JAMITA MINGGU IX DUNG TRINITATIS: POS MA ROHAMUNA (MARKUS 6:45-56)

Patujolo:

Digoari do halak Kristen, halak na mardalan laho mandapothon situjuon ni tondina. Ragam do siboluson di angka na mandalani sidalanan; sipata las do roha alai sipata ponjot do roha ala angka hamaolon sibolusonta. Di hita angka na porsea dijouhon Jesus do hita asa tongtong marpos ni roha tu Ibana manang songon dia pe na masa di pardalanan ni ngolunta. Marhitehite jamita on didok Tuhan Jesus do tu hita, Thema:

“POSMA ROHAMUNA”

Ilustrasi Gambar

I.         Unang Mabiar.

Mangoloi do sisean i di hata ni Tuhan Jesus, di dok do tu nasida asa laho tu bariba ni tao i tu huta Betsaida, borhat do nasida marparau alai anggo Jesus dang rap dohot nasida, laho do Ibana tu dolok martangiang sasadasa. Dung bot ari jala nasida pe nunga di tonga ni tao i mangalugahon parau nasida i tarsosak ma nasida binahen ni alogo na gogo, na mansai alo tu nasida jala mambahen nasida mabiar. Mabiar nasida lonong jala mago di tao i. Jala alogo sisongon i do sihabiaran ni angka pelaut manang parkapal nang ditingki on. Pigapiga kapal na berlayar na mengalami cuaca buruk songon na nialaman ni parau ni sisean i mago do ujung na.

Onom taon na salpu i ma di taon 2018 harom do Kapal Motor Sinar Bangun di tao toba (Simarmata-Tigaras), hinorhon ni alogo na mansai gogo dohot galumbang na mansai balga. Godang do korban jiwa, jala piga-piga dang haidaan bangkena. Songon i do di angka inganan na asing manang di laut sai olo do binege barita tenggelam kapal ala ni ombak manang alogo na mansai gogo. Sasingtongna cuaca buruk sisongon i do sihabiran ni angka par kapal siala ni i do angka kapal modern nuaeng ingkon diperlengkapi do dohot alat-alat pendeteksi cuaca. Somalna sian pihak penjaga pelabuhan pe adong do himbauan taringot tu cuaca. Molo cuaca dang denggan berhak do penjaga pelabuhan mangorai asa unang berlayar. Nang pe adong alat pendeteksi i, alai tung so boi do i gabe jaminan di angka na mangalugahon parauna. Jala terbatas do kemampuan ni jolma meramal cuaca. Asa olo do tompu tarsosak halak na marparau alani tompu ro alogo na gogo dohot galumbang na mansai balga.

Songoni do gombaran pardalanan ni ngolunta di portibi on. Dijouhon Tuhan i do hita asa ro hita tu Ibana jala bongot hita tu parsaoranNa. Di bagasan pardalananta on, godang angka na mambahen hita tarsosak jala mambahen hita mabiar. Tarsosak do hita alani na so denggan parsaoran ni keluarga, tarsosak do hita alani ekonominta na sangat rendah, tarsosak do hita alani parbalokan, tarsosak do angka naposo ala masa depan na so jelas, manang ala na so adong dope ro rongkapna jala tarsosak do hita sude molo masa banjir, molo ro suhul, molo masa porang, molo masa sahit na menular songon i do nang alani hamatean.

Sude na masa on mambahen hita mabiar, jala boi do i manundati langkatta ro mangalusi joujou ni Tuhan Jesus, gabe manimbil hita sian dalan na pinatuduhonNa i di hita, laho hita tu dalan na asing mardebata sileban. Godang halak alani biarna diparngoluon on gabe ditondong dalan na holom, dirohana boi pasonangkon jala paluahon rohana. Halak na sai mabiar mida parngoluon on, jotjot ndang di ingot Tuhan Jesus. Sisiasia do i molo gabe laho hita tu dalan na asing, mardebata sileban, na harom do haporseaonta dibondut sibolisi jala mago do ujung ni tondinta. Alani papos ma roham tu Tuhan Jesus, Ibana do na tuk Paluahon hamu.

II.        Tuk Do Huaso ni Tuhan Jesus Paluahon ho

Diboto Tuhan Jesus do sude angka na masa di hasiangan on, ai Debata do Ibana. Na marhuaso do Tuhan i, mangatur jala mamarentahon siparentaonNa. Sude marsomba tu Ibana na di banua ginjang dohot na di tano nang na di toru ni tano (Filipi 2;10). Di na tarsosak sisean i di tonga ni tao, diboto jala diida Jesus do nasida tarsosak huhut mabiar. Ro do Jesus mardalan disisik ni tao i mandapothon nasida, gabe tamba biar ni roha nasida ai dirimpu nasida na ro i tondi/begu molo di hata Indonesia didok hantu, gabe mangangguhi ma nasida. Songon i ma huroha molo ponjot roha, molo tarsosak hita, jala mabiar hita gabe so taboto do normal marroha manang marpingkir. Ai Tuhanta i do na ro na naeng mangurupi alai gabe dirimpu tondi/begu (hantu). Singotsingot do on di hita asa unang alani na tarsosak gabe so ditanda Tuhan i.

Di na ro Tuhan i, naeng mangurupi sisean i do. Dung manaek Tuhan i tu parau i, pintor menak do alogo i, sude nasida tarhalomong marnidasa (ayat 51). Taida dison pangaramotion ni Tuhan Jesus dohot holong na na balga i dilehon mangaramoti pardalanan ni angka sisean-Na I, malua nasida sian hamagoan jala sahat tu labuhan. Tuk do huaso ni Tuhanta i paluahon hita sian na sa parmaraan dohot hamagoan. Ai Debata do Ibana, mardalan do Ibana di sisik ni tao i, jala diboto do ponjot ni roha ni sisean i. Digoari do Ibana maha hadir (Omni presentia), digoari do Ibana Allah Mahakuasa (El Shaddai). Tung so adong do na boi mangatasi huaso ni Tuhan Jesus na laho paluahon hita. Natutu situtu do Ibana Debata.

Ibana do napaluahon hita sian hamagoan alani dosa. Sude do hita jolma pardosa jala upa tinuhor ni dosa do hamatean. (Roma 6;23, 3;23). Tung so adong hita na boi paluahon dirinta sian hamagoan i, ndang tarpangasahon hita haburjuonta, manang songon na binahen ni parugamo na asing, marpuasa, mambahen amal dohot na asing. Sude caracara ni hajolmaon siasia do i di adopan ni Tuhanta. Holan asi ni rohaNa sambing do umbahen malua hita i ma marhitehite hamamate dohot haheheoNa. Johanes 11;25-27 Didok Tuhan Jesus: ”Ahu do haheheon dohot hangoluan; na mangolu do naporsea di Ahu nang pe mate Ibana”.

III.      Alani Posma Roham tu Ibana.

Molo di hata Indonesia hira so adong do tudosan ni hata manghaposi. Alai mungkin boi do tapangke marsigantung, penyerahan sepenuhnya kepada Tuhan. Jadi molo di dok manghaposi Tuhan Jesus, i ma halak na marsigantung manang na pasahathon hibul ngoluna tu Tuhan Jesus. taida di turpuk on dung haruar Tuhan Jesus dohot sisean i sian parau, pintor torop do halak na mangusung angka na hansitan tu Tuhan Jesus, na deba dipeakkon do di alamanna be na hansitan i ala di roha nasida boluson ni Tuhan Jesus do dalan nasida i.

Marmacam do na marsahit on, jala ra nunga deba loja nasida marubat manang dipaubathon angka sisolhotna alai dang adong dapot hamamalum. Dung dibege nasida ro Tuhan Jesus, pintor pos do roha nasida na naeng pamalumon ni Tuhan Jesus do nasida na hansitan i. taida dison, adong pos ni roha/ penyerahan diri tu Tuhan Jesus. Di na mangolu on, di na mardalan do pe hita di hasiangan on, ingkon pos do rohanta di Tuhan i, Ibana do na tuk pasonanghon hita di angka pardalananta. Amin.

 Sinurathon ni: Bishop Pdt. Jon Albert Saragih, M. Th