JAMITA MINGGU KANTATE: MIAN MA HITA DIBAGASAN JESUS (JOHANES 15:1-8)

Patujolo:

Adong do angka ugamo naeng mangomo hasonangan/surgo marhitehite angka ulaon na denggan, mangalehon asi asi; puasa, dohot na pasiak siak dirina sandiri. Naeng taruli nasida di hasonangan sogot marhitehite ulaonna na nirajum ni roha na denggan; so pola manghaporluhon Tuhan Jesus gabe Sipalua nasida. Marrumanghon agama amal do agama na songon i. Alai di Rom 3, 23 didok hata ni Debata, aluhut na do jolma mardosa; jala ndang dapot pujion ni Debata nasida. Ndang tarpatupa jolma dalan tu banuaginjang; tarpatudos do i tu kapal terbang na mamboan halak tu luat na dao. Holan panumpang i do na boi sahat boanon ni kapal terbang. Songon i hita jolma holan na dibagasan Jesus do na boi sahat tu surgo. Ala ni i dijouhon Jamita on do tu hita: Thema:

“MIAN MA HITA DIBAGASAN JESUS”

Ilustrasi 

I.        Unang ambolong hita (ay. 6)

Di Jesaya 7, 14 digoari do Mesias na sorang i, Immanuel, na marlapatan donganta ma Debata manang saor tu hita Debata. Gok do i di Joh 1:14; gabe daging Hata i (logos) jala maringan ditongatonga ni hita on. Gabe jolma do Debata di bagasan Jesus (Kol 2:9) asa tung saor Ibana tu hita marhitehite hajolmaonNa i. Alai Debata situtu do Jesus. Dipanompaon diullushon Debata Hosa hangoluan tu hita, gabe martondi ma hita, gabe boi ma marparsaoran, marpardomuan Debata tu jolma, jala jolma tu Debata. Aha do panghorhon ni pardomuan i? Debata Jesus do mual ni ngolu, sian Ibana do sandok ngolu ni jolma. Hangoluan na nidokna dison ima ngolu na sian banuaginjang na sian Jesus. Adong nama dua mansam na ro tu jolma; i ma ngolu na manontong, ngolu partondion na jinalo ni ompunta si Adam sian Debata dipanompaon i. Alai dung mardosa jolma i, ingkon hona uhum nama jala mate, ngolu parsatongkinan nama ngolu ni jolma na mardosa, jala ngolu parsatongkinan on pe nunga sai disusupi sibolis i ganup ari, ngolu na mardosa nama na marujung tu hamatean saleleng ni lelengna. Alai ro Debata dibagasan Jesus tu portibi on, diboan do ngolu na manontong i.

Andorang so tarsilang dope Jesus, nunga diserang Ibana sibolis i, jala ujungna muse dipatunduk marhitehite haheheonNa. Alai dijolo ni i nunga torop halak na malua marhitehite ulaon habalgaon dohot jamita Harajaon ni Debata sian Jesus. Nunga torop halak na porsea di Ibana. Angka na mian di Ibana ndang be dikuasai manang hatoban ni sibolis, Jesus nama donganna ganup ari. Jesus do hau anggur i, jala halak na umbege hatana rantingna. Dibagasan ni sumisi do sibolis. Alai nang pe songon i sai diuji sibolis i do asa sompol saluran sipanganon sian batang (Jesus) tu ranting manang tu jolma, jala molo sompol sipanganon hangoluan tu jolma, na gabe songon ranting ni Kristus, mahiang ma ranting i ndang olo marparbue masak ma i ujungna ingkon sigotapon jala dirotongkonon tu api (ay. 2).

Di portibi on pe jotjot do jumpang di ngolu ni torop halak na manggoari dirina Kristen. Ndang ringkot rohana marsaor dohot Jesus, ndang ringkot rohana marminggu, tu partangiangan, ndang dihapusuhon manjaha hata ni Debata dohot patupa kebaktian keluarga. Molo tapamanat ngolu ni halak i, holom do ndang tarbege angka panghataion hakristenon, holan arta tano on manggohi rohana, jala nunga malos huhut mate ngolu partondionna, nang pe targoar dope ibana ruas ni huria. Jamot hita unang tois rohanta di Jesus dohot di Hatana, molo tois rohanta disi utahononna do hita (Pangk 3:16) songon huria na danggoldanggol sisilon.

II.        Asa ias jala marparbue na godang hita

Dipaias do ranting i asa marparbue, songon i hita halak kristen dipaias Hata ni Debata (ay 3) Hata ni Debata na tabege parhitean ni Tondi Porbadia do i bongot huhut mangula di rohanta; Sude Hata ni Debata na tarsurat i marisi patik/ pinsangpinsang dohot Barita Nauli na gabe apulapul jala ngolu do i. Sai marpoda do angka natuatua tu ianakkonna, alai jotjot poda i ndang siat, ndang margogo, ai godangan bisuk ni portibi on do. Jadi ndang margogo mangula, mangaropuhi, mangurati huhut manutung rohana. Alai molo hata ni Debata manggohi rohanta, na ni donganan ni Tondi Porbadia i, dipaias i do rohanta. Di na mian hita di Jesus, mudarna dohot Tondina i paias hita (1 Joh 1:7 ). Disesa do sude dosanta (1 Joh 1:9), gabe hilalaonta do ias ni panggora ni roha tiur ulaonta, jala gok tua dohot olopolop ngolunta (Pslm 32:1). Torop sian hita na gaor panggora ni rohanta, ndang adong dame maradophon Debata dohot dongan jolma. Sude i tarjadi ala so sesa dope dosanta, ndang tatopoti, ndang dibagasan Jesus ngolunta, ala ni lam gaor ma rohanta songon roha ni si Kain dibahen sibolis i. Ala ni i tung sai mian ma hita di Jesus marhitehite na mian di HataNa, asa tung ias ngolunta, sonang panggora ni roha (1 Joh 3).

Tu ranting ni anggur do hita dipatudos Jesus, ndang tu bunga manang hau haiason, bunga dohot bulung na rugun na pinangido ni Tuhan Jesus. Alai anggur ingkon parbuena do na tabo panganon jala halomoan di Israel. Songon i do hita halak Kristen, parbue halomoan ni Debata diigil Jesus sian hita. Angka aha do parbue i? Di Galatia 5:22; adong do sia (9) parbue partondion diigil Debata sian hita, i ma: Holong dohot las ni roha, dame dohot lambas ni roha, habasaron, habasaon, haporseaon, halambohon dohot hatomanon. Sada pe na hurang sian i ndang marparbue na denggan; tiruanna, molo so pardame hita holan na guntur ma jabunta, guntur dohot dongan sahuta, sabangso, parbue na asing i ndang marguna manang marurus ma i. Ala ni do tapamanat ma dirinta be, parbue aha do na jumpang dingolunta? Parbue na busuk manang parbue partondion do tu dongan? Manang ndang hea tapingkiri asa adong parbuenta diadopan ni Debata dohot jolma. Molo so gabe anggur na marparbue hita, tudos ma hita tu hau ara na tinoruan ni Tuhan i na so marparbue i (Mat 21:19) i, manang songon ranting ni anggur na so marparbue i na ingkon digotap jala dibolongkon (Joh 15:2) Hadameonta dohot Jesus do mambahen hita mangolu jala marparbue, siala i molo naeng ture jala marparbue, hita sai domu ma hita tu Tuhan Jesus i.

III.        Dibahen i mian ma hita dibagasan Jesus jala baen hasangapon ni Debata ma ngolunta.

Godang do jolma na mambahen marlea Debata ala ni ngoluna. Molo taida daftar ni na hona tahan manang tarhurung ala ni hajahaton, tung godang do i margoar Kristen, naung tardidi dohot ruas ni huria. Aha do dohonon ni pejabat na manghurung i? Dohononna ma songonon do hape halak Kristen? Huroha hajahaton do diajarhon Jesus tu pengikutna. Nda nunga marlea Debata? Dalan asa marsangap Debata dohot Jesus marhitehite i ma molo saurdot pangalahonta tu Hakristenonta. Isara barang sigadison; molo merekna patent hape isina roa, penipuan do goar ni i. Jala uhumon do sibahen barang palsu i. Ala ni i ingkon sipasangap Debata do sandok ngolunta.

Di 1 Kor. 10:31 “Na mangan manang na minum pe hamu, manang dia pe diula hamu bahen hamu saluhutna pasangap Debata”. Hita pe las do rohanta molo tahilala jala tahaporsea i marsangap Goar ni Tuhanta ala ni hita. Alai torang do taboto na so tau hita patupa i, ai ganup ari do sai diunjuni, dielaela sibolis i hita, gabe marlea Debata. Alai asa boi ngolunta i gabe pujipujian tu Debata, ingkon tarumari dirinta, sai pasiat Jesus tongtong bongot jala mian di rohanta, gabe tardok hita ma: Ndang ahu be na mangolu i nuaeng; alai Kristus do na mangolu dibagasan ahu (Gal. 2:20) Ala ni sai mian ma hita tongtong dibagasan Jesus. Amen.

 

Sinurathon ni: Pdt. Swingly Sihotang, S. Th