, naso adong be harapan nasida mangolu. Dipardalanan ni ngolunta on jotjot do ro ujian manang galumbang ningolu namanosak ngolunta, sipata olo do naeng lonong hita sipata dibagasan galumbang i. jotjot do galumbang ni parngoluon i mambaen hita gabe merasa putus asa sahera so adong be pangkirimon dingoluon. Alai songoni pe sitaononta dohot ragam ni angka namasa dingolunta, unang ma gabe sumurut haporseaonta i tu Tuhan i, alai ingkon marposni roha do hita hita, na tuk do huaso ni Tuhan I paluahon hita. Ido bedanta sian angka halak naso porsea Tuhan Jesus, ai narap do Tuhan i dohot hita disaluhut pardalanan ni ngolunta. Molo, tung pe parir pangkilalaanmu nuaeng, haccit parniahapanmu, loja dipardalanan ni ngolu dohot angka lan naasing, dang na so perduli Debata di hita, seolah-olah modom Debata di pardalanan ni galumbang ni ngolunta. Sude na taalami molo rap jala marhaposan hita tu Tuhan i diragam sitaononta, lam tang ma haporseaonta i dinamangadopi aha pe nanaeng masa dingolunta on.

 

II.               Ai Dipalua do ho Sian Parmaraan

Habiraan manang ganggu ni roha mangodopi galumbang ni parngoluan, sasintongna on ma gombaran na so adong pos nirohanta tu Tuhan i, bahwa Ibana tuk paluahon hita, manang bentuk ni hurang ni haporseaonta tu Tuhan i. Alani diajari do hita marhite turpuk on, asa unang mabiar hita jala unang sumurut haporseaonta laho manghaporseai Ibana diragam ni galumbang ningolunta.

      Haru alogo boe menag dohot tunduk tu Jesus, apalagi ma galumbang ni ngolunta. Dang adong naso tarpatupa Debata. Dang adong persoalan naso boe terselasihon molo raphon Debata, selalu do pasti adong jalan keluar molo raphon hita dohot Debata, Asal ma hita marposni roha hita tu Ibana, dipalua do hita sian ragam namasa dingolunta.

 

III.             Alani Sai Porsea Ma ho tu Tuhan Jesus

Baru dope diginjang ni turpuk on Tuhan Jesus marumpama tuangka sisean i, tudos do pangalaho harajaon ni Debata songon panabur, namanabur, naso diboto panabur i partubuni boni I dohot Harjaon ni Debata di patudos tu batu ni arum, Boni i ima hata ni Debata, natubu naso pamatoan ni parhauma, jala marbuhu tano sahat tu namarparbue. Lapatanna adong proses pertumbuhan na ditimbulhon boni I gabe sada perubahan bentuk gabe kehidupan baru. Songon batu siarum na metmet alai boe manubuhon sada hau nauntimbo sian ingkaurata diladang, gabe songgop pidong marasar diginjangna, namarlapatan proses natimbulhon boni i gabe berdampak sahat tu pidong namarasar diginjangna, gabe marlapatan hau i.

      Marurat ma hatani Debata di hita, jala tubu dibagasan rohanta ganup asa gabe jolma natang hita molo masa pe rangam ni galumbang ni ngolu na ro tu hita. Jolma namarurat jala namarparbue pasti do pataridahononna ngoluna gabe ngolu namarlapatan dohot gabe contoh teladan dihaporseaon dingoluna siap ari.

      Alani hot ma hotma hita di haporseaon i, diurupi tondi ni Debata do hita dinalaho bertumbuh siap ari marhite ragam ni galumbang, nahot torus bertumbuh sahat tu namarparbue hita. Tondi Porbadia kareja marhite Barita nauli (Hata ni Debata) manuanhon haporseaon dihita  dinalaho marnida Tuhan Jesus Sipalua na tuk paluahon hita sian ragam ni galumbang ni ngolunta marsada-sada. Dipargogoi Debata hita dinalaho mangadopi ragam ni galumbang ni ngolunta gabe siparhaporseaon na tahan uji ma hita.

 

Berbahagialah orang yang bertahan dalam pencobaan, sebab apabila ia sudah tahan uji, ia akan menerima mahkota kehidupan yang dijanjikan Allah kepada barangsiapa yang mengasihi Dia (Yakobus 1:12),  Amen.