JAMITA MINGGU II Dung EPIPHANIAS: JESUS DO TUHAN ANAK NI DEBATA (JOHANES 1:43-51)

Patujolo:

Mulai sian masa ni Tuhan Jesus sahat tu sadari on, godang do pandangan ni jolma taringot tu pribadi ni Tuhan Jesus, bahkan godang na mangaraguhon Ibana, apalagi marhite pandohan ni Tuhan Jesus nai mandok: “Ibana do Mesias na ro sian Banua Ginjang”. Adong do deba na menganggap Tuhan Jesus i sebagai: “Jolma biasa”, adong na mandok: holan “sekedar Nabi”, adong namandok: “satonga jolma satonga Tuhan”, dohot angka pandohan na asing dope. Molo tajaha ayat sebelum turpuk on (Johannes 1:35-36), di hatindangkon si Johannes pandidi do bahwa Jesus do Birubiru ni Debata, jala dohot di turpuk on di hatindangkon si Natanael do bahwa Jesus do Anak ni Debata, raja ni Israel.

Laos alani ma, marhite turpuk jamita on, di podahon jala di ondolhon hata ni Debata tu hita marhite, Thema:

“JESUS DO TUHAN ANAK NI DEBATA”

I.         Na Gabe Jolma laho patupahon Haluaon

Mamungka mangajari Tuhan Jesus, jumolo do Ibana mamillit angka siseanNa na 12 i, jala marbedabeda do cara ni Jesus manjou dohot mamillit angka siseanNa i, isarana, di turpuk on taida do panjouon ni Tuhan Jesus tu si Pilippus marhite pandohan namandok “Ihuthon ma Ahu”. Dang adong penolakan manang keraguan di si Pilippus laho mangihuthon Jesus, bahkan sebalikna, laos dohot do ibana pasahathon barita las ni roha i tu si Natanael na mandok naung ro do Mesias i, songon naung pinaboa ni angka panurirang di padan na robi, i ma Jesus Anak ni si Josep sian huta Nasaret. Atik pe dang dihaporseai si Natanael pandok ni si Pilippus i, ai ragu do Ibana di barita i na mandok sian haroroan ni Mesias i sian Huta Nazaret. Ia huta Nasaret i ma sada huta na metmet di Luat Galilea, na menurut pangantusionna dang mungkin sian huta nametmet i haroroan ni Raja Sipalua i. Nian dang tardodo roha ni jolma namasa i, ai ndang dapot diantusi, ndang siat tu logika, jala ndang mungkin masa sisongon i. Alai ndang adong naso tarpatupa Debata, saluhutna do dipamasa laho patulushon sakkap ni Debata, i ma paluahon jolma i sian dosa.

Hinorhon naso porsea si Natanael, didok si Pilippus ma tu si Natanael: “ro ma ho marnida,” tujuanna mangalehon kepastian taringot tu barita i, dung i di dapothon si Natanael ma Jesus, laos pajumpang ma nasida, jala marhite parjumpaan i mago ma nang keraguan sian rohana, ai atik pe so hea nasida pajumpang alai di tanda jala diboto Jesus do taringot tu Pribadina. Asa marhite i ma adong pengakuan sian si Natanael na mandok: “Jesus do Tuhan Anak ni Debata”. Sukkunsukkun di hita, boasa pola gabe jolma Tuhan Jesus i, tuat sian banua Ginjang ro tu portibi on? Tangkas do taboto, di mulana i, tung mansai denggan situtu do jolma i ditompa Debata, dilehon hosa hangoluan, diparbadiai, jala Debata sandiri manarihon ngolu nasida, ndang adong na hurang di jolma i.              Alai ala ni pangela ni sibolis i, madabu ma jolma i tu bagasan dosa, laos mamukka sian dosa ni jolma na parjolo i, gabe hot ma ngolu ni jolma i dibagasan dosa sahat tu sadari on.

Ido asa didok na tarsurat i: Saluhutna do Jolma i mardosa, sada pe ndang adong na tigor (Roma 3:10, Psalm 14:1-3), i ma hinorhon ni dosa naparjolo sian si Adam. Alani dosa i, sega ma hubungan ni Debata tu hita jolma. Ndang adong dalan na boi dipatupa jolma i laho paulihon parsaoran/hubungan dohot Debata, nang pe marhite patik, ulaon na denggan, nang marhite akka pelean na asing pe. Alani i ma disuru Debata AnakNa Tuhan Jesus Kristus Gabe Jolma, ai jolma do na naeng sipaluaonNa. Didok di Roma 6: 23 “Jala upa tinuhor ni dosa do Hamatean, na marlapatan do i, ianggo sasintongna tu hamatean do Jambar ni nasa jolma hinorhon ni dosana be. Alai, Holan ala ni asi ni roha ni Debata sambing do umbahen malua ganup jolma i, ai dipalua jala dipintori do jolma i marhitehite asi ni roha dibagasan Kristus (Roma 3:24). Ido umbahen na disuru Debata Tuhan Jesus tu Portibi on, laho Paluahon jolma sian Dosa (Mateus 1:21). Laos tarsurat do i:

-            Dimateus 18:11 didok: “Ai naung ro do Anak ni jolma i, paluahon na mago”.

-              Di Lukkas 19:10 didok: “Ai na ro do Anak ni jolma imangalului jala paluahon na mago”. Saluhut do jolma i naung mago sian adopan ni Debata hinorhon ni Dosa i.

-                 Di Johannes 12:47 didok: “Asa molo adong na umbege hatangku, gabe ndang diradoti, ndada Ahu manguhum ibana; ai ndada laho manguhum portibi on, na laho paluahon portibi on do, umbahen na ro Ahu”.

Alani, Naeng ma tangkas taboto, ia Tuhan Jesus, i do Tuhan jala Sipalua, Ibana do Tuhan naung ro sian Banua Ginjang gabe Jolma, asa marhite Tuhan Jesus malua Ganup Jolma na porsea di Ibana (Johannes 3:16).

II.      Ibana Ma Taihuthon Jala Tahaporseai

Didok Tuhan Jesus tu si Pilippus: “Ihuthon ma Ahu,” dung i diihuthon ma Jesus. Adong do sikap na positif naeng idaonta sian panjouon ni si Pilippus on gabe sisean ni Tuhan Jesus, i ma:

a.      Diboto ibana, ise do si ihuthononna,

b.      Ndang manjua jala ndang adong keraguan di ibana,

c.      Ndang mangalului sidalian jala siap ibana menerima segala konsekuensi,

d.     Ndang dipikkiri rohana keluarga, dohot akka arta portibi on,

e.      Jala rela ibana maninggalhon nasa hagiot ni dagingna.

Laos songon i do nang hita laho mangihuthon Jesus i, ikkon rade hita mamelehon ngolunta on, mangaradoti hataNa, jala mampu maninggalhon nasa hagiot ni daging. Ndang tarbahen hita mangihuthon Kristus i, molo humolong dope rohanta tu angka na di hasiangan on (hamoraon, hagabeon, hasangapon), ai tarsurat do: Ai na humolong roha di amana manang inana sian tu Tuhan Jesus, ndang tama i gabe siseanNa (Mateus 10:37), jala halak na so mamorsan silang na tu ibana, laho mangihuthon Jesus ndang tama i siseanNa. Alani ikkon tabahen Jesus i gabe arta na ummarga dihita.

Hita songon halak Kristen, mangihuthon Kristus, berarti dang holan sebatas terdaftar gabe ruas ni Huria, alai marngolu na imbaru, na pinaimbaru ni Tondi Porbadia, marhamubaon ni roha (pertobatan siganup ari), mamparbuehon parbue hatiuron. Na mangihuthon jala na manghaporseai Tuhan Jesus, ndada holan dihata manang holan sebatas identitas, alai penyerahan diri secara totalitas marhite hubungan na denggan dohot marhite parange na tama. Didok hata ni Debata do, Ai haporseaon i pe, anggo so adong pangulaonna, doshon naung mate do hadirionna (Jakkobus 2:17). Antong, nungga tangkas be panandaionta di Tuhan Jesus marhitehon barita nauli i, dipatandahon do diriNa, Ibana do Tuhan Anak ni Debata naung ro tu Portibi on mamboan haluaon, alani, holan Ibana do dalan tu Ama i (Johannes 14:6) jala angka naporsea di Tuhan Jesus mangolu do saleleng ni lelengna (Yohanes 3:16). Jadi, takkas do di ondolhon barita nauli on tu hita saluhutna, unang be adong keraguan di hita laho mangihuthon Jesus.

Tajangkon ma Ibana dibagasan Rohanta, nang di ganup ngolunta be, gabe Tuhan Jala Sipalua. Tapatuduhon ma hita songon angka naung pinalua ni Debata, marhite panindangionta dohot pambahenan nang dohot parange hatiuron. Ai Nungga gabe anak hita diain Debata, i ma angka jolma na porsea di Ibana (Johanes 1:12), jala nungga gabe parjambar hita di harajaon ni Debata. Attong Jesus do Tuhan Anak ni Debata, taihuthon jala Haporseai ma Ibana. Amen.

 

Sinurathon ni: Pdt. Freddy Sinaga, M. Th