SAI DI JOU DEBATA DO HITA ASA RO TU HAMUBAON NI ROHA (JESAYA 1:10-18)

Patujolo:

Somalna  sude do angka natua tua marsak huhut marungkil molo diida anakkon na hinaholongan na sai manimbil sian angka poda dohot sian angka sipaingot na mambahen ngolu ni anakkon i gabe di bagasan pangalaho na ma dabu tu  hajahaton dohot tu bagasan dosa.  Songon i ma molo masa halumlamon si masyarakat  nang bangso pe. Angka partigor tontu sahali marungkil jala marsak do paida-ida pangalaho i,  sipata olo do tarrimas marnida pangalaho i. Tarlumobi ma  Jahowa sandiri marnida bangso Israel naung jinou na huhut dipillit gabe bangso. Tung ragam do panogu-noguon  dohot pangkaholongon ni Debata di nasida alai tung sai dao jala dipajogal do rohana jala ndang olo paundukhon rohana tu panogu noguon ni Debata. Ido umbahen ingkon lalu rimas ni Debata mida nasida ingkon gabe tu habuangan. Alai sai holong do rahaNa  dijou do asa mulak nasida sian dosa i. Laos ido dijouhon jamita di ari Minggu sadarion tu hita ganup : 

Tema : Sai di jou Debata  do hita asa ro tu hamubaon ni roha.

I.         Tu hamagoan do na so olo paubahon roha

Dibagian turpuk na parjolo  ima  parisuangon ni Jahowa mida halumlamon ni Isreal  (ayat 2 - 9 ) tangkas do di soarahon Panurirang Jesaya  holso  ni Debata  marnida pangalaho ni bangso i. Pola didok di ayat 3 i, “Ditanda jonggi do nampuna ibana, jala diboto halode panggagatan binahen ni tuanna. Alai anggo Israel ndang tumanda ahu, jala ndang marroha bangsongku.”  Nunga tung saep na sida mardosa. Ndang adaong be panimbangion di roha nasida. Gari angka binatang na holan nampuna instink ( naluri ) diboto do na denggan na binahen ni tuan na. Hape halak Israel naung tangkas mandai huhut marnida saluhut denggan basa ni Jahowa ndang marroha hape nasida. Nunga tutup  panggora ni rohana. Di Roma 1 : 12 di dok Apostel Paulus do “Ai atik pe diboto nasida Debata, ndang dipasangap Ibana songon na tama di Debata, jala ndang dipuji, gabe dipaotooto angka pingkiranna do nasida, jala mangkolom ma rohanasida na so mangarti i.”  Somalna ndang manigor mangimbukbuk hajahaton i, alai adong proses na. Ala ni lam mate panggora ni roha  atik pe di boto Debata, alai sai di pasiat si bolis mangula di rohana, ujung na lam disarat do jolma  i tu ulaon hajahaton na lam balga na manghorhon dosa.  Songon i muse di dok di Yakobus 1:15 “ Jadi dung manjangkon sangkapsangkap ni roha i, ditubuhon ma dosa; alai dung gok dosa i, ditubuhon ma hamatean.”

Di ayat 4 di dok “Marjea ma bangso na mardosai, na sun marhajahaton! Pinompar ni angka parjahat, angka anak jea, angka na tumadingkon Jahowa, angka na mangaleai na badia ni Israel, angka na sumurut tu pudi.”  Di bahen na so olo nasida mangangihon hata ni Debata songon nang angka panurirang na sinuru ni Debata, ujungna ingkon marjea/terkutuk. Hata marjea di dok di hata na  asing Awnagema.  Hata  “Awnaqema” marlapatan do i sada kondisi ni hajolamaon na parohon uhum   ndada holan bura tu dirina alai dohot do nang tu natorop ala ni dosa na niulahon na mambahen godang halak madabu tu haliluon.  Ido alana di goari nasida pinompar ni angka parjahat, angka anak jea , na manadingkon Debata. Ingkon manat do hita angka dongan,  saluhut dosa pangalaosion i ingkon marujung do i tu hamatean molo so olo paubahon roha.

II.        Tundalhon ma dosa i ai umbalga do holong ni roha Na sian rimas Na.

Nang pe naung mardosa bangso diadopan ni Debata jala uhum nunga ditariashon ingkon gabe jambarna  alai sai tonton do dipajogal rohana. Dia ayat  5  di dok “Tu aha i sai datdatan linsingan hamu? Sai ditambai hamu do panundalion. Ganup ulu marsahit do, jala ganup roha bebenesan.  Sian i idaonta tung na so ra mehon do halak Israel tong sai ditambai dosa mambahen hagigian diadopan ni Debata. Sasintongna ianggo sian muruk dohot rimas ni Debata, nunga ingkon sun siap bangso Israel. “  Tung sura so  ditebahon Jahowa Zebaot boni di hita saotik, siol doshon Sodom dohot Gomora hita “ ( ayat 9 ). Lapatanna holan asi ni roha ni Debata do umbahen so sun siap bangso i.   Ido nang andung-andung ni panurrang Jeremia di na ni dok na  “Asiasi ni Jahowa sambing do umbahen so haru sun siap hami, ai ndang marpansohotan asi ni rohana i. Mulak rata do i tahe ganup sogot, godang ma tutu habonaronmu! ( Andung 3 : 22- 23).

Dao do umbalga holong ni roha ni Debata  sian rimas Na sandiri. Nunga tangkas Ai upa tinuhor ni dosa do hamatean; alai basabasa ni Debata do hangoluan salelenglelengna marhitehite Kristus Jesus Tuhanta i. ( Rom 6 : 23 ). Ondo na gabe apul –apul di angka jolma pardosa. Songon dia pe dosa i, marhite hite holong ni roha ni Debata di jolma nunga dilehon Anak Na Jesus Kristus di lehon do hasesaan ni dosa diangka halak na olo ro tu ibana. Di Buku Endenta No 174 :  3 di dok  “. Pardosa ho didok roham, na so tama be dohot? Ndang pola ala ni dosam, umbaen na sundat bongot. Ai nunga sae do dosam i, digarar Tuhan Jesus i. Naung sae, naung sae, naung sae do dosami. “  Dijangkon Jesus do pardosa na olo manopoti dosana na olo ro tu hamubaon ni roha  alana ndang dihalomohon Debata hamamte ni angka parjahat alai mulak ma nian parjahati tumadingkon dalanna na jahat i asa mangolu ibana ( bnd Hes 33 : 11)

 III.      Alani tangihon ma panjouon Na huhut pauba ma roham asa di urasi sian nasa dosam

Di Jakobus   4 : 8  “Pajonok hamu ma tu Debata, dung i pajonohonna ma tu hamu! Paias ma tanganmuna, hamu angka pardosa, jala pabontor ma rohamuna hamu angka na mardua roha!” . On ma jou – jou ni Debata tu hita jolma. Di soarahon do asa ro hita pajonokhon dirinta dugi pajonokonna ma tu hamu. Tangkas do ia Debata  na badia, na so adong marlaok dosa di Ibana. Ndang boi marsaor na badia tu na ramun.  Hombar tu pandohanon na bersedia do Debata manjangkon angka pardosa i di bagasan habadiaon Na.

Di ayat 18 nunga diontang Debata angka pardosa asa ro mardabu-dabu tu Debata. Hata mardabu –dabu di son tar tudos do i, sahalak terdakwa di Pengadilan. Dibagasan proses persidangan adong do dilehon hak tu terdakwa laho mambahen pembelaan. Suang songon i do panjouaon ni Debata tu angka padosa, unang sai mian di bagasan dosa i. Tung ringkot do ro tu Tuhan Jesus mengakui dosa dohot hasalaan. Unang ala ni mansai balga ta etong dosa i gabe so olo ro tu Ibana. Di dok do di ayat 18 i muse,  “Tung sura rara dosamuna songon abit bunga dapdap,  bontar do bahenonku songon itak; nang pe rara songon abit hasumba, gabe songon hapas do muse.” Songon dia pe jorbut ni dosa i  rade do Tuhan Jesus manesa angka dosanta.  Di I Johanes 1 : 9 didok do  “  Molo tatopoti angka dosanta, haposan do Ibana jala bonar, manesa dosanta jala paiashon hita sian nasa hageduhon.  Dibahen i tangkas ma ro hita tu Ibana, manopoti dosanta, asa disesa dosanta huhut dipaias hita sian nasa  hageduhon i.   Huhut togu-togu on na do ngolunta asa tongtong mangolu di bagasan habadiaon jala marparangehon ngolu na imbaru di bagasan Tuhan Jesus. Amen.

Panurat: Pdt. Dr. Esra Sinaga, M.Mis

JAMITA MINGGU XI DUNG TRINITATIS: JESUS DO ROTI HANGOLUAN NATUAT SIAN BANUA GINJANG (JOHANES 6:35-51)

Patujolo:

Dibagasan jamita on, marsiajar do hita sada cerita namansai ringkot di surat ni si Johanes, I ma napatandahon Jesus do roti hangoluan. Jesus pabotohon tu hita Ibana do na tuk mangalusi sihol ni rohanta na umbagas, songon na uasan, namale na so hea boe puas. Pandohan ni Jesus songon roti hangoluan, I ma sada pandohan tu hita Huria_Na manjouhon hita asa mangarimangi lapatan ni pandohan ni Jesus dohot aha naeng ajarhononNa tu hita.

Tema: JESUS DO ROTI HANGOLUAN NATUAT SIAN BANUA GINJANG

Ilustrasi Gambar

I.         Unang tulak Ibana

Dibagasan turpuk on Jesus menawarhon diri-Na songon Roti Hangoluan na boe mangalusi sihol ni rohanta  na umbagas. Alai torop do jolma namanulak Ibana jala dang olo manjangkon Ibana, na lebih mamillit mamingkirhon sipanganon pardagingon nasida sian sipanganon partondion. Ditingki dipatandahon Jesus diri_Na songon Roti Hangoluan, godang do halak holan tartarik holan tu roti na tarida secara fisik na boe papuas tagas ni butuha nasida. Nasida bahkan mangihuthon Jesus holan naeng mangkhirim dapotan roti dohot dengke na gratis do muse, songon Jesus namangalehon mangan 5000 halak. Peristiwa i, tontu mambaen godang halak longang jala naeng mangangkat Jesus gabe raja (ay.15). Alai aha namasa dung salpu i? Tuhan Jesus patandahon diri-Na Roti Hangoluan (ay. 35), na tingki i godang mangihuthon Jesus gabe marbalik manulak Ibana (ay. 41-42). Boasa nasida manulak Jesus Roti Hangoluan? Adong 4 alasan naboe taida sian turpuk on:

1.  Nasida holan tartarik tu paruntungan dohot kepuasan nasida sandiri (ay. 26). Nasida naeng mambaen Jesus gabe raja laho memenuhi kebutuhan pardagingon nasida, dang laho memenuhi sihol ni roha nasida di partondion.

2.   Nasida dang mampu mangantusi hasintongan partondion na ni ajarhon ni Jesus (ay. 52, 60). Dinasida, pandohan ni Jesus maol jala dang masuk akal.

3. Nasida lebih mangharingkothon  hasomalan dohot pangantusion nasida sandiri sian panjangkononna di Jesus sebagai Mesias na dibagabagahon I (ay. 41-42)

4.  Dang tulus haporseaon dohot motivasi nasida mangihuthon Jesus (ay.66). di tingki Jesus manuntut pengorbanan, justru gabe marbalik nasida sian Jesus.

Sipangon, i ma sumber gogo dohot kebutuhan ni ngolu ni jolma. Tanpa sipanganon, mate jolma, sude mangkaringhothon sipanganon, alai parsatongkinan do anggo sipanganon i, jala mulak mauas jala male do hita muse disi. Jesus Roti Hangoluan, dang be mulak mauas jala male hita, molo marsigantung hita tu Ibana.  Unang ma hita terjebak tu pingkiran na sompit songon natorop i, na manghasiholi na olo salpu. alai mangkirim ma hita di Jesus Roti Hangoluan, na tuk manarihon dohot papuas tagas ni tondinta saleleng ni lelengna.  

II.           Namanganhon roti hangoluan, dapotan hangoluan salelenglelengna

Dungi ninna Jesus ma mandok nasida: Ahu do roti hangoluan i: sandok na so male be manang ise, naung ro tu Ahu; jala na so tupa be mauas manang ise, na porsea di Ahu (Johanes 6:35). Aha do lapatan ni pandohan ni Jesus (ay. 51) namandok: manang ise namanganhon roti on, I do mangolu salelenglelengna? Manganhon Roti Hangoluan tudos do i tu porsea tu Jesus. Manganhon roti hangoluan, dang Jolma ni Jesus diallang secara langsung. Alai gombaran sian haporseaon dohot panjangkononta di Jesus do i maksudna. Sarupa songon pandohan; Ahu do roti hangoluan i: sandok na so male be manang ise, naung ro tu Ahu; jala na so tupa be mauas manang ise, na porsea di Ahu. Naeng dohonon ni Jesus tu hita bahwa holan Ibana do na tuk mangalusi sihol ni Jolma naumbagas tu hangoluan narosaruda. Panjangkonon ni jolma tu Jesus mangkorhon hangoluan. Ro ma hita tu Tuhan Jesus dibagasan haporseaon na ias, tulus jala manjangkon Ibana di ngolunta huhut marposniroha tu Ibana asa jumpa di hita sihol ni rohanta napapuas tagas ta di hangoluan namanontong dibagasan Kristus Jesus Tuhanta i.

Diboto Ibana do songondia rohani jolma (36) diboto Jesus do na godang mangida Ibana mangulahon halongangan na pinatupa_Na, alai dang olo nasida porsea. On patuduhon bahwa Jesus diboto do rohanta songon dia pe hita. Jesus ro tu portibion  i ma mangulahon lomo n iroha ni Amana (ay. 37-38), ido pola didok Jesus; saluhutna na  nilehon ni Ama I tu Ahu, i do na ro tu Ahu. Ibana ro dang na laho mangulahon roharohaNa sandiri alai mangulahon lomo ni Ama i do namarsuru Jesus. Jesus manjamin Haluan tu halak na porsea tu Ibana (ay.39-40) alani do Ibana marjanji dang tulak on na sahalak pe na ro tu Ibana. Ibana do namangaramoti dohot paluahon naporsea sahat tu ari parpudi paheheonna do naposea di Ibana.

III.         Alani sai porsea ma hita di Jesus,

-     Tuhan Jesus marumpama, mangan daging dohot mudar ni Kristus manggombarhon haporseaon dohot penyerahan diri secara totalitas tu IbaNa.   

-   Ingkon porsea do hita jala manjangkon Jesus Anak ni Debata na mamelehon hosa-Na humongkop hita, asa tajangkon Ibana sipalua nanaung durus mudarNa tu hasesaan ni Dosanta.

-      Marhite penyerahan diri total tu Ibana, hita taruli di hangoluan na binagabagahon ni Jesus di hita.

-    Jangkon ma parpanganan nabadia i, ima daging dohot mudar ni Kristus baen hasesan ni Dosanta, i do parpanganan na taharingkoti dingolunta halak pardosa asa taruli hita tu hangoluan nasorasuda dibagasan Ibana.

Panurat: Pdt. Jeprianto Marbun, S.Th

JAMITA V DUNG TRINITATIS: HAPORSEAON MI DO PALUAHON HO (MARKUS 5:21-43)

Patujolo:

Sude halak pasti do hea berada diposisi dititik terendah dingoluon, sude halak pasti hea prustasi, kecewa bahkan depresi alani keadaan naso manontu, sude do halak pasti hea merasa putus asa mago pangkirimon alai galumbang ni parngoluon. On do sasintongna gombaran latar belakang nialami ni si Jaiurus, pada saat dang adong be na boe mangubati boruna nanaeng matematene, harapan terakhir ima Tuhan Jesus nama pangkirimonna. Parubatan tudolok tu toruan pasti nunga didiori nasida di nalaho mangubati boruna I, alai dang adong namampu mangubatisa. Pandelean pasti adong do molo dang jumpang songoni di hita. Sada hal namenarik dison idaonta disaat dang adong be namampu mangubati boruna i, si Jaiurus justru ro Tuhan Jesus marsinggang, pabotohon holso ni Rohana. Sogoni nang boru-boru namarsahit 12 taon lelengna, pangkirimon dohot posniroha tu Tuhan Jesus na tuk Paluahon ibana, gabe taruli di haluaon sian sitaononna naung leleng diae 12 taon lelengna.

Tema:  “HAPORSEAONMI DO PALUAHON HO”

Ilustrasi Gambar

I.     Dang Alani gogonta hita malua

Dijamita on adong 2 tokoh nanaeng sipahebahebaonta, ima namargoar si Jairus dohot boruboru namarsahit bulan 12 taon lelengna. Dua tokoh on memiliki status nasangat berberbeda: Parjolo si Jaiurus Ima songon tokoh agama namangula dibagas joro Kapernaum, ibana sahalak nabertanggung jawab namimpin Ibadah dohot namangaturhon angka panghobasion ditongatonga ni bagas joro i. Sahalak na rohanaiawan do sasintongna si Jairus, terpandang jala dihormati angka Masyarakat. Alai atik pe ibana sahalak pangula di bagas joro tontu dang gabe ias ibana sian parungkilon, sian dia taboto na adong parungkilon di si ibana? Diturpuk on dipatorang do na adong do boru ni Ibana namarumur 12 taon alai dibagasan parsahiton, kemungkinan holan i do ra boruna, tung mansai holong do Rohana tu boruna i, songon natoras napasti berusaha do mambahen na terbaik tuangka ianakhonna tarlumobi managului parubatan asa tumibu malum sian parsahiton. Segala macam Upaya manang cara pasti do nunga di ulahon ibana paubathon boruna bohama asa tumibu malum. Songon orangtua ibana pasti do kwatir, bonsa, busisaon, terpukul molo so adong be parubatan natuk paluahon boruna sian parmaraan.

Paduahon, boruboru namarsahit bulan 12 taon lelengna, dang secara secara kebetulan Sarupa 12 taon songon si Jairus dohot boruboru on, alai namarlapatan do i songon bentuk ni sitaonon, penderitaan na nialaman nasida namansai parir situtu nasida. Dang apala adong status ni boruboru namarsahit bulan 12 taon lelengna molo tabereng diturpuk on. Jala dang adong tarida keluarga na namamboan ibana ditingki ro Tuhan i. Boe dohonon boruboru on jolma naso pola dianggap do on, nadipasiding halak, Najis. Dang adong dongan ni boruboru on didok dison namangurupi. Penderitaan ni boruboru tontu sangat parir situtu. Alai nang pe songoni di pangkilalahon ibana, porsea do Ibana tu Tuhan I na tuk paluahon Ibana. Disaat so adong halak memperdulihon ibana, disaat so adong mambuan ibana marubat alai tekat dohot pos ni rohana tu Tuhan I do umbahen Ibanan taruli asi ni roha ni Tuhan Jesus.

Gombaran do on di hita, dang marlapatan hape gogo, statusta songon dia pe hita, songon dia kehormatatanta laho paluahon dirinta sian ragam ni parungkilonta. Termasuk nang haluaon, alani sada nama pangkirimon holan asi ni roha ni Tuhan i sambing na tuk paluahon hita.

II.    Alai Holan Ala Asi ni roha Tuhan I sambing do hita Malua

Sada si idaonnta sian si Jairus: parjumpanganna dohot Tuhan Jesus Kristus patudohon tu hita songon ketidakberdayaan ni ibana mangalului haluaon sian marhite upaya dohot gogo nasian portibion paluahon boruna sian parsahiton. Dison si Jairus dipatutoru do dirina diadopan ni Tuhan I ditonga-tongani keputuasaan ni ibana ro marsiala dang adong na tuk na boe paluahon ibana sian parungkilonna. Dengan kata lain namandok tuhita, holan Tuhan i nama pangalualuan.  Si Jaiurus tokoh pemimpin do ibana di bagas joro, tontu do haroro ni ibana tu Tuhan Jesus songon sada naso mungkin dirohani torop halak, Jesus halak Nazaret I na dianggap tungkang onar diangka halak farise, siboto surat alai marsinggang diapoan ni Tuhan Jesus ditonga-tonga ni natorop i. Nang pe ibana sahalak nasangat dihormati alai olo do ibana patoruhon rohana diadopan ni Tuhan I, disadari ibana  dirina, gogo, pambahenanna tudolok tu toruan paubathon boruna, alai dang adong namampu mangubatisa. Apalagi Salahak alu-alu na sian bagas ni si Jairus namdok: Nunga mate be borumi, aha be lojaanmu Guru i! Alai ro do hata ni Jesus mandok ibana: unang ho mabiar, asal ma porsea. Diboto Jesus do roha ni si Jairus nunga mulai gotap pangkirimonna ala naung dibege mate boruna, alai di papos Tuhan i rohana di pangkirimonna tu Tuhan i. naneng dohononna tu hita dang adong haporseaon dohot pangkirimonta tu Tuhan Jesus nasia-sia, ai Debata do Ibana na tuk paluahon hita sian ragam ni masa di hita. Molo Debata do Tuhan Jesus dang adong namustahil di Ibana. Haru galumbang tunduk tu Ibana, nasibolison dipamalum lam ma na mate boe dipahehe. Jala tarida do i dinasahat Tuhan Jesus tu bagas ni si Jairus dipahehe Tuhan i boruna naung mate i. On ma pos ni rohanta tu Tuhan i, diloas Debata masa dipardalanan ni ngolunta ragam siadopanta, alai diajari hita dang tuk gogonta paluahon alani do hita ingkon patutoru rohanta diadopanNa.

Paduahon, sahalak boruboru namarsahithon bulan lelengna 12 taon: Dung dibege barita ni Jesus, ro ibana mangihuthon sian pudi. Sada na hal namenarik, pengakuan ni boruboru i (28) asal hujama nanggo ulosnai, malum do hilalaonku. On ma gombaran haporseaon na togu, adong pangkirimon di hamamalum ni parsahiton, gabe taruli ibana dipangkirimon i.

Haporseaon tu Tuhan Jesus, Ima haporseaon napaluahon, Haporseaon namangkorhon taruli di asi ni Roha ni Tuhan i.

Aha do na boe taparsiajari sian turpuk on:

-      Status, hasangapon, kehormatan, hagogoon dang tuk i paluahon hita

-      Olo patutoru roha di adopan ni Tuhan I, dang margogo hita paluahon hita,

-      Menyadari holan Tuhan I do tuk Paluahon, jala mengakui holan ala asi ni Roha ni Tuhan I sambing do taruli hita di haluaon.

-      Haporseaon na paluahon, Ima Haporseaon tu Tuhan Jesus.

III.  Dang Siida Bohi Ibana Paluahon

      Songon si Jairus dohot boruboru namarsahit bulan 12 lelengna memiliki status naberbeda alai tong do sama-sama taruli asi n iroha ni Tuhan i. dang mardingkan holong ni Debata tu hita, sai dipargogoi ma hita saluhutna, Amen

    Panurat: Pdt. Jeprianto Marbun, S.Th

JAMITA UJUNG TAON PARHURIAON: NA RO MA TUHANTA I (MARKUS 13:24-37)

Patujolo:

Di goari do Minggu sadarion, Minggu ujung taon parhuriaon jala sadarion do dijahaon di hurianta angka naung jumolo dialap Tuhanta  dibagasan sataon on. Mansai lungun do rohanta, marningot angka sisolhotta naung jumolo i. Sai taingot bohina, parengkelna, holong ni rohana, na mambahen tamba lungun ni rohanta. Alai ndang na manungguli sidangolanta umbahen na dipatupa huria parningotan on.  Alai  na paingothon hita, ia hita pe naeng alapon ni Tuhanta do muse,  asa dungo hita unang tarpodom , ai na ro do Ibana mangalap hita. Marhitehite jamita on didok do; 

"Na ro ma Tuhanta I"

Ilustrasi Gambar: Jesus coming soon

I.         Ndang  taboto sadihari haroro Na i.

Uju di namanaek Tuhan Jesus tu banua ginjang, di natinuluthon ni angka siseanNa I Ibana manek tu ginjang, didok surusuruan I tu angka sisean I ” “ O hamu halak Galilea, aha ma sai jongjong hamu mamerengi dompak ginjang ? Anggo Jesus I, na tarhinsat sian lambungmuna tu banua ginjang I, na ro do Ibana sogot, songon na ni idamuna Ibana laho laho dompak banua ginjang “ (Ul.Ap.1;11). Laos songoni do hata ni Tuhan Jesus tu angka sisean Na di na manjamitahon taringot tu ari sogot, dung masa angka tanda-tanda nan i dok ni Tuhan I I doan nasida ma  Anak ni jolma I ro marhitehon ombun mantat huaso dohot hasangapon godang (Lukas 21;27). Laos di hatindangkon si Johannes do muse marhitehite pangukapon na jinalona sian Tuhan Jesus di Pulo Patmos didok “ Ida ma, na ro ma Ibana dibagasan ombun ! Idaon ni nasa mata do Ibana, nang angka naung manullang Ibana, gabe mangangguhi be ma saluhut bangso ni tano on mida Ibana. I ma tutu, Amen.(Pangukapon 1;7).

Marhitehite Hata on, ditogotogu do hita manghaporseai na ro do Tuhan Jesus muse mangalap hita sian portibion. Ai godang dope jolma na so porsea di si, nang songoni sian hita tongatonga ni hita halak Kristen.  Ai molo so porsea hita di si, tu hamagoan do jambarta sogot. Na pasti, ro do Tuhan Jesus padua halihon tu portibion. Andigan do haroroNa I ?  Adong do piga-piga halak manang aliran na lipe (sesat) na hea manontuhon ari haroro ni Tuhan Jesus na paduahalihon i.  naparjolo sahali hira-hira di taon 150-170 M (masehi) didok si Montanius do “ na ro ma Tuhan Jesus  pajongjong Jerusalem na imbaru di taon 200 di Pepusa (Asia Kecil). Marpungu ma sude angka na mangihuthon ibana di taon 200 i paimaimahon, gabe kecewa ma sude jolma i. Si Mantanius on mangaku naung sinonggopan ni Tondi Porbadia, huhut naung manjalo pangukapon sian Tuhan i. alani dipodahon ma uju I, ala naeng ro ma Tuhan I, taparde ma rohanta marhitehite : unang be marhasohotan (tidak menikah), hidup sederhana, rade mate  martir (prioritas). Dilaon-laon ni ari gabe diputushon huria ma, na lipe (ajaran sesat ) do na niajarhon ni si Montanius (montanisme).

Di Negaranta sandiri hea do masa barita sisongonon, huingot na jolo sahala na manggoari diri na pandita mandok na ro ma Tuhan Jesus paduahalihon, marpungu ma sude angka na mangihuthon ibana di Bandung paimaimahon Tuhan I. ujung na gabe hona tangkup do pandita I, ala mangalipehon torop jolma. Dang  adong  umbotosa  manang sadihari haroro ni Tuhan I.diturpuk on tolu hali di surathon si Markus na so adong umbotosa manang sadihari haroro ni Tuhan I (ayat 32, 33 dohot 35).  Jala Tuhan I pe didok do “ Alai anggo arina dohot sadiharina, dang adong na umbotosa , nang surusuruan na dibanua ginjang , nang Anak i pe; nda holan Ama i.(Markus 13;32). Sian on idaonta, hahomion ni Debata do I, ndang paboaon Na tu hita manang sadihari haroro ni Anak Na I tu portibion manopot hita. Alai didok si Paulus do tu huria Tesalonika “ Ai di boto hamu do tangkas, na songon panangko borngin do haroro ni ari ni Tuhan I (1 Tesalonika 5;2). Alani ingkon mangarade jala tongtong hita dungo ganup tingki.

II.        Tagam jala dungo ma hamu.

Nda holan angka tanda do dipaboa tu hita, ia molo nunga masa angka tanda-tanda I, na jonok ne ma ari na.  Sahali disungkunthon sisean I do Tuhan Jesus, mandok; Paboa ma tu hami andigan masa I, jala dia ma tanda ni harorom dohot ajal ni hasiangan on ? (Matius 24;3 -12). Gabe dialusi Jesus ma nasida didok ma, Na ro ma angka panurirang pargapgap :  Jaga ma hamu sotung dililuhon halak hamu ,Ai lan do na ro sogot manoluk Goarhu, angka na mandok; Ahu do Kristus I, gabe torop lilu bahenonna,  Begeonta ma barita ni angka hamusuon dohot soara ni na marmusu, Ai na hehe ma bangso maralohon bangso, haleon dohot lalo marluatluat. Pasahathonna ma ham tu haporsuhon, pola pusaonna hamu gabe hosoman ni bangso saluhut na ma hamu alani Goarhu. Lam tu ngali na ma haholongon ni roha di jolma godangan.   Alai didok Tuhan I do, ndang I do pe ujung na.

Didok di ayt 28-29” Alai sian hau ara I ma guruhon hamu tudosanna. Ia dung martunasi punsuna jala rungkar bulung na, botoonmuna ma naung jonok partaonan las, suang le songoni, jumpa diida hamu masa angka ondeng, botoonmuna ma naung jonok hasosonggopna. Hau ara, tanaman special do on di Israel manang di Timur Tengah.  Hau na pir jala na angur , najolo dipangke Raja Salomo do on tu pembangunan bagas joro ni Debata na tinuhorna sian Tirus (2.Sam 5;11). Hau ara on jotjot dipatudos Tuhanta I tu bangso Israel dohot tu angka pemimpin agama. Di Markus 11;2 “ hona toru hau ara dibahen Tuhan Jesus ala so marparbue hape nunga tingkina marparbue. Na manggombarhon halak Israel do Tuhan Jesus di si. Ia halak Israel na so marparbue di haporseaon ingkon songo hau ara I gabe hona toru.

Alai didok Jesus nangkin marguru tu hau ara, molo nunga naeng martunasi punsuna jala rungkar bulungna, pasti na jonok ne ma partaonan las. Lapatanna ni hata on, songoni ma nang haroro ni Tuhan Jesus pasti dang adong keraguraguan di si. Songoni do nang umpama “ songon halak na marhuta sada na manadingkon jabuna , disagihon do huaso tu angka na posona, tu ganup siulaonna be, jala sijaga pintu I didokkon marjaga. (ay.34-35). Dang dipaboa tu sijaga pintu manang sadihari, jam piga, tanggal piga haroro ni tuanna I, alai didok do tu ibana, so tung jumpangsa hamu modom. Na nidok ni ayat on,  na ingkon ro do Ibana muse,  asa unang tarpadom hita.  Lapatanna unang tardapot hita lalap diparlalapan alani portibion, unang tardapot hita mangulahon dosa, unang tardapot hita mar debata sileban, mardatu, marbadai, pahatahata dongan, unang tardapot hita madabu tu ginjang ni roha.

Alai dungo ma hita tongtong. Ala so binoto manang sadihari haroro ni Tuhan I, jala pasti do ianggo haroro Na, ingkon dungo do hita managam haroro na i.  Dungo : tinggil di sora ni Tuhan jala pahusorhusorhon Hata Na I di ngolunta asa mangula Tondi ni Tuhan ta di hita laho margogoihon haporseaonta di hasiaongan on. Ditingki parasirohaon on, ta haburjuhon ma mangulahon ulaon na hombar tu hata ni Tuhanta. Ta paserep rohanta tu Ibana, gomos hita martangiang huhut benget hita mangadapoi siadopanta di hasiangan on. Ta haburjuhon ma tu bagas joro ni Tuhanta laho tu mangihon HataNa huhut manjalo hasesan ni dosanta sian Ibana marhite naposaNa.  Ai naeng boanon na do hita tu surgo I, hangoluan saleleng ni lelengna. Na pajumpang do hita muse dohot angka donganta, sisolhonta naung jumolo dialap Tuhanta.  Sialani i: Sai burju ma ho rasirasa mate; dungi lehononku ma tu ho tumpal hangoluan I (Pangukapon 2;10 b). amen.

Panurat: Pdt. Jon Albert Saragih, M.Th

JAMITA MINGGU IX DUNG TRINITATIS: POS MA ROHAMUNA (MARKUS 6:45-56)

Patujolo:

Digoari do halak Kristen, halak na mardalan laho mandapothon situjuon ni tondina. Ragam do siboluson di angka na mandalani sidalanan; sipata las do roha alai sipata ponjot do roha ala angka hamaolon sibolusonta. Di hita angka na porsea dijouhon Jesus do hita asa tongtong marpos ni roha tu Ibana manang songon dia pe na masa di pardalanan ni ngolunta. Marhitehite jamita on didok Tuhan Jesus do tu hita, Thema:

“POSMA ROHAMUNA”

Ilustrasi Gambar

I.         Unang Mabiar.

Mangoloi do sisean i di hata ni Tuhan Jesus, di dok do tu nasida asa laho tu bariba ni tao i tu huta Betsaida, borhat do nasida marparau alai anggo Jesus dang rap dohot nasida, laho do Ibana tu dolok martangiang sasadasa. Dung bot ari jala nasida pe nunga di tonga ni tao i mangalugahon parau nasida i tarsosak ma nasida binahen ni alogo na gogo, na mansai alo tu nasida jala mambahen nasida mabiar. Mabiar nasida lonong jala mago di tao i. Jala alogo sisongon i do sihabiaran ni angka pelaut manang parkapal nang ditingki on. Pigapiga kapal na berlayar na mengalami cuaca buruk songon na nialaman ni parau ni sisean i mago do ujung na.

Onom taon na salpu i ma di taon 2018 harom do Kapal Motor Sinar Bangun di tao toba (Simarmata-Tigaras), hinorhon ni alogo na mansai gogo dohot galumbang na mansai balga. Godang do korban jiwa, jala piga-piga dang haidaan bangkena. Songon i do di angka inganan na asing manang di laut sai olo do binege barita tenggelam kapal ala ni ombak manang alogo na mansai gogo. Sasingtongna cuaca buruk sisongon i do sihabiran ni angka par kapal siala ni i do angka kapal modern nuaeng ingkon diperlengkapi do dohot alat-alat pendeteksi cuaca. Somalna sian pihak penjaga pelabuhan pe adong do himbauan taringot tu cuaca. Molo cuaca dang denggan berhak do penjaga pelabuhan mangorai asa unang berlayar. Nang pe adong alat pendeteksi i, alai tung so boi do i gabe jaminan di angka na mangalugahon parauna. Jala terbatas do kemampuan ni jolma meramal cuaca. Asa olo do tompu tarsosak halak na marparau alani tompu ro alogo na gogo dohot galumbang na mansai balga.

Songoni do gombaran pardalanan ni ngolunta di portibi on. Dijouhon Tuhan i do hita asa ro hita tu Ibana jala bongot hita tu parsaoranNa. Di bagasan pardalananta on, godang angka na mambahen hita tarsosak jala mambahen hita mabiar. Tarsosak do hita alani na so denggan parsaoran ni keluarga, tarsosak do hita alani ekonominta na sangat rendah, tarsosak do hita alani parbalokan, tarsosak do angka naposo ala masa depan na so jelas, manang ala na so adong dope ro rongkapna jala tarsosak do hita sude molo masa banjir, molo ro suhul, molo masa porang, molo masa sahit na menular songon i do nang alani hamatean.

Sude na masa on mambahen hita mabiar, jala boi do i manundati langkatta ro mangalusi joujou ni Tuhan Jesus, gabe manimbil hita sian dalan na pinatuduhonNa i di hita, laho hita tu dalan na asing mardebata sileban. Godang halak alani biarna diparngoluon on gabe ditondong dalan na holom, dirohana boi pasonangkon jala paluahon rohana. Halak na sai mabiar mida parngoluon on, jotjot ndang di ingot Tuhan Jesus. Sisiasia do i molo gabe laho hita tu dalan na asing, mardebata sileban, na harom do haporseaonta dibondut sibolisi jala mago do ujung ni tondinta. Alani papos ma roham tu Tuhan Jesus, Ibana do na tuk Paluahon hamu.

II.        Tuk Do Huaso ni Tuhan Jesus Paluahon ho

Diboto Tuhan Jesus do sude angka na masa di hasiangan on, ai Debata do Ibana. Na marhuaso do Tuhan i, mangatur jala mamarentahon siparentaonNa. Sude marsomba tu Ibana na di banua ginjang dohot na di tano nang na di toru ni tano (Filipi 2;10). Di na tarsosak sisean i di tonga ni tao, diboto jala diida Jesus do nasida tarsosak huhut mabiar. Ro do Jesus mardalan disisik ni tao i mandapothon nasida, gabe tamba biar ni roha nasida ai dirimpu nasida na ro i tondi/begu molo di hata Indonesia didok hantu, gabe mangangguhi ma nasida. Songon i ma huroha molo ponjot roha, molo tarsosak hita, jala mabiar hita gabe so taboto do normal marroha manang marpingkir. Ai Tuhanta i do na ro na naeng mangurupi alai gabe dirimpu tondi/begu (hantu). Singotsingot do on di hita asa unang alani na tarsosak gabe so ditanda Tuhan i.

Di na ro Tuhan i, naeng mangurupi sisean i do. Dung manaek Tuhan i tu parau i, pintor menak do alogo i, sude nasida tarhalomong marnidasa (ayat 51). Taida dison pangaramotion ni Tuhan Jesus dohot holong na na balga i dilehon mangaramoti pardalanan ni angka sisean-Na I, malua nasida sian hamagoan jala sahat tu labuhan. Tuk do huaso ni Tuhanta i paluahon hita sian na sa parmaraan dohot hamagoan. Ai Debata do Ibana, mardalan do Ibana di sisik ni tao i, jala diboto do ponjot ni roha ni sisean i. Digoari do Ibana maha hadir (Omni presentia), digoari do Ibana Allah Mahakuasa (El Shaddai). Tung so adong do na boi mangatasi huaso ni Tuhan Jesus na laho paluahon hita. Natutu situtu do Ibana Debata.

Ibana do napaluahon hita sian hamagoan alani dosa. Sude do hita jolma pardosa jala upa tinuhor ni dosa do hamatean. (Roma 6;23, 3;23). Tung so adong hita na boi paluahon dirinta sian hamagoan i, ndang tarpangasahon hita haburjuonta, manang songon na binahen ni parugamo na asing, marpuasa, mambahen amal dohot na asing. Sude caracara ni hajolmaon siasia do i di adopan ni Tuhanta. Holan asi ni rohaNa sambing do umbahen malua hita i ma marhitehite hamamate dohot haheheoNa. Johanes 11;25-27 Didok Tuhan Jesus: ”Ahu do haheheon dohot hangoluan; na mangolu do naporsea di Ahu nang pe mate Ibana”.

III.      Alani Posma Roham tu Ibana.

Molo di hata Indonesia hira so adong do tudosan ni hata manghaposi. Alai mungkin boi do tapangke marsigantung, penyerahan sepenuhnya kepada Tuhan. Jadi molo di dok manghaposi Tuhan Jesus, i ma halak na marsigantung manang na pasahathon hibul ngoluna tu Tuhan Jesus. taida di turpuk on dung haruar Tuhan Jesus dohot sisean i sian parau, pintor torop do halak na mangusung angka na hansitan tu Tuhan Jesus, na deba dipeakkon do di alamanna be na hansitan i ala di roha nasida boluson ni Tuhan Jesus do dalan nasida i.

Marmacam do na marsahit on, jala ra nunga deba loja nasida marubat manang dipaubathon angka sisolhotna alai dang adong dapot hamamalum. Dung dibege nasida ro Tuhan Jesus, pintor pos do roha nasida na naeng pamalumon ni Tuhan Jesus do nasida na hansitan i. taida dison, adong pos ni roha/ penyerahan diri tu Tuhan Jesus. Di na mangolu on, di na mardalan do pe hita di hasiangan on, ingkon pos do rohanta di Tuhan i, Ibana do na tuk pasonanghon hita di angka pardalananta. Amin.

 Sinurathon ni: Bishop Pdt. Jon Albert Saragih, M. Th

JAMITA PASSION: MARPANGOLOION MA HITA DISUARA NI TUHAN I (LUKAS 20:9-20)

Patujolo:

Sude do hita ra hea merasa dang dihargai, dang dianggap di papulik sian kelompok alani sada kondisi tertentu. Pasti haacit do roha! Alai dipaingot do hita nangpe jotjot hita mengalami penolakan sian torop jolma nang songoni pe sian dirinta sandiri, alai Tuhan Debata tontong rade manjanghon hita dibagasan holong ni roha jala nabuas manesa dosanta songondia pe balgana. Dibagasan turpuk on berengonta ma songondia do Debata torus manurdukhon tangan-Na nang pe jotjot ta tulak Ibana, sai tontong do di asi i hita. Marhite jamita on  di jouhon do tu hita.

Tema: MARPANGAOLOI MA HITA DISUARA NI TUHAN I

Ilustrasi Gambar Passion V

I. Unang tulak Joujou_Na i

Dipatujolo ni umpama on, itajaha do taringot tu nampunasa ugasan porlak anggur pasahathon ugasanna tu angka pangula, nasida manjalo tugas laho mangaramoti porlak anggur i, alai disada tingki nampusa ugasan manuru naposona laho manjalo gogo ni porlak anggur i deba, pangula i justru manulak huhut mangolombuti naposo nasinuru ni nampunasa ugasan i. Songon i do nang tu anak ni nampunasa porlak i disangkapi pangula i do asa mangago hosana jala dipamate asa anggiat panean nasida di porlak i.

Umpama on paingothon hita bahwa jotjot hian do hita songon pangula nangkingan. Dingolunta siganup ari, hita mungkin mandok bahwa hita “mempunyai hak” taringot tu ngolunta sandiri. Jotjot do hita membangkang, mangalo Tuhan i ditingki dipangido tu hita laho mamelehon parbue ni ngolunta tu Ibana—apakah itu waktu, talenta, gogo, manang nasa na adong di hita. Torus do hita di jou Tuhan i marhite naposo nasinuru ni Tuhan i, alai jotjot do hita manulak panjouon manang suara ni Debata dibagasan ngolunta, gabe bais panjouon-Na, dang sadar hita nunga manulak holong ni rohana-Na nasa i marpamuati tu hita.

Umpama on gombaran do on bahwasana ia nanampusa porlak ima Debata, naposo na sinuruna i ima panurirang manang parbarita nauli, molo anak i, ima Jesus Kristus. Ulaon ni naposo i ima pasahathon tona/barita na sian Debata, mamusa nasinuru ni Debata sarupa do i mangalo parenta, dang manjangkon, menolak tunduk, dang marpangoloion tu Debata. Dibagasan rohanta, jotjot do sai tarimpu bahwa hita umbotoan aha na terbaik di dirinta. Jala on ima dosa naserius. Seharusna ingkon tasadari do bahwa panulakonta dang na marlapatan holan manulak patik-Na, alai dohot do naso mangargahon holong ni roha dohot pengorbanan ni Debata nabalgai tu hita. molo tapangasahon rohanta, gogonta, laho manean porlak tanpa Kristus, tanpa marpangoloion tu Debata sasintongna pangkirimon sisoadada i, sarupa do i songon namaranganangan dang pola karejo alai godang ro pancarian. Molo dang denggan motivasinta dohot tahita laho marsangkap manean porlak ni Debata uhum do jambarta. Dang adong pilihan na asing dungkon mangasahon silehon-lehon ni Debata jala i do sada kesempatan tu hita laho masuk tu bagasan porlak ni Debata. Segala sesuatu na nilehon ni Debata tu hita ingkon taargahon do i, jala manatap do hita nasa na adong di hita silehon-lehon ni Debata na ingkon dipertanggung jawabhon tu silehon basabasa i. Tugasta holan mangaramoti silehonlehon ni Debata anggiat asa unang marisuang silehon-lehon i. Jala ingkon haposan do hita disaluhutna jala pataridahon parbue ni ngolunta ala ni sibabasa ni Debata.

Nang pe marulakulak dipusa pangula i nasinuru ni Debata alai tong dope ditongos naposo na asing bahkan anak-Na sandiri ro manopot pangula i. Gombaran do on di hita bahwasana parlambas roha do Debata natongtong mangalehon kesempatan tu pangulai anggiat marpangoloion nasida diparenta Debata. Sian umpama on tabereng do cara ni Debata mamangkulingi hita marhite barita nauli dohot keseriusan ni Debata namanghaholongi hita marhite mangalehon Anak-Na Jesus Kristus asa anggiat manjangkon hita tu Ibana asa tarlehon hita parbue na ni igil ni Debata sian hita, ima parbue ni ngolu hinorhon ni pangoloion tu Debata. Tabereng ma tu dirinta marsadasada tung jolma pardosa situtu do hape hita, i do hape umbahen hita gabe marsirang sian Debata alani panulakon ni rohanta tu Ibana.

II. Ai Parasi Roha Do Tuhan i tu Hita

Alai, dang adong barita na ummuli sian barita las ni roha, ima Hata ni Debata. Ditingki jotjot hita jatuh bangun dipardalanan ni haporseaonta, gabe madabu hita tu Dosa, Jesus Kristus ro mamboan pos ni roha dohot panghirimon. Dibagasan umpama on, nang pe pangula porlak anggur i manulak huhut mangalombuti naposo nampunasa porlak i, tong dope ditongos nampunasa ugasan i anak-Na, i ma Jesus Kristus! Jesus do gombaran ni anak di umpama on, na ro tu portibion laho paluahon hita, nang pe diboto Ibana na ingkon marsitaonon Ibana, di tulak jolma i Ibana. Sian jamita on tabereng do tangkas holong ni Debata mansai balga situtu tu hita jolma pardosa, ditingki tatulak barita las ni roha dohot naposo ni Tuhan. Alai Tuhanta i dang intor dibaloshon hajahaton ni pangula porlak i. Dilehon Debata do kesempatan tu nasida anggiat olo nasida marpangoloion tu Debata jala manjangkon tona ni Debata. Kesempatan selalu dilehon Tuhan tu hita, dang dibereng Debata latar belakangta songondia, panangko, pamangus, parjahat, pardosa sahali pe hita dirohanta, alai tarhirim do Tuhan i anggiat tarajumi sudena silehon-lehon ni Debata ingkon do tajangkon dibagasan roha na ias, gabe haposan hita jala pataridahon parbue ni ngolunta na ingkon sipelehononta tu Ibana.

Dang adong na boe sipangasahononta asa gabe panean hita tu Porlak ni Debata, sude nasa parulaon dohot gogo ni Jolma dang manjamin jolma i bongot tusi. Ingkon nampusa porlak i do manjou hita bongot tusi asa bongot tusi. Ido pola Jesus Kristus ditongos tu hita asa anggiat tajangkon Ibana dibagasan rohanta ganup marsadasada asa taruli hita dihangoluan nasorasuda. Alani hajahatonta do Ibana umbahen na ingkon mate tarsilang, manean sude utang ni dosanta. Dang na alani salana umbahen na tarsilang Ibana, Alai dijujur Ibana do laho manggantihon hita manean uhumanta. Di hau pinorsilang, Ibana mandok: “Nunga Marujung” I ma nalaho paboahon tu hita bahwa sude penolakan, pangalaosionta dibayar lunas marhite holong-Na na sempurna. Na dibagasan keputusasaan hian hita mangolu huhut naso marpangkirimon, alai Tuhan Jesus Kristus mangalehon ngolu-Na asa taruli hita di hangoluan na manontong dibagasan Ibana.

Sadihari pe hita ro tu Ibana dibagasan roha nagopo, manopoti angka dosa-dosanta, sai jouonna do hita manjalo asi ni roha-Na. Hata ni Debata ima barita nauli, barita las ni roha napaboahon marhite haporseaon tu Tuhan Jesus Kristus, taruli hita di hasesaan ni dosa, dang holan taruli di hasesaan ni dosa alai di baen do hita gabe anak-anak ni Debata. Ibana mangalehon hita huaso tu hangoluan hombar tu lomo ni roha-Na. Siganup ari ima tingki na lehet di hita asa mangolu dibagasan asi ni  roha dohot pangoloion tu Ibana.

III. Alani Marpangoloi ma Hita di Suara ni Tuhan I

Marsiajar do hita sian turpuk on bahwa ngolu namarpangoloion tu Tuhan i manuntut hita laho mangargahon huhut manghamuliatehon pasupasu ni Debata di hita. Songon si ihuthon Kristus hita, dijou do hita asa marpangoloion huhut gabe jolma na haposan/ nabertanggung jawab, mangargahon aha na di percayahon Tuhan i tu hita, isarana: parbinotoan, hamoraon, pangkat, gabe dohot ngolunta sude na i silehon-lehon ni Debata do i na wajib tapertanggung jawabhon di adopan ni Tuhan i. Hita dang pemilik, alai Debata do nampunasa, jala silehonlehon do i di hita, sude na adong di hita titipan ni Debata do i. Alani manang aha pe na adong ngolunta sai taboto ma mandok mauliate tu Debata, jala marsigantung tu Ibana ma hita, asa gabe jolma na haposan hita di adopan ni Debata. Jolma naso tahu sian hita diadopan ni Debata, jolma na sering gagal hita mangulahon lomo ni roha-Na alai diboto Tuhan i do i, upaya gogonta dang mampu mencapai Debata alai sai marasi ni roha do Tuhan i tuhita, ido pola Anak-Na Jesus Kristus ro tuportibion asa nasa naporsea tu Ibana taruli hangoluan nasorasuda.

Panurat: Pdt. Jeprianto Marbun, S.Th

JAMITA MINGGU II DUNG TRINITATIS: JESUS DO MESIAS (MARKUS 3:20-35)

Patujolo:

Pelayanan ni Tuhan Jesus menarik perhatian ni torop masyarakat Jahudi nang songoni diluar ni halak Jahudi na ro mandapothon manang mangihuthon Tuhan Jesus, asing majolo sangkapna molo hahoro nasida I ma na naeng mangida tanda halonganan, naeng taruli dihamamalum ni pamatang na marsahit dohot angka lan na asing. Lapatanna adong do pangkirimon nasida di Tuhan Jesus na tuk paluahon nasida sian ragam ni parungkilonnna be umbahen na di ihunton Tuhan Jesus. Ala porsea do nasida adong sesuatu na Istimewa dibagasan diri ni Jesus. Alani songon ondolan ni Jamita, di hita, Tema:

“JESUS DO MESIAS”

Gambar Ilustrasi  

I.         Unang sala panandaionta tu Ibana

Popularitas, ketenaran, hasangapon i do jotjot na dilului halak, sada kebanggaan do on dipencapaian ni ngoluna, sada prestasi na mansai arga na patut dipertahanhon. Ra sogo do roha ni halak molo adong saingan berat apalagi berpengaruh tu pencapaionna, olo do ra di lului cara manggunturi marhite paroaroahon sainganna i boha ma asa tong hot pencapaion i di ibana. Songon i do nang na masa di turpuk on adong 2 hal na boi taida dison:

V  Ay. 21. Naro sisolhot ni Jesus mangalap Ibana, na mandok: na rintik do Jesus, kehadiran ni sisolhot i, i ma na dibege di ay. 20. Torop ni halak mangihuthon Jesus sampe pola sundat mangan. Parjolo: disada sisi holong do dipatupa angka sisolhotna, kemungkinan besar nasida mungkin kwatir ala so mangan, jala kwatir nasida gabe partuktuhan Jesus tu halak Parise, mungkin nasida mengantisipasi persoalan bolon manang bahaya besar mungkin akan terjadi di Jesus molo tetap Ibana menarik perhatian ni torop halak tu Ibana. Kemungkinan na paduahon: di sada sisi muruk nasida tu Jesus jala pangaleaanna i tu Jesus na mandok na rintik bentuk biar ni roha nasida manang mangantisipasi persoalan dipudian ni ari ro tu keluarga nasida alani pelayanan ni Jesus i. Baosa boi pandanggan ni sisolhotna i songon i? Ala so tangkas do panandaion nasida di Tuhan Jesus dohot ulaonNa i tu portibi on. Molo adong pe mangambati ulaon ni Debata di portibi on tudos ma i, na so tangkas dope panandaionna di Tuhan i.

V  Ay. 22 Pandok ni Sibotosurat tu Jesus: Nasibolison do Ibana, jala induk ni angka sibolis i do dipangasahon, laho pabalihon angka sibolis, sasintongna pandohan on hata lea do tu Huaso ni Debata, na dipatudos huaso ni Debata tu huaso ni sibolis, dang holan huaso disi didok alai di dok do Induk ni angka sibolis dipangasahon Jesus laho pabalihon sibolis. Molo digoari induk, lapatanna: Sumber manang pusat, awal haroroan. Secara tidak langsung sumber hagogoon ni Jesus dohot na di bagasan diri Jesus didok nasida I ma pangulu ni sibolis dipatudos nasida tu Debata, on ma na digoari mangaleai Tondi Porbadia. Siboto surat i ma para ahli tokoh Teologis kelas tinggi/ tokoh agama na mangantusi hata ni Debata. Pernyataan nasida tu Jesus ditingki pabali sahalak na sinonggopan ni sibolis gabe hisar, Dipatudos do Jesus agen ni sibolis dang diakui nasida adong huaso ha-Debata-on namangula dibagasan diri ni Jesus. Dipatudos nasida do Huaso ni Jesus sarupa tu sibolis. Secara tidak langsung nasida menolak, menghujat, menghina huaso ni Debata, manulak ulaon ni Debata gabe ulaon ni Sibolis. Boasa boi Sibotosurat mandok hata songon i? Molo tabandinghon di Surat ni si Matius 12:23-24 didok: Jadi tarhalomonong ma halak natorop i saluhutna, didok nasida ma: nda tung on anak ni si Daud ulaning? Ay. 24, Umbegei halak Parise ninna ma: Si Beelzebul induk ni angka sibolis do dipangasahon ibana, laho pabalihon tondi angka na hodar i? Dison nunga tangkas taida sasintongna angka na torop i nunga mereka- reka/menebak bahwa Jesus anak ni si Daud, lapatanna: nasida nunga mulai mananda Identitas ni Jesus sebagai Mesias marhite angka tanda halongangan songon na tarsurat di padan na robi. Umbege panindanggion ni torop di Identitias ni Jesus i mulai terungkap, i do umbahen halak Parise mengklaim Jesus pabalihon tondi na hodar marhite huaso ni si Beezebul. Sasintongna songon tokoh agama nasida, diboto nasida do marhite pangulaon ni Jesus, Ibana do tutu Mesias. Alai dangg dijangkon parulaonNa i. Halak Parise berusaha mangalului pembelaan, atik pe nunga diboto nasida Jesus Mesias sian hata ni panurirangon dohot ciri-ciri ni Mesias di padan na robi sian pomparan si Daud, na marharoroan sian Debata alai disangkal nasida do i saluhutna.

Diboto nasida do ulaon ni Jesus parulaon ni Debata, alai ditulak do Ibana holan alani gengsi dohot pamor hasangapon/ kehormatan di tano on mangarajai nasida. Halak Parise nunga manulak kemungkinan adong pemulihan ni Debata, siala dang jujur nasida diparulaon ni Debata, na mandok ulaon ni  Tuhan Jesus i  ma sebagai tipuan setan. Dison  di pataridahon nasida dirina na so marpangkirimon jala terang-terangan manorui ulaon ni Tuhan i. Menolak Mesias sarupa ma i manulak pemulihan na sian Debata, manang manulak silehonlehon ni Debata. Diboto do Ulaon ni Tuhan i, dibereng do parulaon ni Tuhan i, alai dang dijangkon ulaon ni Tuhan i dingoluna. Percaya Tuhan,alai dang menerima kehadiran Tuhan dingoluna. Jesus marjanji bahwa tarsesa pe nasa dosa ni angka jolma rodi nasa ragam ni panginsahionnasida na dompak Debata (Markus 3:28)! Alai Sibotosurat manginsahi dohot mangaleai sudena i sasintongna sangat berbahaya. Songon dia boi parjadina tokoh Agama mangaleai Debata na nihaporseaonna, manang parulaonNa, mangaleai pasupasu na nyata jala sangat nyata tipak dijolona marhite angka tanda halongangan. Marhite umpama na pinatorang ni Jesus, Jesus menganggap diriNa ummarhuasoan sian pamarentaan ni sibolis. Unang ma songon halak Parise, mago akal sehat hinorhon ni Ambisi.

 II.        Marhuaso do Ibana Paluahon Hita

Ay. 27. Dang habongotan halak jabu ni ulubalang, laho mangarampas ugasanna, anggo so jumolo diihoti ulubalang i: dung pe i, asa tarbuatsa ugasanna. Sasintongna Penuh kekerasan taringot tu mangarampas ugasanna, Jesus menggombarhon diriNa sebagai halak na mampu manaluhon pamarentaon ni Sibolis marhite “mangihoti ulubalang i” dung i pe i, asa tarbuatsa ugasanna. Umpama gombaran do on sebagai pernyataan Missi ni Jesus mangarampas hita sian harajaon na asing/ harajaon ni sibolis asa mangolu hita di harajaon ni Debata. Dipalua do hita sian gomgoman ni sibolis pangago i asa marhasonangan dibagasan harajaon ni Debata.

Marhite aha hita dipalua? Dr. Martin Luther Mandok di Ponggol II: Taringot Hata Haluaon Ni Manisia: “Ahu porsea di Jesus Kristus Anak ni Debata Jahowa nasasada i; dst…. Dia do lapatan ni i: “Na diparhatutu rohangku do Anak ni Debata situtu Jesus Kristus, na tinubuhon ni AmaNa di na robi ni na robi jala jolma situtu do Ibana ditubuhon si Maria andorang so habubuhan, i do Tuhanku na humophop ahu jala na manghamonanghon. Dipalua do ahu sian hamagoan, ahu na hona toru dohot sian dosa dohot sian hamatean dohot sian gomgoman ni sibolis i, ndada sere manang perak dibahen, tung mudarNa do na arga jala na badia dohot habebernit ni sian ni bagi na tinaonNa i dohot hamtean na so sian salaNa, asa Ibana nampuna ahu jala asa tigor rohangku jala bontor jala sonang mangoloi Ibana salelenglelengna di gomgomanNa; asa songon Ibana ahu na hehe sian hamtean, na mangolu jala manggomgomi salelenglelengna. I ma na tutu situtu.

III.      Alani i Jangkon Ma Ulaon Ni Tuhan i Dingolum

Panjangkononta songon naung pinalua ni Tuhan Jesus hita, i ma mangulahon lomo ni roha ni Debata songon parbue ni haluaon i di hita. Taloas ma Tondi Porbadia mangula dihita asa tarjalo hita ulaon Tuhan i di ngolunta. Dr. Martin Luther mandok di Hata Haporseaon Ponggol Patoluhon: “Ahu porsea di Tondi Parbadia, dst… Dia do lapatan ni i?: Na diparhatutu rohangku do, na so tarbahen ahu porsea di Jesus Kristus Tuhanku manang mandapothon Ibana, ianggo tung sian roharohangku manang sian gogongku sandiri, na dijou Tondi Parbadia i do ahu marhite sian Barita Nauli, dilehon do asi ni rohaNa patiurhon rohangku, diparbadiai do rohangku jala dipatongtong do ahu dibagasan haporseaon na ture, tudos tu na binahenNa i nuaeng tu saluhut halak Kristen na di tano on; ai dijou do nasida jala dipapungu jala dipatiur do rohanasida jala diparbadiai jala dipatongtong do nasida di Tuhan Jesus dibagasan haporseaon na sasada i na tigor i. Angkup ni i buas do rohaNa manesa dosangku ganup ari, ro di dosa ni angka donganku na porsea; dung i pangoluonNa do ahu di ari parpudi ro di nasa na mate, dung i lehononNa do tu ahu dohot tu nasa na porsea di Tuhan Jesus hangoluan na so ra suda. I ma na tutu situtu.  Saonari nungga be hita gabe ianakko ni Debata, warga harajaon ni Debata. Lasma rohatta. Amen.

 

Na sinurathon ni: Pdt. Jeprianto Marbun, S.Th

JAMITA PENTAKOSTA I: NUNGA RO TONDI PORBADIA (JOHANES 15:18-27)

 Patujolo:

Sadarion, na marningot do hita di ari haroro ni Tondi Porbadia tu portibion, jotjot ta dok ari Pentakosta (50 ari) dung hehe Tuhan Jesus sian hamatean. Ibana do nanidok ni Tuhan Jesus andorang so manaek tu banuaginjang na mandok “jala suruonku ma songgop tu hamu na pinarbagabaga ni Damang” (Lukas 24;49). Tondi Porbadia do na nidok ni Tuhan Jesus disi, Alani marhitehite Jamitaon didok do tu hita, Thema:

“NUNGA RO TONDI PORBADIA”

Gambar Ilustrasi

I.         Hadirion ni Tondi Porbadia.

Tondi Porbadia i ma sada sian Hasitolusadaon ni Debata, jala Debata do Ibana, na so tarsirangsirang Ama nang Tuhan Jesus Kristus. Sada do Debata alai tolu hadirionna i ma Debata Ama, Anak dohot Tuhan Jesus. Tung so siat do tu pingkiran ni torop jolma molo ditaringoti Hasitolusadaon ni Debata. Ragam pandapot ni jolma taringot tusi, songon pandok ni parugamo Islam didok do tolu debata ni halak Kristen (Politeisme). Songon i do nang na jolo sian tokoh ni halak Kristen na margoar Si Arius, di tahun 250- 336 sian Alexandria, Mesir uju di harajaon ni Kaisar Konstantinus Agung, ditulak ibana do hadebataon ni Kristus nang songoni hadebataon ni Tondi Porbadia. Sialani marrapot do huria (Konsili-I) taon 325 di Nicea, Konstantinovel manang sonari Negara Turki laho manaringoti poda na niajarhon ni si Arius laos diputushon do dirapot i, na lipe do poda niajarhorn ni si Arius jala di goari do ibana sahalak bidat (parpoda haliluon). Alai nuaeng pe adong do na mangihuthon poda ni si Arius on i ma Saksi Jahowa. Mansai ringgas do Saksi Jahowa manopoti angka ruas, asa manat hita sotung dohot hita mansoadahon hadebataon ni Tuhan Jesus dohot Tondi Porbadia. Ia halak namansoadahon hadebataon ni Tuhan Jesus nang Tondi Porbadia dang tama parsidohot di harajaon ni Debata angka jolma na mansoadahon Hadebataon ni Tuhan Jesus dohot Tondi Porbadia.

Di turpuk on, ayat 26 didok: “Asa ro ma Pangondian I, sisuruonKu sian Ama I tu hamu, i ma Tondi hasintongan i, na borhat sian Damang; i do na manghatindanghon taringot tu Ahu.” Tondi hasintongan mandok Tondi Porbadia do i, na paboahon status ni Tondi Porbadia sian angka tondi-tondi na asing diportibion na hinaporseaan ni jolma. Ai godang do tondi diportibion dipanggoari jolma, jala martondi ro di angka hau manang dolok. Alai holan sada do Tondi hasintongan i ma Tondi Porbadia Ibana do na mangajarhon taringot tu hasintongan ni Debata nang taringot tu Tuhan Jesus. Molo parugama Islam dilapati nasida do Tondi Pangondian i (Roh Penghibur) si Muhammad, sahali mulak marhuria hami, manompang ma sahalak ama dung masitandaan hami, pandok na Islam do ibana. Adong do hatana mandok di Bibel pe adong do tarsurat goar ni si Muhammad, lam hutangkasi ma hape nanidokna i ma na tarsurat di Joh 14;16 “Jala pangidoonku ma tu Ama I, asa dilehon tu hamu sada Pangondian na asing asa i mandongani hamu salelengna i. Menurut ibana Pangondian i i ma si Muhammad. Hata Pangondian na nidok ni Tuhan Jesus tung so adong pardomuanna tu si Muhammad. Si Muhammad pe tubu di abad VI (tahun 571) hape Tondi Porbadia ro tu portibion hirahira abad parjolo. jadi lipe do pandohan nasida i.

Tondi Porbadia i, borhat sian Damang jala na sinuru ni Tuhan Jesus. On Hata ni Debata na paboahon taringot tu Hasitolusadaon ni Debata, i ma Debata Ama, Anak dohot Tondi Porbadia. Na sada do I alai tolu hadirion (kepribadian). Tondi Porbadia nunga adong hian andorang so ojak dope portibion (1 Musa 1;2,) Ibana do Tondi na manongtong I (Heber 9;14), na gok parbinotoan (maha tahu) 1 Korint 2;10, na gok huaso (Maha kuasa) ayub 33;4, Pslm 104;30. Di rapot ni Huria (konsili Nicea) I, diputushon do taringot tu hadirion ni Tuhan Jesus na Debata situtu do Ibana songoni do nang Tondi Porbadia. Alani anggo hadirion ni Tondi Porbadia na tutu situtu do Ibana Debata.

II.       UlaonNa di hita.

1.      Patoguhon haporseanta.

Didok Tuhan Jesus tu siseanNa molo di hosomi portibion hamu, boto hamu ma, naung jumolo Ahu di hosomi (ayat 18). Ndang boi so dihosomi portibion angka na porsea di Tuhan Jesus, gariada leleanna do angka na porsea I. jumlo tabereng parange ni angka na mangarajai dohot angka siboto surat uju di ngolu ni Tuhan Jesus diportibion. Dipataridahon raja Herodes do pangalaho na so suman maradophon Tuhan Jesus. Sipalessem do hatana i na nidok na tu halak na ro sian Purba (Majus) molo nunga jumpang hamu Raja I, paboa hamu tu ahu, asa dohot ahu marsomba tu ibana, hape naeng pusaonna do Posoposo i. Songoni pambahenan ni angka sibotosurat nang halak Farisi, Jahudi pola paporsukporsuk jala diparsilangkon nasida Tuhan Jesus. Alani i mabiar sude angka sisean i maradophon halak Jahudi, sai dijabu do nasida marpungu.

 Di sejarah ni huria na parjolo disurathon do manang songondia sitaonon na ni adopan ni halak Krsiten. Parjolo sahali na mate martir alani haporseaon tu Tuhan Jesus ima Stefanus, mate didangguri dohot batu ala dituduh menista agama. (Ul. Apostel 7;54-8;3). Nang sahat tu tingkion pe mansai godang do manghosomi halak Krsiten, sipata gareja dipaksa ditutup, dang diloas patupa partangiangan manang ibadah. Molo tung songon i pe masa taadopi dihasiangan on, ndada pasombuon ni Debata hita di hamaolon I, dipargogoi do hita jala di papos rohanta laho mangadopi I asa unang mandele hita manang gabe taihuthon nasida, ai disuru Debata do Tondi Porbadia tu hita, Ibana do margogihon hita di angka pangalaho ni portibion. Asa tutu ma songon pandok ni si Tertulianus: “mudar ni na mate martir do boni ni huria i”.

2.    Mangajari Portibion taringot tu dosa dohot hapintoron dohot taringot tu uhum.

Diayat 24 didok: “aut unang huula angka ulaon ditongatonga nasida, na so dung niula ni jolma, ndang mardosa nasida disi; alai nunga diida nasida i, gabe dihosomi nasida nang Ahu, nang damang.” Nunga ro Tuhan Jesus tu tungatonga ni halak Jahudi, jala dipatupa Tuhan Jesus do tu nasida pangajarion taringot tu Harajaon ni Debata. Angkupni, dipatupa do godang tanda halongangan, na so hea jala na so tarpatupa jolma, alai tung so porsea nasida, gariada gabe targasip do nasida mida Tuhan Jesus uju naro Tuhan Jesus tu Jerusalem naeng marari raya Paska, torop halak Jahudi di Jerusalem mangolopolophon huhut mandok Hosiana; palua hami. Alai dung sahat Tuhan i, gaor ma na sahuta i, marsipandok hatana be, taringot tu Jesus. Alana ndada songon na hinirim nasida haroro ni Raja i. Di roha nasida tar songon raja David na mangarajai di Israel na jolo ma di ida nasida Tuhan Jesus, maniop podang, marhoda nian, dikawal torop angka soldadu. Hape ro Tuhan Jesus manaiki halode, tanpa pengawalan soldadu. Alani i pigapiga ari nari, angka na mandok Hosiana i, laos i do ra na mandok hata “parsilangkon, parsilangkon”.

Tutu ingkon marsitaonon do Tuhan Jesus, jala mate di hau pinarsilang jala hehe di ari patoluhon na laho paluahon portibi on sian dosa. Alai halak naung tumangihon HataNa songoni angka naung marnida tanda nabinahenNa tung so adong tubu diroha nasida holong. Jadi dang ditanda nasida dosa i, jala ndang adong panggora ni roha. Naung dirippu nasida do naung sintong parulaonnasida i di Debata hape sala. Marhitehite Tondi Porbadia na ro tu portibi on, mangajari hita taringot tu dosa. Di Johanes 16;8 “anggo dung ro Ibana ajaran na do portibion taringot tu dosa dohot taringot tu hapintoron dohot taringot tu uhum.”

III.      Alani tajangkon ma Tondi Porbadia.

Terbatas do kemampuanta manang pangantusionta taringot tu Debata nang angka ulaonNa dohot angka na sinangkapanna di hita angka na porsea. Dibagasan keterbatasanta i, disuru Debata Tondi Porbadia mangajari hita taringot hasintongan. Ndang tuk gogonta mangadopi angka na masa di portibi on, jotjot gale haporseaonta, alai ro Tondi Porbadia margogoihon hita mangadopi hamaolon i. Jotjot do hita terpengaruh ala ni haulion dohot hinatabo ni angka na adong diportibion, sai naeng songoni hita dirohanta, olo ma tergiur hita hape nunga maralo tu Hata ni Debata, Dipaingot Tondi Porbadia do hita diangka dosa. Angka nauli jala na denggan do jumpang di ngolu ni angka na manjangkon Tondi Porbadia, i ma holong, las ni roha, dame dohot lambas ni roha, habasaron, habasaon, haporseaon, halambohon dohot hatomanon (Galatia 5;22). Antong ta jangkon ma Ibana. Amen.

 

Sinurathon ni: Bishop Pdt. Jon Albert Saragih, M. Th